នាព្រឹកថ្ងៃទី០៨ ខែកុម្ភ: ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានលើកឡើងនៅក្នុងប្រជុំប្រចាំសប្តាហ៍ថា អ្នកសារព័ត៌មានត្រូវយល់ពីដែនសមត្ថកិច្ច និង ភារកិច្ចរបស់ខ្លួន ថាមានសិទ្ធិត្រឹមកម្រិតណា ដោយមិនត្រូវទៅបំពាននៅកន្លែង គេនោះទេ។
ការលើកឡើង របស់ឯកឧត្តម រដ្ឋមន្រ្តី ក្រសួងព័ត៌មាន នេះ ជាការឆ្លើយតបទៅនឹង ការតវ៉ារបស់ សម្ព័ន្ធអ្នកសារព័ត៌មានកម្ពុជា ហៅកាត់ថា CamboJA និងបណ្តាសមាគមអ្នកកាសែត មួយចំនួន ដែលមានប្រតិកម្ម ក្នុងការហាមមិនឲ្យអ្នកសារព័ត៌មាន ចូលថតទៅក្នុងតំបន់សមត្ថកិច្ចហាមឃាត់ ដែលបញ្ហានេះត្រូវបានចោទថា ជាការរារាំងសេរីភាព និងបានចោទបន្ថែមទៅលើការណែនាំរបស់ ស្នងការនគរបាលរាជធានីភ្នំពេញ ដោយយោងទៅតាមសម្ដីរបស់ ឯកឧត្តមរដ្ឋមន្រ្តី ក្រសួងព័ត៌មាន ដើម្បីអាចចាប់អ្នកសារព័ត៌មាន ។
ពាក់ពន្ធ័ទៅការចោទប្រកាន់នេះ ឯកឧត្តម រដ្ឋមន្រ្តី ក្រសួងព័ត៌មាន បញ្ជាក់ថា សមាគមសារព័ត៌មានមួយចំនួន មិនបានយល់អ្វីដែលជាច្បាប់នោះទេ ដែលហៅថាដែនសមត្ថកិច្ចហាមឃាត់ ត្រូវបានកំណត់ការហាមចូល។ បើនៅសហរដ្ឋអាមេរិកវិញ នៅពេលដែលហ៊ានចូលក្នុងដែនហាមឃាត់របស់សមត្ថកិច្ច គឺត្រូវចាប់ដាក់ខ្នោះតែម្តង។
ឯកឧត្តមរដ្ឋមន្រ្តី បញ្ជាក់បន្ថែមថា អ្នកសារព័ត៌មាន មិនមែនធ្វើការជំនួសសមត្ថកិច្ចនោះទេ គឺត្រូវរង់ចាំ សមត្ថកិច្ចស្រាវជ្រាវវាយតម្លៃហេតុការណ៍នោះចប់ជាមុនសិន ទើបមានអ្នកនាំពាក្យ របស់អាជ្ញាធរសមត្ថកិច្ចនោះ ជាអ្នកផ្តល់ព័ត៌មានឲ្យជាផ្លូវការ។
ពេលកន្លងមកនេះ ឯកឧត្តម ស ថេត ស្នងការនគរបាលរាជធានីភ្នំពេញ បានបញ្ជាក់ច្បាស់ថា នៅក្នុងពេលសមត្ថកិច្ចកំពុងធ្វើការស៊ើបអង្កេតរឿងព្រហ្មទណ្ឌ ឬរឿងអ្វីមួយ គឺមិនអនុញ្ញាតឲ្យថតនោះទេ ដើម្បីរក្សាការសម្ងាត់។ ការហាមឃាត់មិនឲ្យអ្នកសារព័ត៌មានថតនេះ គឺមិនមែនហាមគ្រប់កន្លែងទាំងអស់នោះទេ តែក៏ត្រូវយល់ដឹងដែរថា អ្នកសារព័ត៌មាន ក៏មិនអាចចូលថតបាននៅគ្រប់ទីកន្លែងនោះទេ។
ដោយឡែកនៅក្នុងកិច្ចប្រជុំនោះ ឯកឧត្តម រដ្ឋមន្រ្តី ខៀវ កាញារីទ្ធ ក៏បានជំរុញដល់ប្រព័ន្ធផ្សព្វផ្សាយរបស់ជាតិ ត្រូវបន្ត ពង្រឹងប្រសិទ្ធិភាព នៃការផ្សាយរបស់ខ្លួនបានកាន់តែល្អប្រសើរ ដែលមានកម្មវិធីថ្មីៗ និងកម្មវិធីអប់រំចំណេះដឹង ដែលមានការទាក់ទាញ ផ្តល់សារប្រយោជន៏ សម្រាប់សារធារណជនទូទៅ។
អត្ថបទនិងរូបភាព៖ ក្រសួងព័ត៌មាន
កែសម្រួលអត្ថបទ៖ លោក សេង ផល្លី
