សួនផ្កាកូស្មូដែលស្ថិតនៅលើរង្វង់មូលស្រុកបន្ទាយស្រី ក្នុងខេត្តសៀមរាប កំពុងទទួលបានការចាប់អារម្មណ៍យ៉ាងច្រើនពីសំណាក់ភ្ញៀវទេសចរណ៍ជាតិ នៅក្នុងខេត្តសៀមរាប និងតាមបណ្ដាខេត្តផ្សេងៗ ដែលបានធ្វើដំណើរឆ្លងកាត់រង្វង់មូលនេះ ដើម្បីទៅទស្សនារមណីយដ្ឋានភ្នំគូលែន , ទៅកាន់ស្រុកអន្លង់វែង និងប្រាសាទព្រះវិហារ ។
ក្នុងឱកាសនៃការចូលទស្សនាកម្សាន្តសួនផ្កានេះ លោកស្រី អន ហុង ជាប្រជាពលរដ្ឋរស់នៅក្នុងសង្កាត់គោកចក ក្រុងសៀមរាប បានសម្ដែងនូវការពេញចិត្តចំពោះភាពស្រស់ស្អាតរបស់ផ្កានៅនឹងរង្វង់មូល ពិសេសបានសម្ដែងនូវការកោតសរសើរចំពោះភាពឆ្លាតវៃដែលមានគំនិតរៀបចំដាំផ្កាក្នុងតំបន់នេះ និងសំណូមពរដល់អ្នកដែលមកចូលកម្សាន្តសូមជួយថែរក្សាដើមផ្កាទាំងអស់នេះ រួមទាំងបរិស្ថានផងដែរ ។
ពាក់ព័ន្ធទៅនឹងសួនផ្កានៅរង្វង់មូលនេះដែរ លោក ឃឹម ហ្វីណង់ អភិបាលស្រុកបន្ទាស្រី បានមានប្រសាសន៍ថា ការរៀបចំជាសួនផ្កានៅទីនេះ ក្នុងគោលបំណងលើកកម្ពស់សោភ័ណភាពរបស់ស្រុកផង និង លើកកម្ពស់វិស័យទេសចរណ៍ក្នុងស្រុកផង ព្រោះថារង្វង់មូលនេះ ក្រោយពីធ្វើរួចមក ត្រូវបានគេទុកចោល មិនបានរៀបចំអភិវឌ្ឍន៍អ្វីនោះទេ ដែលធ្វើឲ្យទីនេះបានក្លាយទៅជាកន្លែងចោលសំរាម និង កន្លែងចងគោទុកឲ្យស៊ីស្មៅ ។
លោកអភិបាលស្រុកបន្ទាយស្រី បានបញ្ជាក់បន្ថែមថា ក្នុងកំឡុងខែធ្នូ ឆ្នាំ២០២០ អាជ្ញាធរស្រុកបានចាប់ផ្ដើមធ្វើការរៀបចំកែលម្អរង្វង់មូលនេះ ឲ្យក្លាយជាសួនផ្ការង់ចាំភ្ញៀវទេសចរ ដោយព្រោះគ្រាប់ផ្កាកូស្មូ ដែលជាប្រភេទផ្កានាំចូលពីក្រៅប្រទេស វាមានអាយុ២ខែសម្រាប់ការលូតលាស់បញ្ចេញផ្កាពណ៌ចម្រុះ និងអាយុកាលនៃការបញ្ចេញសម្រស់របស់វា មានរយៈពេល១ខែ ដែលនៅខែកុម្ភៈ ឆ្នាំ២០២១ ផ្កាកូស្មូនេះ បានចាប់ផ្ដើមបញ្ចេញផ្កាពណ៌ចម្រុះ ដូច្នេះ ពេលនេះ មានភ្ញៀវទេសចរណ៍បានទៅទស្សនា ដើម្បីផ្ដិតយករូបភាពស្អាតៗនោះប្រមាណជាង១ម៉ឺននាក់ហើយ ។
លោកបន្តទៀតថា ជាគោលដៅបន្ត រដ្ឋបាលស្រុកនឹងព្យាយាមស្វែងរកពូជផ្កានៅក្នុងតំបន់យកមកដាំ ទៅតាមរដូវរបស់ប្រភេទផ្កា ដូចជា ផ្កាផ្គរលាន់ជាដើម ដូច្នេះក្នុងឱកាសនេះ សូមសំណូមពរដល់ពលរដ្ឋ ក៏ដូចជាភ្ញៀវជាតិ អន្តរជាតិ ដែលបានទៅទស្សនានៅទីនោះ ធ្វើយ៉ាងណា ជួយថែរក្សាអនាម័យ បរិស្ថាន ជាពិសេស កុំដើរជាន់ផ្កាដើម្បីថតយករូបភាពស្អាតៗតែម្នាក់ ព្រោះសួនផ្កានេះ គឺជាសួនផ្កាសាធារណៈ ដែលយើងទាំងអស់ជាពលរដ្ឋខ្មែរ ត្រូវតែចូលរួមថែរក្សាទាំងអស់គ្នាផងដែរ ។
គួររំលឹកថា សួនផ្កានៅរង្វង់ស្រុកបន្ទាយស្រី ស្ថិតនៅលើចំណុចប្រសព្វនៃផ្លូវជាតិលេខ៦៧ សៀមរាប-អន្លង់វែង ជាមួយនឹងផ្លូវបំបែកចូលទៅកាន់រមណីដ្ឋានធម្មជាតិភ្នំគូលែន ដែលមានផ្ទៃក្រឡាប្រហែល២ហិកតាកន្លះ ជារង្វង់មូលធំជាងគេលំដាប់ទី២នៅកម្ពុជា បន្ទាប់ពីរង្វង់មូលធំជាងគេលំដាប់ទី១នៅខេត្តត្បូងឃ្មុំ ៕
អត្ថបទ ៖ លោក ទិត្យ សំបូរ
រូបថត ៖ លោក ជា ស្រស់ និង លោក ឈិត សាវី
កែសម្រួលអត្ថបទ ៖ លោក លីវ សាន្ត
