តាមការឲ្យដឹងពីលោក លោក ម៉ែន វុទ្ធី នាយសង្កាត់រដ្ឋបាលព្រៃឈើស្វាយលើ ខេត្តសៀមរាប នៅព្រឹកថ្ងៃទី០៤ ខែកុម្ភៈ ឆ្នាំ២០២១នេះ បញ្ជាក់ថា ករណីភ្លើងឆេះព្រៃចម្ការពូជឈើធ្នុង កាលពីរសៀលថ្ងៃទី០៣ ខែកុម្ភៈម្សិលមិញនេះ បណ្ដាលឲ្យឆេះព្រៃ អស់ទំហំប្រមាណ២០ហិកតា។
លោក ម៉ែន វុទ្ធី បន្ថែមថា៖ ករណីភ្លើងឆេះនេះ ស្ថិតនៅក្នុងភូមិអង្កាញ់ ឃុំស្វាយលើ ស្រុកស្វាយលើ ដោយបានប្រើប្រាស់រថយន្តពន្លត់អគ្គីភ័យចំនួន៣គ្រឿង ដែលទទួលបានកិច្ចអន្តរាគមន៍ពីកម្លាំងសង្កាត់រដ្ឋបាលព្រៃឈើ ស្រុកស្វាយលើ សហការជាមួយនាយរងផ្នែករដ្ឋបាលព្រៃឈើ ស្រុកជីក្រែង និងអធិការដ្ឋាននគរបាលស្រុកស្វាយលើ។ នៅវេលាម៉ោង៧:៣០នាទីល្ងាច កងកម្លាំងពន្លត់អគ្គីភ័យ បានគ្រប់គ្រងស្ថានភាពភ្លើងឆេះទាំងស្រុង។
តាមការសន្និដ្ឋានរបស់លោក ម៉ែន វុទ្ធី មូលហេតុនៃការឆេះនេះ បណ្ដាលមកពីមានជនខិលខូចលួចដុត។ លោក បានអំពាវនាវ ដល់ប្រជាពលរដ្ឋក្នុងភូមិសាស្ត្រនេះ សូមចូលរួមថែរក្សាព្រៃឈើទាំងអស់គ្នា ចៀសវាងកាលួចដុត ឬកាប់បំផ្លាញព្រៃ ដែលប្រឈមនឹងការផ្ដន្ទាទោសតាមផ្លូវផ្លូវច្បាប់៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក សេង ផល្លី
