ប្រជាពលរដ្ឋមួយចំនួនរស់នៅក្នុងក្រុងសៀមរាប បានបង្ហាញ់ថា នាពេលសព្វថ្ងៃនេះ ពួកគាត់សង្គេតឃើញ ប្រជាពលរដ្ឋមួយចំនួន នៅតែមិនសូវចូលរួមគោរពច្បាប់ចរាចរនូវឡើយ ជាពិសេសអ្នកខ្លះបើកបរដោយការវ៉ាជែងច្រើនជួរ និងបើកបរទន្ទឹមគ្នា ដែរនេះ គឺជាកត្តាមួយយ៉ាងសំខាន់ដែលបណ្ដាលឲ្យកើតមានគ្រោះថ្នាក់ចរាចរណ៍ជារៀងរាល់ថ្ងៃ។ ដោយសារកត្តាប្រឈមនេះ ពួកគាត់ក៏បានទទូចឲ្យអាជ្ញាធរមានសមត្ថកិច្ច ត្រូវធ្វើការរឹតបន្ទឹងទៅលើបញ្ហានេះឲ្យបានតឹងរឹងជានេះទៀត ក្នុងសូមឲ្យសមត្ថកិច្ច និងអាជ្ញាធរពាក់ព័ន្ធ ធ្វើការចុះអប់រំផ្សព្វផ្សាយពីបញ្ហានេះឲ្យបានទូលំទូលាយបន្ថែមទៀត ដើម្បីទប់ស្កាត់គ្រោះថ្នាក់ចរាចរណ៍ឲ្យមានប្រសិទ្ធភាព។
បើតាមលោកវរសេនីយ៍ទោ ឈិត ឆាត នាយរងការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានឲ្យដឹង នៅព្រឹកថ្ងៃទី០២ ខែកុម្ភៈ ឆ្នាំ២០២១នេះថា យោងតាមច្បាប់ស្ដីពីចរាចរណ៍ផ្លូវនៃព្រះរាជាណាចក្រកម្ពុជា គឺមិនអនុញ្ញាត ឲ្យមានការបើកបរដោយវ៉ាជែង និងបើកបរទន្ទឹមគ្នាលើដងផ្លូវ។ ក្នុងនោះដែរចំពោះបញ្ហានៃការវ៉ាជែងនេះ ជាការរារាំង ដល់ការធ្វើដំណើររបស់ប្រជាពលរដ្ឋដទៃទៀត និងអាចបណ្ដាលឲ្យមានគ្រោះថ្នាក់ចរាចរណ៍ជារៀងរាល់ថ្ងៃ ដោយសារតែការធ្វេសប្រហែស និងការមិនចេះយោគយល់អាធ្យាស្រ័យគ្នានៅលើដងផ្លូវ។
លោកវរសេនីយ៍ទោ ក៏បានបញ្ជាក់ទៀតថា កន្លងមកសមត្ថកិច្ចតែងតែធ្វើការផ្សព្វផ្សាយជាប្រចាំ គ្រប់រូបភាពទៅដល់បងប្អូនប្រជាពលរដ្ឋ ក្នុងការចូលរួមគោរពច្បាប់ចរាចរទាំងនៅតាមទីសាធារណៈ ទីផ្សារ សាលារៀន និងទីកន្លែងជាច្រើនទៀត។ ជាមួយគ្នានោះ លោកក៏សូមធ្វើការសំណូមពរ ដល់បងប្អូនប្រជាពលរដ្ឋដែរជាអ្នកប្រើប្រាស់ផ្លូវ សូមចូលរួមគោរពច្បាប់ចរាចរណ៍ផ្លូវគោក ឲ្យបានត្រឹមត្រូវទាំងអស់គ្នា។
សូមជម្រាបថា បើតាមរបាយការណ៍របស់ការិយាល័យចរាចរណ៍ផ្លូវគោកខេត្តសៀមរាប ថាក្នុងឆ្នាំ២០២០កន្លងទៅ មានករណីគ្រោះថ្នាក់ចរាចរណ៍ កើតឡើង ៦៨ករណី ក្នុងនោះករណីស្លាប់ចំនួន ៨០នាក់ដោយភាគច្រើន បង្កឡើងដោយកត្តាមនុស្សដែលមាន៤៣ករណី ស្មើនឹង៣៦ភាគរយ រួមមានល្មើសល្បឿន , វ៉ាជែង , បត់គ្រោះថ្នាក់ជាដើម៕
អត្ថបទ ៖ ហែម បូរ៉ាន្នី
កែសម្រួល៖ អ៊ុន ណារាជ្យ
