នៅថ្ងៃទី០១ ខែកុម្ភៈ ឆ្នាំ ២០២១ អាជ្ញាធរស្រុកស្រីស្នំ បានសម្ពោធដាក់ឲ្យប្រើប្រាស់ នូវស្ថានីយផលិតទឹកពិសារសុវត្ថិភាពសហគមន៍ស្លែងតាវេត ស្ថិតក្នុងបរិវេណសាលាឃុំក្លាំងហាយ ស្រុកស្រីស្នំ ខេត្តសៀមរាប ជាផ្លូវការ ដើម្បីលើកកម្ពស់សុខភាព អនាម័យ និងជំរុញដល់ប្រជាពលរដ្ឋទទួលទានទឹកសុវត្ថិភាពនៅតាមមូលដ្ឋាន។
ក្នុងនាមក្រុមប្រឹក្សា គណៈអភិបាលស្រុក លោក សាង គិមសេង អភិបាលរងស្រុកស្រីស្នំ លើកឡើងថា៖ ការបង្កើតស្ថានីយទឹកពិសារសុវត្ថិភាពសហគមន៍ គាំទ្រដោយអង្គការលំនៅឋានមនុស្សជាតិកម្ពុជា និងផ្ដល់ទីតាំងដោយអាជ្ញាធរឃុំនាពេលនេះ បានចូលរួមជាមួយរាជរដ្ឋាភិបាលកម្ពុជា ក្នុងការសម្រេចឱ្យបាននូវ ផែនការយុទ្ឋសាស្ត្រជាតិ ធ្វើយ៉ាងណា ឲ្យប្រជាពលរដ្ឋទទួលបានទឹកស្អាត និងអនាម័យទូទាំងប្រទេសត្រឹមឆ្នាំ២០២៥។
លោកអភិបាលរងស្រុក បានស្នើដល់មេឃុំ មេភូមិ និងអាជ្ញាធរពាក់ព័ន្ឋទាំងអស់ ត្រូវផ្សព្វផ្សាយឱ្យបានទូលំទូលាយដល់ប្រជាពលរដ្ឋ ឲ្យចូលរួមប្រើប្រាស់ទឹកក្នុងសហគមន៍ឱ្យបានគ្រប់ៗគ្នា និងយកចិត្តទុកដាក់លើប្រតិបត្តិការរបស់ស្ថានីយ ធ្វើយ៉ាងណា ធានានូវការគ្រប់គ្រង បែងចែកចំណូលចំណាយ ប្រកបដោយតម្លាភាព ការទទួលខុសត្រូវ ចីរភាព និងប្រសិទ្ឋភាព។
ព័ត៌មានជាតិ ថ្មីៗ
លោក អឺប អ៊ាន់ ប្រធានប្រតិបត្តិ អង្គការលំនៅឋានមនុស្សជាតិកម្ពុជា បង្ហាញថា៖ ស្ថានីយផលិតទឹកពិសារសុវត្ថិភាពសហគមន៍ “ស្លែងតាវេត”នេះ បានបំពាក់ប្រព័ន្ធបន្សុទ្ធទឹក Reverse Osmosis (RO) មានសមត្ថភាពផលិតទឹកពិសារបាន ១៦,០០០ លីត្រក្នុងមួយថ្ងៃ។ ក្រៅពីសាងសង់ស្ថានីយនេះអង្គការ ក៏បានបណ្តុះបណ្តាលក្រុមប្រតិបត្តិករស្ថានីយ អំពីដំណើរការផលិត ថែទាំ និង ជួសជុស ព្រមទាំងជំនាញអាជីវកម្មបែបសហគមន៍ លើអាជីវកម្មផលិតទឹកពិសារ សំដៅចូលរួមកែលម្អ ជីវភាព និង សុខុមាលភាពប្រជាជនក្នុងឃុំក្លាំងហាយផងដែរ។
សូមជម្រាបបថា៖ ស្ថានីយផលិតទឹកពិសារសុវត្ថិភាពសហគមន៍ “ស្លែងតាវេត” នេះប្រើប្រាស់រយ:ពេលសាងសង់អស់ ៤ខែ ចាប់ផ្តើមពីថ្ងៃទី ២៥ ខែ ឧសភា ដល់ថ្ងៃទី ២១ ខែសីហា ឆ្នាំ២០២០ និងចំណាយថវិកាប្រមាណសរុប ១២០លានរៀល។ សម្រាប់ខេត្តសៀមរាប អង្គការលំនៅឋានមនុស្សជាតិកម្ពុជា បានសាងសង់ស្ថានីយ ផលិតទឹកពិសារសុវត្ថិភាពសហគមន៍ បានចំនួន ៦កន្លែង ស្ថិតក្នុងស្រុកចំនួន៤ រួមមាន ស្រុកពួក ក្រឡាញ់ បន្ទាយស្រី និងស្រីស្នំ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
