សម្រាប់ទេសចរណ៍បោះតង់ ភ្ញៀវទេសចរណ៍បានជ្រើសរើសទីតាំងដែលសក្តិសម និងមានអំណោយផល ដែលទីតាំងទាំងនោះជាតំបន់អេកូទេសចរណ៍ មានដូចជា តំបន់ភ្នំ ទឹកធ្លាក់ ទឹកស្ទឹង ជារួមគឺនៅព្រៃភ្នំ ហើយមានប្រភពទឹកប្រើប្រាស់ បន្ទប់អនាម័យ មានសុវត្ថិភាព និងទេសភាពស្អាតៗ។
លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប មានប្រសាសន៍ថា៖ យុវជនក៏ដូចអ្នកទេសចរណ៍ ជាលក្ខណៈគ្រួសារក្តី ជាក្រុមក្តី មុននឹងសម្រេចចិត្តសម្រាកលំហែរដោយការបោះតង់ គួរគប្បីជ្រើសរើសពេលវេលា និងគោលដៅដែលមានអាកាសធាតុត្រជាក់ល្មម ជាពិសេសយករដូវកាលមិនក្តៅពេកមិនត្រជាក់ពេក ជារដូវរំហើយដែលមិនមានភ្លៀងធ្លាក់ជោកជាំ ហើយអាកាសធាតុត្រជាក់ស្រួល ទើបបង្កើតបានជាបរិយាកាសមនោរម្យសម្រាប់ក្រុមគ្រួសារបងប្អូន មិត្តភ័ក្រទាំងអស់គ្នា បន្ថែមពីនេះក៏ត្រូវពិនិត្យមើលស្ថានភាពភូមិសាស្ត្រ អំពីសន្តិសុខ សុវត្ថិភាព ត្រូវដាក់តាមខ្លួននូវថ្នាំសង្កូវផ្សេងៗ ដើម្បីបង្ការសត្វអសិរពិសទិចឬខាំ។លោក ង៉ូវ សេងកាក់បន្តថា៖ ការបោះតង់ក៏ជាចំណែកមួយជួយដល់ប្រជាពលរដ្ឋក្នុងសហគមន៍ឱ្យរកចំណូលបានផងដែរ តាមរយ:ការបរិភោគអាហារ និងភេសជ្ជៈជាដើម។
លោក ធឿន វុឌ្ឍី ប្រធានក្រុមហ៊ុន មរតក អៅដរ ខេត្តសៀមរាប ដែលធ្លាប់ទទួលបំរើសេវាបោះតង់តាមរមណីយដ្ឋាននានា បានឱ្យដឹងនៅរសៀលថ្ងៃទី០១ ខែកម្ភៈឆ្នាំ២០២១នេះថា៖ សារ:សំខាន់នៃទេសចរណ៍បោះតង់ គឺជាការផ្សងពេ្រង រៀនប្រឈមនឹងឧបស័គ្គឬបញ្ហា ដែលជួបប្រទះ ព្រមទាំងរៀនអត់ធ្មត់ ប្រឹងប្រែងជម្នះនូវឧបស័គ្គ និងបញ្ហាទាំងនោះ ប្រកបដោយ ភាពអំណត់ និងក្តីព្យាយាម។ លើសពីនេះទៅទៀត វាការបង្រៀននិងឆ្លុះបញ្ចាំងពីដំណើរជីវិត របស់បុគ្គលម្នាក់ៗ គឺតែងជួបប្រទះនូវការប្រឈមនឹងឧបស័គ្គតិចឬច្រើន ព្រមទាំងភាពសប្បាយរីករាយ ដែលជារឿងធម្មតារបស់ជីវិត។
លោកបន្តថា៖ ការបោះតង់មានក្រុមតិចច្រើនទៅតាមការនិយម។ តាមបទពិសោធរបស់ក្រុមហ៊ុន មរតកអៅដរ ជាក្រុមហ៊ុនទេសចរណ៍ក្នុងស្រុកមួយ ដែលទើបបង្កើត និងមានមូលដ្ឋានក្នុង ក្រុងសៀមរាប បានបញ្ជាក់ថា ក្រុមហ៊ុននេះធ្លាប់រៀបចំបោះតង់ជូនអតិថិជនជាង ៥០០នាក់ ក្នុងពាក់កណ្តាលឆ្នាំ២០២០ ពោលគឺសម័យកាលវិបត្តិខូវីដ-១៩ ដោយអតិថិជនទាំងនេះ ជាថ្នាក់ដឹកនាំស្ថាប័ន ក្រុមហ៊ុនឯកជន និងប្រជាពលរដ្ឋធម្មតា ជាគ្រួសារផងដែរ។ កម្មវិធីរបស់ក្រុមហ៊ុននេះ មានភ្ជាប់កម្មវិធីដើរព្រៃ ជិះកង់ និងបោះតង់ជាកញ្ចប់តែមួយ។
ទេសចរណ៍បោះតង់ពិតជាមានសារៈសំខាន់មួយ ប្រសិនបើការបោះតង់នោះ មានសេវារៀបចំត្រឹមត្រូវដោយមានអ្នកជំនាញក្នុងការរៀបចំកម្មវិធីមួយនេះ។ ចង់បានប្រសិទ្ធភាព និងផលច្រើនពីការបោះតង់ អ្នកទេសចរណ៍ទាំងឡាយ គួរផ្សារភ្ជាប់ខ្លួនជាមួយធម្មជាតិឱ្យបានច្រើន ដោយប្រើប្រាស់វិញ្ញាណទាំង ៦ របស់យើង ភ្ជាប់ជាមួយធម្មជាតិ សម្រាកពីការប្រើប្រាស់ស្មាតហ្វូន និងបច្ចេកវិទ្យាផ្សេងៗជាដើម ដែលធ្វើឱ្យយើងរវល់ ធ្វើឱ្យយើងញៀន រហូតក្លាយជាការតប់ប្រមល់ ជំងឺស្ត្រេសជាដើម៕
អត្ថបទ និងរូបភាព: លោកយូ វង្ស
កែសម្រួលដោយ លីវ សុខុន
