នារសៀលថ្ងៃទី ១៥ ខែ កុម្ភៈ ឆ្នាំ ២០២១ មន្ទីរធម្មការ និងសាសនាខេត្តសៀមរាប បានរៀបចំកិច្ចប្រជុំបូកសរុបលទ្ធផលនៃការអនុវត្តការងារ រយៈពេលមួយឆ្នាំ ២០២០ និងទិសដៅអនុវត្តបន្តឆ្នាំ២០២១ ដែរពិធីនេះប្រព្រិត្តិទៅក្រោមអធិបតីយភាព លោកស្រី យូ សុភា អភិបាលរងខេត្តសៀមរាប និងអ្នកពាក់ព័ន្ធមកពីតំណាងសាសនាផ្សេងក្នុងខេត្តផងដែរ។
ក្នុងឱកាសនោះ លោកស្រីយូ សុភា បានណែនាំដល់មន្ទីរធម្មការ និងសាសនាខេត្តបន្តកិច្ចសហការឱ្យកាន់តែល្អប្រសើរថែមទៀត ជាមួយព្រះមេគណខេត្តទាំងពីរគណៈ និងរួមជាមួយថ្នាក់ដឹកនាំនៃឥស្លាមសាសនា គ្រឹស្ទសាសនា និងសាសនាផ្សេងៗទៀត ដើម្បីឱ្យសាសនាទាំងអស់អនុវត្តបានដោយរលូនទៅតាមគោលការណ៍របស់ខ្លួនសំដៅធ្វើយ៉ាងណាឱ្យប្រជាពលរដ្ឋមានសីលធម៌ និងធ្វើតែអំពើល្អ ជាមួយគ្នានោះមន្ទីរធម្មការខេត្តត្រូវសហការជាមួយមន្ទីរវប្បធម៌ និងវិចិត្រសល្បៈខេត្ត អាជ្ញាធរអប្សរា អាជ្ញាធរដែនដីនិងអ្នកពាក់ព័ន្ឋនានា អនុវត្តឱ្យមានប្រសិទ្ឋភាព និងចាត់វិធានការក្នុងការទប់ស្កាត់បង្ក្រាបបទល្មើសរំលោភ បំពានជីកកាយគាស់ ឈូសឆាយបុរាណដ្ឋាននិងការេជួញដូរវត្ថុបុរាណនានា និងការរៃអង្គាសតាមរយៈការយកសាសនាធ្វើជាមុខរបសរជាដើមផង និងបន្ត ពង្រឹងផ្សព្វផ្សាយច្បាប់ស្តីពីការការពារសម្បត្តិបេតិភ័ណ្ឌនិងច្បាប់លិខិតបទដ្ឋានគតិយុត្តផ្សេងៗពាក់ព័ន្ឋទៅនឹងសាសនា។
ជាមួយគ្នានោះលោកស្រី ក៏បានជំរុញដល់អាជ្ញាធរពាក់ព័ន្ធ ត្រូវផ្សព្វផ្សាយប្រជាពលរដ្ឋនៅតាមមូលដ្ឋាន នៅពេលធ្វើការជីកស្រះ ឬត្រពាំង ហើយប្រទះឃើញវត្ថុបុរាណសូមរាយការណ៍ព័ត៌មានមកកាន់មន្ទីរវប្បធម៌ ដើម្បីនាំយកវត្ថុនោះមកតម្កល់ទុកជាសម្បត្តិរួម។ ជាមួយគ្នានោះយើងត្រូវតែចូលរួមទំាងអស់គ្នាក្នុងការអភិរក្ស និងថែរក្សាឱ្យបានគង់វង្សនូវសំណង់ឬព្រះវិហារបុរាណ ដើម្បីទុកជាសម្បិត្តិវប្បធម៌បេតិភ័ណ្ឌជាតិសម្រាប់យើង និងកូនចៅយើងទាំអស់គ្នា ប៉ុន្តែបើត្រូវការជួសជុលឬកែលំអសូមសហការជាមួយមន្ទីរធម្មការនិងសាសនាខេត្ត ដើម្បីមន្ទីរដាក់សំណើរទៅកាន់មន្ទីរវប្បធមនិងវិចិត្រសីល្បៈខេត្ត។
លោកស្រីអភិបាលរងខេត្ត ក៏បានស្នើដល់មន្ទីរធម្មការ ត្រូវសហការជាមួយមន្ទីរអប់រំយុវជន និងកីឡាខេត្ត សាលាគណខេត្ត អាជ្ញាធរមូលដ្ឋានក្នុងការជួយពង្រឹងសាលាពុទ្ឋិកៈសិក្សា ដើម្បីឱ្យផ្នែកមួយនេះរឹងមាំសម្រាប់ជាគ្រឺះជួយបណ្តុះបណ្តាលដល់ធនធានមនុស្ស។ លើសពីនេះសូមឧបជ្ឈាគ្រប់អង្គមុននឹងធ្វើការបំបួសកុលបុត្រត្រូវពិនិត្យលើសំបុត្រកំណើតឬសំបុត្របញ្ជាក់កំណើត និងការបញ្ចាក់ពីអាជ្ញាធរមូលដ្ឋានដើម្បីបញ្ជាក់ពីកិរិយាមារយាទនៃបុគ្គលដែលសុំបួស។
សូមជម្រាបថា ក្នុងកិច្ចប្រជុំនោះដែរ តំណាងមកពីសាសនាផ្សេងៗដែលបានចូលរួម បានលើកឡើងពីបញ្ហាប្រឈមមួយចំនួនដែលជួបប្រទះ ក្នុងស្ថានភាពនៃការរីករាលដាលនៃជំងឺកូវីដ១៩ ដោយសារមានបងប្អូនជាសាសនិកសាសនាមួយចំនួនតូច បានអនុវត្តផ្ទុយពីសេចក្តីណែនាំរបស់រាជរដ្ឋាភិបាល ក៏ដូចសេចក្តីណែនាំរបស់ក្រសួងធម្មការ និងសាសនា។
ក្នុងបញ្ហាការបង្កើតវត្តអារាម ខុសច្បាប់នៅតាមទួលប្រាសាទ និងក្នុងតំបន់ឧទ្យានជាតិ និងការបួសមិនសូវបានយូរ និងខ្វះចំណេះដឹង សាងសង់សំណង់សាសនាមួយចំនួន មិនគោរពតាមគោលការណ៍ណែនាំ និងបញ្ហាជាច្រើនទៀត៕
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
