នៅព្រឹកថ្ងៃទី០១ ខែកុម្ភៈ ឆ្នាំ២០២១នេះ អគ្គលេខាធិការដ្ឋានក្រុមប្រឹក្សាសកម្មភាពជនពិការ បើកវគ្គបណ្តុះបណ្តាល ស្តីពីហេដ្ឋារចនាសម្ព័ន្ធរូបវន្ត ដើម្បីបង្កលក្ខណៈងាយស្រួលដល់ក្រុមប្រឹក្សាសកម្មភាពជនពិការដែរពិធីនេះ ប្រព្រឹត្តិទៅក្រោមអធិបតីភាពឯកឧត្តម អ៊ុង សម្បត្តិ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ ដោយមានការចូលរួមពីលោកនាយករងរដ្ឋបាលសាលាខេត្ត ព្រមទាំងថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋាន តំណាងអង្គការជនពិការអន្តរជាតិ (HI) លោកលោកស្រី អនុប្រធាន សមាជិកសមាជិកា នៃក្រុមប្រឹក្សាសកម្មភាពជនពិការខេត្តជាច្រើនរូបទៀតផង។
បើតាមលោក ចឹក គឺមជុន នាយករងរដ្ឋបាលសាលាខេត្តសៀមរាប បានបញ្ជាក់ថា ក្រោមការដាក់ចេញរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នូវយុទ្ធសាស្ត្រចតុកោណដំណាក់កាលទី៤ ដែលបានផ្តោតជាសំខាន់ទៅលើ យុទ្ធសាស្រ្តគាំពារសង្គម សម្រាប់ជនក្រីក្រនិងជនងាយរងគ្រោះ គឺជាគោលនយោបាយអាទិភាពរបស់រាជរដ្ឋាភិបាល ដែលធានាឱ្យបងប្អូនទទួលបាននូវផលប្រយោជន៍ ពីប្រព័ន្ធជំនួយសង្គម និងរបបសន្តិសុខសង្គម បានកាន់តែល្អប្រសើរឡើង។
លោកបន្តថា រាជរដ្ឋាភិបាលកម្ពុជា ក៏បានបង្កើតច្បាប់ស្តីពីកិច្ចការពារ និងលើកកម្ពស់សិទ្ធិជនពីការរួចមកហើយ ដែលច្បាប់នេះ គឺកំពុងធ្វើវិសោធនកម្មថ្មី ទាំងអស់នេះបានបង្ហាញឱ្យឃើញពីការយកចិត្តទុកដាក់ខ្ពស់ អំពីសុខទុក្ខ ជីវភាពរស់នៅរបស់បងប្អូន ជនមានពិការភាព និងគ្រួសារឲ្យមានភាពល្អប្រសើរឡើងពីមួយថ្ងៃទៅមួយថ្ងៃ ក្នុងការគោរពភាព ថ្លៃថ្នូរពីកំណើត និងការរស់នៅដោយឯករាជ្យ ព្រមទាំងសុខុមាលភាពពេញលេញ ដោយលើកកម្ពស់ ភាពស្មើគ្នាចំពោះមុខច្បាប់ និងការទទួលបានសេវាយុត្តិធម៌ ការចាកផុតពីការធ្វើទារុណកម្ម ការរំលោភ បំពាន ការកេងប្រវ័ញ្ច អំពើហិង្សា និងដំណោះស្រាយ គ្រាមានអាសន្ន ព្រមទាំងលើកស្ទួយសមភាពស្រ្តី ពិការ កុមារពិការ និងជនមានពិការភាពគ្រប់ប្រភេទផងដែរ។
ឯកឧត្តម អ៊ុង សម្បត្តិ មានប្រសាសន៏ថា ចំពោះបញ្ហាជនពិការភាពកន្លងទៅក្រសួង ស្ថាប័នពាក់ព័ន្ធ ក៏ដូចជា រដ្ឋបាលខេត្ត មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត រួមទាំង មន្ទីរ-អង្គភាពពាក់ព័ន្ធ និងអភិបាលក្រុង ស្រុក ក៏បានជួយសម្រួលដល់បងប្អូនជនមានពិការភាពរបស់យើងដោយបានយកចិត្តទុកដាក់យ៉ាងខ្លាំង។ វាជាការពិតណាស់ យើងក៏បានទទួលស្គាល់ថា បញ្ហាប្រឈមដែលត្រូវដោះស្រាយចំពោះជនមានពិការភាព រួមមាន ការរស់នៅមានឱកាសតិចតួចក្នុង ការរកប្រាក់ចំណូល ការបាត់បង់ខូចខាតសរីរាង្គណាមួយ ឬសតិបញ្ញា បណ្តាលឱ្យមានការរំខានដល់ ជីវភាពរស់នៅ ឬសកម្មភាពនានាប្រចាំថ្ងៃ ដូចជាជនមានពិការភាពរាងកាយ ពិការភាពភ្នែក ពិការភាពក្នុងការស្តាប់ ពិការភាពសតិបញ្ញា និងប្រភេទពិការភាពផ្សេងៗទៀត ដែលនាំឱ្យមានលក្ខណៈមិនប្រក្រតី។ លើមូលដ្ឋាននេះ រាជរដ្ឋាភិបាលកម្ពុជា ក៏បានដាក់ចេញនូវគោលនយោបាយជាច្រើនបន្តបន្ទាប់ ដូចជា ច្បាប់ និងលិខិតបទដ្ឋានគតិយុត្តិនានា នៅក្នុងព្រះរាជាណាចក្រកម្ពុជា។
ឯកឧត្តម អ៊ុង សម្បត្តិ បានសម្តែងនូវការកោតសរសើរចំពោះ ថ្នាក់ដឹកនាំ និងមន្ត្រីរាជការនៃអគ្គលេខាធិការដ្ឋាន ក្រុមប្រឹក្សាសកម្មភាពជនពិការ តំណាងអង្គការជនពិការអន្តរជាតិ (HI) លោក លោកស្រី អនុប្រធាន សមាជិក សមាជិកា នៃក្រុមប្រឹក្សាសកម្មភាពជនពិការខេត្ត និងអង្គការដៃគូរនានា ដែលបានយកចិត្តទុកដាក់ចំពោះសុខទុក្ខរបស់បងប្អូន ជនមានពិការភាពកន្លងមកអស់រយ:ពេលជាច្រើនឆ្នាំ៕
អត្ថបទ និងរូបភាព៖ ស៊ាន សុផាត
