នៅព្រឹកថ្ងៃទី ០២ ខែកុម្ភះ ឆ្នាំ២០២១នេះ នៅសាលាខេត្តសៀមរាប លោក ង៉ាន់ ភិរុណ អភិបាលរងខេត្ត បាន ដឹកនាំកិច្ចប្រជុំ ត្រួតពិនិត្យ និង តាមដានវឌ្ឍនភាពការងារ របស់មន្ទីរកសិកម្ម រុក្ខាប្រមាញ់ និង នេសាទខេត្ត ដោយមានការចូលរួមពីលោកនាយករងរដ្ឋបាលសាលាខេត្ត អស់លោក លោកស្រីថ្នាក់ដឹកនាំ ប្រធាន អនុប្រធានការិយាល័យ ចំណុះមន្ទីរកសិកម្មខេត្ត និង តំណាងទីចាត់ការចំណុះសាលាខេត្ត ចូលរួមផងដែរ ។
តាមសេចក្តីរាយការណ៍របស់ នាយខណ្ឌរដ្ឋបាលព្រៃឈើ និង នេសាទ រួមទាំងការិយាល័យចំណុះមន្ទីរកសិកម្ម ដោយបានលើពីបញ្ហាប្រឈមមួយចំនួន ដោយផ្តោតទៅលើបញ្ហាភ្លើងឆេះព្រៃឈើក្រញូង និង ការកាប់ទន្ទ្រានយកដីព្រៃ បទល្មើសដឹកជញ្ជូនឈើខុសច្បាប់ និង ការថយចុះនូវទិន្នផលត្រីក្នុងរយៈពេល២ឆ្នាំចុងក្រោយនេះ ដោយកត្តាទឹក និង ការកាប់ទន្ទ្រានព្រៃលិចទឹក ព្រមទាំងបទល្មើសនេសាទ ដោយប្រើប្រាស់ឧបករណ៍នេសាទខុសច្បាប់ ព្រមទាំងកង្វះខាតទឹកស្រោចស្រពដំណាំកសិកម្មជាដើម ។
មានប្រសាសន៍ក្នុងឱកាសនោះ លោក ង៉ាន់ ភិរុណ ក្នុងនាមតំណាងឯកឧត្តម ទៀ សីហា អភិបាលខេត្តសៀមរាប បានកោតសរសើរ ពីលទ្ធផលដែលមន្ទីរកសិកម្ម រុក្ខាប្រមាញ់ និង នេសាទខេត្តអនុវត្តបានក្នុងឆ្នាំ២០២០កន្លងមកនេះ និងជំរុញឲ្យវិស័យកសិកម្មក្នុងខេត្ត កាន់តែមានការវិវត្តន៍ឈានឡើង។ កត្តាសំខាន់នោះ លើការបណ្តុះបណ្តាលលើវិស័យ ជំនាញបច្ចេកទេស ក្នុងការដាំដុះដំណាំកសិកម្ម ចិញ្ចឹមសត្វជាដើម ។ ក្នុងនោះដែរ លោកអភិបាលរងខេត្ត ក៏បានផ្តោតសំខាន់ ចំពោះ បញ្ហាបទល្មើសព្រៃឈើ និង ជលផល ដែលជាគោលដៅដ៏ក្តៅគគុកនៅក្នុងសង្គមជាតិ ដែលបានធ្វើឲ្យបាត់បង់នូវធនធាន ធម្មជាតិទាំងលើគោក និង ទឹក ដែលបង្កឲ្យវិនាសមហន្តរាយដល់សង្គមជាតិ ។ លោក បានជំរុញដល់ថ្នាក់ដឹកនាំ មន្ត្រីជំនាញ ត្រូវពិនិត្យឡើងវិញ នូវរាល់ការធ្វើអាជីវកម្ម សិប្បកម្មតុ ទូ ត្រូវឲ្យមានច្បាប់អនុញ្ញាតត្រឹមត្រូវ ជាមួយនោះត្រូវបង្រ្កាបឲ្យបាននូវភាពអាណាធិបតេយ្យ ការកាប់ឈើយកមកធ្វើអុសធ្យូង ដែលជាអាជីវកម្មមួយបំផ្លាញព្រៃឈើ និង បានបំពុលដល់បរិស្ថាន។
ព័ត៌មានជាតិ ថ្មីៗ
លោកអភិបាលរងខេត្ត ក៏បានជំរុញផងដែរ ចំពោះការពង្រីក នូវការធ្វើវារីវប្បកម្មនៅតាមមូលដ្ឋាន ដើម្បីកាត់បន្ថយរាល់ការចាប់ត្រី ពីតំប់ធម្មជាតិខុសច្បាប់ ក៏ដូចជាចូលរួមអភិរក្សពូជត្រី នៅបឹងធម្មជាតិផងដែរ។ លើសពីនេះ អាជ្ញាធរត្រូវបង្រ្កាបនូវបទល្មើសនេសាទ ដែលប្រើប្រាស់ឧបករណ៍នេសាទខុសច្បាប់ និង ការកាប់ទន្ទ្រានព្រៃលិចទឹក ដែលជាជម្រកត្រីពងកូននៅរដូវទឹកឡើង ។
បន្ថែមពីនេះ លោកអភិបាលរងខេត្ត ក៏បានណែនាំដល់ មន្ត្រីជំនាញ លើការងារក្សេត្រសាស្ត្រ និងផលិតភាពកសិកម្ម ធ្វើការបណ្តុះបណ្តាលបច្ចេកទេសបន្ថែមទៀត ជូនដល់កសិករ លើការប្រើប្រាស់ជី ជ្រើសរើសគ្រាប់ពូជ ដើមី្បកែប្រែគុណភាពដី និងបំពេញតម្រូវការនៅតាមទីផ្សារ។ ដោយឡែក មន្ត្រីជំនាញបសុសត្វ ត្រូវគ្រប់គ្រងឲ្យខាងតែបាន នូវការនាំចូលនូវសត្វធាតុមកពីខាងក្រៅខេត្ត និង ត្រូវចុះពិនិត្យពីសុខភាពសត្វ នៅតាមមូលដ្ឋានឲ្យបានជាប្រចាំ ។ ចំពោះមន្ត្រីអសកម្មការងារ ត្រូវអនុវត្តនូវវិធានការរដ្ឋបាល ព្រមទាំងធ្វើការពង្រឹងឡើងវិញ នូវវិន័យការងាររបស់មន្ត្រីទៀតផង៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
