សួនផ្កាចម្រុះទើបបង្កើតថ្មីមួយកន្លែង ស្ថិតនៅឃុំឃុនរាម ស្រុកបន្ទាយស្រី ខេត្ដសៀមរាប កំពុងទាក់ទាញភ្ញៀវទេសចរមកទស្សនារាប់រយនាក់ក្នុងមួយថ្ងៃៗ និងរហូតដល់ពាន់នាក់ នៅថ្ងៃចុងសប្ដាហ៍ នេះបើតាមសម្ដីម្ចាស់សួនផ្កា លោក វណ្ណ វណ្ណារ៉ា ថ្ងៃទី០៥ ខែកុម្ភៈ ឆ្នាំ២០២១។
លោក វណ្ណ វណ្ណារ៉ា បង្ហាញថា៖ សួនផ្ការបស់លោកមានឈ្មោះ ថាសួនផ្កាក្រអូប បង្កើតបានរយៈពេល៥មកហើយ និងមានផ្កាចម្រុះគ្រប់រដូវ។ ពូជផ្កាដែលលោកបានយកមកដាំនេះ មួយចំនួនជាពូជផ្កាក្នុងស្រុក និងមួយចំនួនទៀតយកមកពីបរទេស។ ក្រៅពីសម្រស់សួនផ្កា នៅក្នុងតំបន់នេះ ភ្ញៀវទេសចរ អាចស្រូបយកខ្យល់បរិសុទ្ធ និងទេសភាពភ្ញំគូលែននាពេលថ្ងៃរៀបលិចផងដែរ។
ចំពោះតម្លៃចូលទស្សនា ម្ចាស់សួនផ្ការូបនេះ បង្ហាញថា៖ សម្រាប់មនុស្សធំមានតម្លៃ៤០០០រៀល ចំណែកកូនក្មេង និងព្រះសង្ឃមិនគិតថ្លៃនោះទេ។ លោកក៏បានបង្ហាញផងដែរថា ផ្ទៃដីដែលលោកមានគម្រោងអភិវឌ្ឍជាតំបន់ទេសចរណ៍ធម្មជាតិ មានជាង២០ហិកតា រួមទាំងផ្ទៃដីសួនផ្កា ៣ហិកតានេះផងដែរ។ ក្នុងនោះ លោកនឹងរៀបចំ ជាកន្លែងបោះតង់ ផ្សារបន្លែធម្មជាតិ កន្លែងថតរូបអនុស្សាវរីយ៍ជាដើម។
ព័ត៌មានជាតិ ថ្មីៗ
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
