នៅព្រឹកថ្ងៃទី០៣ ខែកុម្ភៈ ឆ្នាំ២០២១នេះ លោក Long Haiyun អគ្គនាយក ក្រុមហ៊ុន Global Digital Exchange Foundation Co,LTD បានចូលជួបសម្ដែងការគួរសមជាមួយ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន និងបង្ហាញពីចំណាប់អារម្មណ៍ក្នុងការវិនិយោគ លើវិស័យផ្សព្វផ្សាយនៅកម្ពុជា ជាពិសេសវិស័យទូរទស្សន៍ចល័ត OTT តាមប្រព័ន្ធអ៊ិនធើណិត។
តាមការលើកឡើងរបស់ លោក Long Haiyun បង្ហាញថា បច្ចុប្បន្ន ក្រុមហ៊ុនរបស់លោក គឺជាក្រុមហ៊ុនធំឈានមុខគេលំដាប់ទី៥ នៅប្រទេសវៀតណាម លើវិស័យទូរទស្សន៍ចល័ត OTT ដែលអាចមើលតាមទូរសព្ទ័ស្មាតហ្វូន។ តាមបទបង្ហាញដោយសង្ខេបជូន ឯកឧត្តមរដ្ឋមន្រ្តី ក្រុមហ៊ុន Global Digital Exchange Foundation បានសហការគ្នាជាមួយក្រុមហ៊ុនធំៗ ៣ នៅប្រទេសចិន ដែលវិនិយោគលើវិស័យ ស្មាតហ្វូន 5G ប្រពន្ធ័ សាត់តាឡាយ ការគ្រប់គ្រងទិន្ន័យ ដែលមានសាខាប្រមាណជាង ១ ពាន់កន្លែងទូទាំងពិភពលោក។ ក្នុងគម្រោង វិនិយោគលើវិស័យទូរទស្សន៍ចល័ត OTTនេះ ក្រុមហ៊ុនគ្រោងនឹងតម្លើង បង្គោលអង់តែន ចំនួន ២៦ទីតាំង នៅប្រទេសកម្ពុជា។
ឯកឧត្តម ខៀវ កាញារីទ្ធ បានស្វាគមន៍ ចំពោះគម្រោងវិនិយោគលើវិស័យផ្សព្វផ្សាយ ក្រុមហ៊ុន Global Digital Exchange Foundation នៅកម្ពុជា។ កន្លងមកនេះ មានក្រុមហ៊ុនជាច្រើន បានមកវិនិយោគលើវិស័យទូរទស្សន៍ចល័ត នៅកម្ពុជា តែនៅមិនទាន់ដំណើរការបានល្អនៅឡើយទេ។ គិតមកដល់បច្ចុប្បន្ននេះ ក្រសួងព័ត៌មាន បានអនុញ្ញាតឲ្យ ក្រុមហ៊ុនចិនចំនួន២ វិនិយោគលើវិស័យនេះ គឺ ក្រុមហ៊ុន យូណាន់ TV ប្រើប្រាស់ប្រពន្ធ័ OTT និងក្រុមហ៊ុន ស៊ីងម៉េង ប្រើប្រាស់ប្រពន្ធ័ IPTV។
ព័ត៌មានជាតិ ថ្មីៗ
ឯកឧត្តម រដ្ឋមន្រ្តី ក៏បានបញ្ជាក់ផងដែរថា ប្រទេសកម្ពុជាគ្រោងនឹងបញ្ចប់ការផ្សាយ ពីប្រព័ន្ធ Analog ទៅ Digital នៅឆ្នាំ២០២៣។ ដូច្នេះកម្ពុជា នឹងត្រូវចំណាយថវិកាជាច្រើន និងទាមទារ ឲ្យមានកិច្ចសហការផ្នែកបច្ចេកទេស ពីបណ្តាក្រុមហ៊ុនឯកជន និងបណ្តាប្រទេសនានា ដើម្បីធ្វើឲ្យការផ្លាស់ប្ដូរនេះ ដំណើរការទៅដោយរលូន។ តាមរយៈគម្រោង ស្នើសុំកិច្ចសហការនេះ ឯកឧត្តម បានស្នើដល់ភាគីក្រុមហ៊ុន បញ្ជូនឯកសារ និងលិខិតស្នើសុំកិច្ចសហការនានា មកក្រសួង ដើម្បីធ្វើការពិនិត្យ និងបញ្ជូនទៅប្រមុខរាជរដ្ឋាភិបាល ពិនិត្យសម្រេចជាចុងក្រោយ នៃដំណើរការវិនិយោគនេះ ៕
អត្ថបទ និង រូបថត ៖ ក្រសួងព័ត៌មាន
