នៅថ្ងៃទី០៤ ខែកុម្ភៈ ឆ្នាំ២០២១នេះ ឯកឧត្តម យិត ចាន់ដារដ្ឋ អគ្គនាយករង នៃអាជ្ញាធរជាតិអប្សរា បាននាំយកបណ្ណសរសើរ ជូនដល់ប្រជាពលរដ្ឋចំនួន ០៧គ្រួសារ រស់នៅក្នុងតំបន់រមណីដ្ឋានអង្គរ ស្ថិតក្នុង ឃុំព្រះដាក់ និង ឃុំរុនតាឯក ស្រុកបន្ទាយស្រី ខេត្តសៀមរាប ដែលបានសាង់សង់លំនៅឋានបែបខ្មែរ ត្រឹមត្រូវតាមការណែនាំ របស់អាជ្ញាធរជាតិអប្សរា។
ឯកឧត្តមអគ្គនាយករង លើកឡើងថា៖ ការលើកតម្លៃផ្ទះខ្មែរ នៅក្នុងតំបន់រមណីដ្ឋានអង្គរនេះ រាជរដ្ឋាភិបាល មានគោលបំណងថែរក្សាគម្រូផ្ទះខ្មែរឲ្យបានត្រឹមត្រូវ ដែលឆ្លុះបញ្ចាំងពីវប្បធម៌ និងអត្តសញ្ញាណរបស់ខ្មែរ សម្រាប់ក្មេងៗជំនាន់ក្រោយ។
តាមការបង្ហាញរបស់ លោក ស៊ឹម ប៊ុនធឿន អនុប្រធាន នាយកដ្ឋានដែនដី នៃអាជ្ញាធរជាតិអប្សរា លើកឡើងថា លំនៅឋាន ដែលមានរចនាបថខ្មែរត្រឹមតែ មិនត្រឹមតែជាអត្តសញ្ញាណ នៃវប្បធម៌ ប៉ុណ្ណោះទេ តែក៏វាមានទំនាក់ទំនង យ៉ាងជិតស្និទ ជាមួយនឹងអាកាសធាតុ ជីវភាព មុខរបរប្រចាំថ្ងៃ ព្រមទាំងភ្ជាប់ទៅនិងជំនឿទៀតផង។
លោក ស៊ឹម ប៊ុនធឿន ក៏បានបង្ហាញផងដែរថា អាជ្ញាធរជាតិអប្សរា ក៏នឹងមានគម្រោងប្រគល់បណ្ណសរសើរនេះ ជូនប្រជាពលរដ្ឋដែលបានសាងសង់ផ្ទះត្រឹមត្រូវ តាមរចនាបថខ្មែរ ស្ថិតក្នុងស្រុកអង្គរធំ និង ស្រុកប្រាសាទបាគង ខេត្តសៀមរាប នៅពេលឆាប់ៗខាងមុខនេះផងដែរ។
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
