នៅថ្ងៃទី១៨ ខែកុម្ភៈ ឆ្នាំ២០២១ ឯកឧត្តម ប៉ុល សុគុណ អគ្គនាយករងនៃអគ្គនាយកដ្ឋានសម្ភារៈបច្ចេកទេសក្រសួងការពារជាតិ និងជាក្រុមការងាររាជរដ្ឋាភិបាលចុះជួយឃុំកំពង់ក្តី ស្រុកជីក្រែង រួមជាមួយប្រតិភូអមដំណើរ និងលោក ពៅ ប៊ុនធឿន អភិបាលស្រុកជីក្រែង ព្រះបរវរវិជ្ជា ទេព ភឿន ព្រះវិន័យធរគណខេត្ត និងជាព្រះគ្រូសារធម្មបាល អនុគណស្រុកជីក្រែង ខេត្តសៀមរាប រួមជាមួយអាជ្ញាធរដែនដី លោកយាយលោកតា និងប្រជាពលរដ្ឋក្នុងមូលដ្ឋានជាច្រើនរូបទៀត បាននិមន្ត និងអញ្ជើញក្រុងពាលី និងបញ្ចុះបឋមសិលាសាងសង់ខ្លោងទ្វារវត្តបុព្វទិសារាម ហៅវត្តកំពង់ក្តី ស្ថិតក្នុងភូមិកំពង់ក្តី ឃុំកំពង់ក្តី ស្រុកជីក្រែង ខេត្តសៀមរាប។ ខ្លោងទ្វារនេះដែរជាអំណោយដ៍ថ្លៃថ្លាសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយខេត្តសៀមរាប ផ្តល់មកតាមរយៈក្រុមការងាររាជរដ្ឋាភិបាលចុះជួយមូលដ្ឋានឃុំកំពង់ក្តី ដែលនឹងប្រើរយៈពេល៣ខែក្នុងការសាងសង់ និងចំណាយថវិកាប្រមាណជាង ៤ម៉ឺនដុល្លារអាមេរិក។
ឯកឧត្តម ប៉ុល សុគុណ មានប្រសាសន៍ថា កម្ពុជាក្រោមការនាំការដឹកនាំដ៏ឈ្លាសវៃ និងក្រោមគោលនយោបាយឈ្នះឈ្នះ របស់សម្តេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យមាតុប្រទេសយើង ទទួលបានសុខសន្តិភាព ស្ថេរភាពពេញលេញ និងអភិវឌ្ឍរីកចម្រើនលើគ្រប់វិស័យ ហេដ្ឋារចនាសម្ព័ន្ធរូបវន្ត ទាំងផ្នែកអាណាចក្រ និងពុទ្ធចក្រដូចជា ផ្លូវថ្នល់ ស្ពាន ទំនប់ទឹក ប្រឡាយ សាលារៀន មន្ទីរពេទ្យ ស្រះទឹក អណ្តូងទឹកព្រះវិហារ ឧបដ្ឋានសាលា សេនាសនៈ និងពិធីសាសនា។ ការងារទាំងអស់នេះវាបានស្តារ និងអភិវឌ្ឍន៍ឡើងវិញយ៉ាងឆាប់រហ័សនឹកស្មានពុំដល់ ពិសេសព្រះពុទ្ធសាសនាត្រូវបានកំណត់ក្នុងរដ្ឋធម្មនុញ្ញថាជា«សាសនារបស់រដ្ឋ»។
ឯកឧត្តមបន្ថែមថា ការសម្រេចសាងសង់ខ្លោងទ្វារថ្មីនេះ គឺឆ្លើយតបទៅនឹងការសុំបិណ្ឌបាត្រពីព្រះគ្រូអនុគណស្រុកជីក្រែង និងប្រគេនជូនទៅតាមតម្រូវការចាំបាច់ជាក់ស្តែង។ មុននឹងសម្រេចសង់ខ្លោងទ្វារថ្មីនេះគឺក្រុមការងារ និងក្រុមជាងបានសិក្សារួចហើយ គឺថាមិនអាចគាស់ក្លោងទ្វារចាស់មកដាក់នៅទីតាំងថ្មីបានទេ ដោយហេតុថាផ្លូវនៅខាងមុខទីតាំងខ្លោងទ្វារចាស់បច្ចុប្បន្នត្រូវបាន សាងសង់បង្វែរមកទិសខាងត្បូងវិញជាហេតុនាំឱ្យក្លោងទ្វារចាស់របស់វត្តដែលបានកសាងកាលពីឆ្នាំ២០០១ ត្រូវស្ថិតនៅម្ខាងផ្លូវ មិនអាចឱ្យមហាជនដឹងបានថាមានវត្តនៅក្បែរៗនេះទេ និងម្យ៉ាងទៀត វត្តនេះមានទីតាំងចូលជ្រៅទៅក្នុងទៀតផង។
អត្ថបទ និង រូបភាព៖ យូ វង្ស
កែសម្រួល៖ អ៊ុន ណារាជ្យ
