គណ:កម្មការប្រយុទ្ធប្រឆាំងផលិតផលក្លែងក្លាយ ហៅកាត់ថា គ.ប.ផ.ក. នៃក្រសួងមហាផ្ទៃ នៅរសៀលថ្ងៃទី០៣ ខែកុម្ភៈ ឆ្នាំ២០២១ បានចុះត្រួតពិនិត្យស្ថានភាពអាជីវករលក់ដូរនៅផ្សារលើធំថ្មី ក្រុងសៀមរាប ខេត្តសៀមរាប។ ក្នុងការចុះត្រួតពិនិត្យស្ថានភាពលក់ដូរនោះ គណ:កម្មការបានអប់រំផ្សព្វផ្សាយដល់អាជីវករលក់គ្រឿងទេសនៅទីនោះ អំពីផលប៉ះពាល់នៃការធ្វើអាជីវកម្មផលិតផលក្លែងក្លាយផងដែរ។
លោកឧត្តមសេនីយ៍ត្រី យឹម សំអុន អនុប្រធានលេខា នៃគ.ប.ផ.ក.បានឲ្យដឹងថា ដោយមានការសហការ ពីកម្លាំងនគរបាលការិយាល័យប្រឆាំងបទល្មើសសេដ្ឋកិច្ច មន្ត្រីសាខាការពារអ្នកប្រើប្រាស់ កិច្ចប្រកួតប្រជែង និងបង្រ្កាបការក្លែងបន្លំខេត្តសៀមរាប និងគណៈកម្មការផ្សារលើធំថ្មី ផងនោះកម្លាំងសមត្ថកិច្ចបានចុះធ្វើ ការអប់រំអំពីដល់អាជីវករ ដែលកំពុងប្រកបរបរលក់គ្រឿងទេសនៅផ្សារលើធំថ្មីនេះ ឲ្យពួកគាត់បានយល់អំពីផលវិបាកដែលកើតឡើងនៅពេលដែលពួកគាត់ លក់ដូរផលិតផលក្លែងក្លាយជូនដល់អតិថិជន។
លោកបន្តថា ផលិតផលក្លែងក្លាយ វាបាននាំឲ្យគ្រោះថ្នាក់ដល់សុខភាពអ្នកប្រើប្រាស់ ។ ចំណែកអ្នកលក់ក៏ប្រឈមជាមួយនឹងផ្លូវច្បាប់ដែរ។ ដូច្នេះដើម្បីបញ្ចៀសនូវបញ្ហានេះ មានតែការអប់រំដល់អ្នកលក់ទេ ឲ្យពួកគាត់បានយល់ហើយបញ្ឈប់ការលក់ដូរនូវផលិតផលទាំឡាយណាដែលមិនមានប្រភពច្បាស់លាស់ ឬផលិតផលក្លែងក្លាយ។ បើទោះជាយ៉ាងណា លោកឧត្តមសេនីយ៍ត្រី បានវាយតម្លៃខ្ពស់ចំពោះអាជីវករលក់គ្រឿងទេសនៅផ្សារលើធំថ្មី ដែលពួកគាត់បានយល់ដឹងច្រើនអំពីផ្លូវច្បាប់ ដោយលក់ដូរតែរបស់របរទាំងឡាយដែលត្រឹមត្រូវតាមលក្ខណ:ច្បាប់៕
អត្ថបទ និងរូបភាព: ជា ស្រស់
កែសម្រួល: លីវ សុខុន
