លោក នាក់ ណេរ៉ុន អភិបាលរងខេត្តសៀមរាប មានប្រសាសន៏ថា ម្ចាស់ស្ថានីយប្រេងឥន្ធនៈក្នុងខេត្ត ត្រូវយល់ដឹងឲ្យច្បាស់អំពីច្បាប់ពាក់ព័ន្ធនានាទាក់ទងទៅនឹងវិស័យពាណិជ្ជកម្ម និងបទប្បញ្ញត្តិនានាពាក់ព័ន្ធនឹងកិច្ចការពារអ្នកប្រើប្រាស់នៅក្នុងអាជីវកម្មផ្គត់ផ្គង់ប្រេងឥន្ធនៈ ដែលស្ថិតក្រោមច្បាប់ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា និងច្បាប់ស្តីពី កិច្ចការពារអ្នកប្រើប្រាស់។ សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្តសៀមរាប ជាអង្គភាពស្នួលបានដើរតួនាទីយ៉ាងសំខាន់ ក្រោមកិច្ចសហការជាមួយមន្ទីរពាណិជ្ជកម្ម ដែលស្ថិតក្រោមក្រសួងពាណិជ្ជកម្មតែមួយ និងមន្ទីរ-អង្គភាពជំនាញពាក់ព័ន្ធដ៏ទៃទៀត រួមទាំងអាជ្ញាធរដែនដីផងដែរ។ លោកអភិបាលរងខេត្តមានប្រសាសន៍ដូច្នេះនៅព្រឹកថ្ងៃទី១០ ខែកុម្ភៈ ឆ្នាំ២០២១ ក្នុងវគ្គផ្សព្វផ្សាយស្តីពី ការយល់ដឹងលើទិដ្ឋភាពសំខាន់ៗនៃច្បាប់ និងបទប្បញ្ញត្តិពាក់ព័ន្ធនឹងកិច្ចការពារអ្នកប្រើប្រាស់នៅក្នុងអាជីវកម្មផ្គត់ផ្គង់ប្រេងឥន្ធនៈ។
លោកអភិបាលរងខេត្តមានប្រសាសន៍ទៀតថា ក្នុងខេត្តសៀមរាបមានស្ថានីយ និងដេប៉ូផ្គត់ផ្គង់ប្រេងឥន្ធៈរហូតដល់ជាង ៣០០កន្លែង ក្នុងស្រុកទាំង ១២ រួមទាំងក្រុងសៀមរាប។ ចំពោះវិស័យនេះគឺជាកត្តាសំខាន់ក្នុងចលនាការជម្រុញ វិស័យសេដ្ឋកិច្ច ពាណិជ្ជកម្ម និងវិស័យជាអទិភាពផ្សេងទៀត ដែលច្បាប់ត្រូវតែការពារទាំងធុរជន និងអ្នកប្រើប្រាស់ ប្រកបដោយតម្លាភាព សុចរិតភាព និងស្មើភាពគ្នា។ វិស័យផ្គត់ផ្គង់ប្រេងឥន្ធនៈ នៅក្នុងប្រទេសកម្ពុជា បានដើរតួនាទីជាចម្បងក្នុងការគាំទ្រដល់ការអភិវឌ្ឍសេដ្ឋកិច្ចជាតិ រាប់ចាប់ពីវិស័យកសិកម្ម ពាណិជ្ជកម្ម និងបរិស្ថាន ទេសចរណ៍ ដឹកជញ្ជូន នឹងវិស័យផ្សេងទៀត។
ក្នុងឱកាសនោះដែរ លោក ស៊ិន ស៊ីដេត អគ្គនាយករងនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) មានប្រសាសន៏ផងដែរថា ពាណិជ្ជករ និងអាជីវករដែលជាម្ចាស់ស្ថានីយប្រេងឥន្ធនៈ និងដេប៉ូទាំងអស់ ត្រូវតែមានកាតព្វកិច្ចអនុវត្តឲ្យបានត្រឹមត្រូវទៅតាមច្បាប់ ដែលបានចែងពាក់ព័ន្ធនឹងផលិតករ និងសេវាករដែលត្រូវបំពេញនូវកាតព្វកិច្ចរបស់ខ្លួនឲ្យបានជាក់លាក់ ដើម្បីចៀសវាងកុំឲ្យអ្នកប្រើមានការភ័ន្តច្រឡំ ឬជៀសវាងធ្វើឲ្យមានផលប៉ះពាល់ដល់ការប្រកួតប្រជែងគ្នា។ ពាណិជ្ជករ និងអាជីវករក៏ត្រូវបំពេញកាតព្វកិច្ចដូចមានចែងក្នុងច្បាប់ ចំពោះមុខទំនិញ ឬសេវាណាមួយដែលខ្លួនយកមកធ្វើពាណិជ្ជកម្មលើកដំបូងនៅព្រះរាជាណាចក្រកម្ពុជា ដោយត្រូវបញ្ចាក់ឲ្យច្បាស់ថា ផលិតផលទំនិញ ឬសេវានោះមានលក្ខណៈត្រឹមត្រូវទៅនឹងបទប្បញ្ញត្តិនៃច្បាប់។
លោកបន្តថា ចប្ចុប្បន្ន នៅទូទាំងប្រទេសយើង មានស្ថានីយប្រេងឥន្ធនៈ និងដេប៉ូប្រមាណជាង៨០០កន្លែង ក្នុងនោះមានម្ចាស់ស្ថានីយប្រេងឥន្ធនៈ និងដេប៉ូ ៤០%ប៉ុណ្ណោះ ដែលពួកគាត់បានអនុវត្តត្រឹមត្រូវតាមបទប្បញ្ញត្តិនៃច្បាប់ ដោយឡែក៦០%ទៀត គឺមិនទាន់បានអនុវត្តឲ្យបានត្រឹមត្រូវឡើយ។ លោកសង្ឃឹមថា បន្ទាប់ពីបានឆ្លងកាត់វគ្គផ្សព្វផ្សាយខ្លឹមសារនៃច្បាប់នេះ ធុរជនប្រកបមុខរបរប្រេងឥន្ធនៈទាំងអស់ នឹងគោរពអនុវត្តតាមច្បាប់បទប្បញ្ញត្តិដើម្បីជាផលប្រយោជន៍នៃសង្គម ជាតិយើងទាំងអស់គ្នា ហើយក៏ស្នើសុំស្ថាប័នមានសមត្ថកិច្ចពាក់ព័ន្ធ ពិសេសអង្គភាពនៃសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ត្រូវខិតខំពង្រឹងការងាររបស់ខ្លួន ទប់ស្កាត់ និងបង្ក្រាបឲ្យបានទាន់ពេលវេលា កុំឲ្យទំនិញមិនប្រក្រតី បញ្ហាគុណភាព និងសុវត្ថិភាព មានដាក់លក់លើទីផ្សាររបស់យើងជាដើមឲ្យមានភាពកាន់តែល្អប្រសើរឡើង៕
អត្ថបទ និងរូបភាព៖ ស៊ាន សុផាត
កែសម្រួល៖ អ៊ុន ណារាជ្យ
