អាជ្ញាធរជាតិអប្សរានៅព្រឹកថ្ងៃទី១៩ ខែកុម្ភៈ ឆ្នាំ២០២១ បានទទួលបានអណ្ដូងទឹកដើរដោយថាមពលពន្លឺព្រះអាទិត្យមួយគ្រឿង ពីក្រុមហ៊ុនកូកាកូឡា ដើម្បីជួយដល់ការស្រោចស្រពថ្នាលបណ្ដុះកូនឈើនៅភូមិលាងដៃ ដែលជាផ្នែកមួយចូលរួមអភិវឌ្ឍន៍ការងារបរិស្ថាន ក្នុងតំបន់រមណីយដ្ឋានអង្គរ។ ក្រៅពីកិច្ចការនេះទៀតក្រុមហ៊ុនកូកាកូឡាក៏មានគម្រោងថ្មីៗទៀតជាមួយអាជ្ញាធរជាតិអប្សរា ក្នុងន័យរួមចំណែកអភិវឌ្ឍន៍ការងារបរិស្ថានក្នុងតំបន់រមណីយដ្ឋានអង្គរ ឱ្យកាន់តែល្អប្រសើរជាផ្នែកមួយជួយអភិវឌ្ឍន៍សង្គមជាតិ។
លោក ឡុង កុសល អ្នកនាំពាក្យអាជ្ញាធរជាតិអប្សរា បានឲ្យដឹងថា ក្រុមការងារនៃអាជ្ញាធរជាតិអប្សរាក្រៅពីកិច្ចការអភិរក្សប្រាសាទ ក្នុងនោះការងារបរិស្ថាន គឺជាកិច្ចការស្នូលមួយដ៏សំខាន់របស់អាជ្ញាធរជាតិអប្សរា ដូច្នេះការស្ដារឡើងវិញនូវគម្របព្រៃឈើ គឺជាកិច្ចការមួយដ៏ចាំបាច់ផងដែរ។ ជាមួយគ្នានោះអណ្ដូងទឹកដែលផ្តល់ជូនដោយក្រុមហ៊ុនកូកាកូឡានៅពេលនេះ គឺជានិមិត្តរូបមួយនៃកិច្ចសហប្រតិបត្តិការួមគ្នា ធ្វើយ៉ាងណាចូលរួមកាត់បន្ថយការបំពុលបរិស្ថានមួយផ្នែកផងដែរ ព្រោះកន្លងមកតំបន់នេះមិនមានអគ្គិសនីចូលដល់ហើយត្រូវប្រើម៉ាស៊ីនភ្លើងបូមទឹកសម្រាប់ស្រោចកូនឈើ។ លោកសង្ឃឹមថាអណ្តូងទឹកដែរទទួលបាននាពេលនេះ វានឹងរួមចំណែកលើកកម្ពស់សោភ័ណភាព បរិស្ថាន និងអនាម័យក្នុងតំបន់រមណីយដ្ឋានអង្គរឱ្យកាន់តែមានភាពស្រស់ស្អាត និងទាក់ទាញដើម្បីបម្រើអារម្មណ៍ភ្ញៀវទេសចរ ឱ្យជក់ចិត្តមកលើតំបន់បេតិកភណ្ឌពិភពលោកថែមមួយកម្រិតទៀត។
បើតាមលោក រស់ សោភា នាយកផ្នែកច្បាប់ និងកិច្ចការសាធារណៈប្រចាំប្រទេសនៃក្រុមហ៊ុនកូកាកូឡា បានឲ្យដឹងថា ក្រុមហ៊ុនពិតជាមានសេចក្ដីរីករាយណាស់ដែលបានធ្វើការជាមួយអាជ្ញាធរជាតិអប្សរា ក្នុងបំណងអភិវឌ្ឍន៍ការងារបរិស្ថានក្នុងតំបន់នេះ ឱ្យកាន់តែមានភាពបៃតង និងទាក់ទាញភ្ញៀវទេសចរថែមមួយកម្រិតទៀត។ ចំពោះអណ្ដូងទឹកដើរដោយថាមពលពន្លឺព្រះអាទិត្យនេះ គឺជាបច្ចេកវិទ្យាចុងក្រោយ ហើយដែលអាចបូមទឹកដោយស្វ័យប្រវត្តិ ងាយស្រួលសម្រាប់ស្រោចស្រពកូនឈើ។ អណ្ដូងទឹកនេះនឹងរួមចំណែកធ្វើឱ្យតំបន់អង្គរមានភាពបៃតង ហើយស្របតាមគោលនយោបាយរបស់រាជរដ្ឋាភិបាលក្នុ ងការទាក់ទាញភ្ញៀវទេសចរចូលមកកម្សាន្តក្នុងតំបន់បេតិកភណ្ឌបូកនិងភាពបៃតងផងដែរ។
លោក រស់ សោភា បន្ថែមថាក្រុមហ៊ុនកូកាកូឡាជាមួយអាជ្ញាធរជាតិអប្សរានឹងមានកិច្ចងហការបន្តទៀតទៅលើសកម្មភាពមួយចំនួន ដូចជាគម្រោងបែងចែកសំរាម ការគ្រប់គ្រងសំរាមឱ្យបានត្រឹមត្រូវដើម្បីយកទៅកែច្នៃឡើងវិញ និងគម្រោងពង្រឹងគុណភាពម្ហូបអាហារឱ្យបានស្ដង់ដា ផ្គត់ផ្គង់ដល់ភ្ញៀវទេសចរ ក្នុងន័យឱ្យភ្ញៀវទេសចរមានទំនុកចិត្តលើម្ហូបអាហារទាំងនោះ៕
អត្ថបទ និង រូបភាព៖ ឈិត សាវី
កែសម្រួល៖ អ៊ុន ណារាជ្យ
