នៅព្រឹក ថ្ងៃទី២០ ខែកុម្ភៈ ឆ្នាំ២០២១ក្រុមការងារចម្រុះដឹកនាំដោយ លោក លី សំរិទ្ឋ អភិបាលរងខេត្ត និងេះជាអ្ននាំពាក្យសាលាខេត្តសៀមរាប អនុវត្តតាមផែនការណែនាំរបស់ ឯកឧត្តម អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត និងមានការចូលរួមពីតំណាងអយ្យការអមសាលាដំបូងខេត្ត កម្លាំងគណៈ-បញ្ជាការឯកភាពរដ្ឋបាលខេត្ត អភិបាលក្រុងសៀមរាប អាជ្ញាធរមូលដ្ឋាន ព្រមទាំងតំណាងមន្ទីរ អង្គភាពជំនាញពាក់ព័ន្ធ បានចុះអនុវត្តវិធានការរុះរើសំណង់ដែលគ្មានច្បាប់នៅសេសសល់ចំនួន ១០កន្លែង ស្មើនឹង ១១គ្រួសារ ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប។សកម្មភាពប្រតិបត្តិការ បានចាប់ផ្តើមអនុវត្តនៅវេលាម៉ោង ៩៖០០នាទីព្រឹក ដោយប្រើប្រាស់គ្រឿងចក្រ រថយន្ត និងមធ្យោបាយផ្សេងៗទៀត។ នៅក្នុងព្រឹត្តិការណ៍នេះ បងប្អូនដែលមិនស្ម័គ្រចិត្ត បានចេញធ្វើសកម្មភាពរារាំង មិនឲ្យក្រុមប្រតិបត្តិការអាចអនុវត្តការងាររបស់ខ្លួនបាន។ ក្នុងចំណោមនោះ គេកត់សម្គាល់ឃើញថា ក្រុមនេះដឹកនាំដោយមនុស្ស ២នាក់(ស្រី ០១នាក់) ហើយបាននាំខ្លួនទៅកាន់ស្នងការដ្ឋាន នគរបាលខេត្ត ដើម្បីចាត់ចែងតាមច្បាប់ និងនីតិវិធី ដើម្បីបញ្ចៀសហានិភ័យផ្សេងៗ។
លោក លី សំរិទ្ឋ អភិបាលរងខេត្តនិងជាអ្នកនាំពាក្យសាលាខេត្តសៀមរាប មានប្រសាសន៍ថា៖បន្ទាប់ពីបានទទួលគោលការណ៍អនុញ្ញាតពីរាជរដ្ឋាភិបាល និងការណែនាំរបស់គណៈកម្មការអន្តរក្រសួង លើការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ ខ្សែ និងគម្រោងកែលម្អដងស្ទឹងសៀមរាប នៅក្នុងក្រុងសៀមរាប ខេត្តសៀមរាប រដ្ឋបាលខេត្តសៀមរាប បានចេញសេចក្តីជូនដំណឹងជាបន្តបន្ទាប់ដោយអំពាវនាវឱ្យបងប្អូនប្រជាពលរដ្ឋ ដែលមានសំណង់ការ្យផ្សេងៗនៅលើដីផ្លូវ ដីចំណីផ្លូវ អូរ ប្រឡាយ និងដីចំណីស្ទឹងសៀមរាប រហូតមកដល់ពេលនេះ បងប្អូនប្រជាពលរដ្ឋ បានចូលរួមសហការអនុវត្ត និងរុះរើដោយស្ម័គ្រចិត្តស្ទើរអស់ទាំងស្រុង។ ដោយឡែក ក៏នៅមានបងប្អូនប្រជាពលរដ្ឋមួយចំនួន ពុំព្រមរុះរើសំណង់របស់ខ្លួន ដោយមើលបំណំាគ្នា ស្នើសុំទាមទារឱ្យអាជ្ញាធរខេត្ត អនុគ្រោះ និងផ្តល់សំណងដែលលើសពីការសម្រេចរបស់ថ្នាក់ដឹកនាំ។
អ្នកនាំពាក្យរូបនេះបានបញ្ជាក់ថា៖ចំពោះប្រជាពលរដ្ឋដែលរស់នៅលើដងស្ទឹងសៀមរាប ចាប់ពីស្ពាននាគ ដល់ស្ពានអង្គរ រាជរដ្ឋាភិបាលសម្រេចជាគោលការណ៍ឱ្យរៀបចំដោះស្រាយគោលនយោបាយជាដី ស្ថិតនៅតំបន់អភិវឌ្ឍន៍ធម្មជាតិរុនតាឯក នៃភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប។ ប្រជាពលរដ្ឋ ដែលត្រូវដោះស្រាយគោលនយោបាយមានចំនួនសរុប ៤៣១ គ្រួសារ ក្នុងនោះប្រជាពលរដ្ឋ បានយល់ព្រម និងចាប់ឆ្នោតទទួលយកដី មានចំនួន ៤២១ គ្រួសារ (០២គ្រួសារមិនទាន់បានចាប់ឆ្នោត)។ ក្នុងនោះ រដ្ឋបាលខេត្ត បានរៀបចំក្រុមការងារ ជួយសម្រួលដល់ការរុះរើ និងផ្លាស់ប្តូរទីតាំងថ្មីជូនបងប្អូនប្រជាពលរដ្ឋផងដែរ។ គិតត្រឹមថ្ងៃទី១៦ ខែកុម្ភៈ ឆ្នាំ២០២១ រដ្ឋបាលខេត្ត បានធ្វើការសម្របសម្រួលដល់ការរុះរើសំណង់ និងសំណង់ការ្យផ្សេងៗ របស់ប្រជាពលរដ្ឋ ដែលទទួលយកដីនៅទីតាំងថ្មី ស្ថិតនៅតំបន់អភិវឌ្ឍន៍ធម្មជាតិរុនតាឯក នៃភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប ស្ទើរតែ ១០០% មានតែប្រជាពលរដ្ឋ ចំនួន ១១ គ្រួសារ ស្មើនឹង ១០ ខ្នងផ្ទះ ធ្វើការតវ៉ាមិនព្រមទទួលយកការដោះស្រាយគោលនយោបាយដីធ្លីរបស់រដ្ឋ។ ករណីនេះ រដ្ឋបាលខេត្ត បានជូនដំណឹង និងធ្វើការអញ្ជើញពួកគាត់ ដើម្បីធ្វើសម្របសម្រួល និងធ្វើការរុះរើដោយខ្លួនឯង ប៉ុន្តែពួកគាត់នៅតែមិនព្រមទទួលយកការដោះស្រាយគោលនយោបាយឡើយ។
