នៅព្រឹកថ្ងៃទី១០ ខែកុម្ភៈ ឆ្នាំ២០២១ ឯកឧត្តម ងឿន ច័ន្ទលីនប៉ូឡែន អនុរដ្ឋលេខាធិការក្រសួងព័ត៌មាន និងជា ប្រធានសហភាពសហព័ន្ធយុវជនកម្ពុជា វិស័យព័ត៌មាន រួមនិងក្រុមការងារ បានយកអំណោយជា គ្រឿងឧបភោគបរិភោគ សម្ភារៈសិក្សា និងបរិក្ខារសុខាភិបាលមួយចំនួន របស់ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងសប្បុរសជន ប្រគល់ជូនអង្គការលើកស្ទួយប្រជាពលរដ្ឋ ហៅកាត់ថា PIO ស្ថិតនៅភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ ដើម្បីចែករំលែកក្ដីស្រឡាញ់ និងលើកកម្ពស់សុខុមាលភាពកុមារ។
អ្នកស្រី នួន ភិមាន ស្ថាបនិក និងជាអគ្គនាយិការអង្គការ POI បង្ហាញថា នាពេលកន្លងមនេះ ឯកឧត្តម ខៀវ កាញារីទ្ធ និងលោកជំទាវ តែងតែបានយកចិត្តទុកដាក់ខ្ពស់ ទៅលើការអប់រំ ក៏ដូចជាសុខភាពរបស់កុមារទាំងអស់ នៅក្នុងអង្គការ ដោយបានឧបត្ថម្ភជាស្បៀងអាហារជារៀងរាល់ខែ ដែលមានរយៈ៤ឆ្នាំមកហើយ។ តាមរយៈ ការឧបត្ថម្ភរបស់ឯកឧត្តមរដ្ឋមន្ត្រីនេះ បានជួយសម្រាលការលំបាករបស់អង្គការ ក្នុងដំណាក់កាលនៃវិបត្តិកូវីដ-១៩ ខណ:ការឧបត្ថម្ភរបស់ម្ចាស់ជំនួយ និងសប្បុរសជននានា មានការថយចុះ។
ឯកឧត្តម ងឿន ច័ន្ទលីនប៉ូឡែន បានលើកទឹកចិត្តដល់ក្មួយៗត្រូវខិតខំរៀនសូត្រ ទោះបីខ្លួនមានជីវភាពខ្វះខាតក៏ដោយ ដើម្បីក្លាយទៅជាធនធានមនុស្ស សម្រាប់ប្រទេសជាតិនាពេលអនាគត
ឯកឧត្តមក៏បានបញ្ជាក់ផងដែរថា សហភាពសហព័ន្ធយុវជនកម្ពុជា វិស័យព័ត៌មាន ជារៀងរាល់ឆ្នាំ បានចាត់ទុកថ្ងៃ១៤ កុម្ភ: ជាថ្ងៃការងារមនុស្សធម៌ និងចែករំលែកក្ដីស្រឡាញ់ ទៅដល់កុមារកម្ពុជាងាយរងគ្រោះ និងរងគ្រោះ ព្រមទាំងចូលរួមបំផុសចលនាមនុស្សធម៌ ដល់ប្រជាពលរដ្ឋទូទៅ ជាពិសេសយុវជន ឲ្យចូលរួមក្នុងការងារសង្គមនានា។
សូមជម្រាបថា អង្គការលើកស្ទួយប្រជាពលរដ្ឋ(PIO) បាននិងកំពុងបណ្តុះបណ្តាល សិស្សមានជីវភាពខ្វះខាតជាង១ពាន់នាក់ ចាប់ពីកម្រិតថ្នាក់ទី១ដល់ថ្នាក់ទី១២។ ក្នុងនោះ កុមារ ដែលទទួលបានការឧបត្ថម្ភលើការស្នាក់នៅ និងហូបចុក ពីអង្គការ មានចំនួនសរុប ៥០នាក់។
អត្ថបទ: លោក សេង ផល្លី
រូបភាព: ក្រសួងព័ត៌មាន
