ប្រជាពលរដ្ឋចំនួន ៥គ្រួសារចុងក្រោយរស់នៅលើដីចំណីដងស្ទឹងសៀមរាប ស្ថិតក្នុងភូមិវត្តស្វាយ សង្កាត់សាលាកំរើក ក្រុងសៀមរាប ស្ម័គ្រចិត្តទទួលយកការរុះរើទាំងអស់គ្នា ប៉ុន្តែស្នើសុំពេលរុះរើ, ការជួយដឹកជញ្ជូន, ការជួយផ្តល់ថវិកាក្នុងការសាងសង់ និងសុំឱ្យអាជ្ញាធរបង្ហាញទីតាំងដែលត្រូវទទួលបានគោលនយោបាយ ដើម្បីពួកគាត់បានទៅរស់នៅ។
ក្នុងកិច្ចប្រតិបត្តិការនេះក្រុមការងារចំពោះកិច្ចរបស់រដ្ឋបាលខេត្ត បានអនុវត្តសេចក្តីប្រកាសព័ត៌មានរបស់ខ្លួនដោយរលូនដោមិនមានការតវ៉ា ឬសកម្មភាពប្រទុស្តរាយអ្វីឡើយ។ ក្នុងកិច្ចប្រតិបត្តិការ នាព្រឹកថ្ងៃទី២២ ខែកុម្ភ: ឆ្នាំ២០២១នេះ ក្រោមការដឹកនាំ និងសម្របសម្រួលដោយលោកសុខ ថុល នាយករដ្ឋបាលសាលាខេត្តសៀមរាប, លោកថេង សំណាង អយ្យការអមសាលាដំបូងខេត្តសៀមរាប អភិបាលរងក្រុងសៀមរាប ស្នងការរងនគរបាលខេត្ត មន្ត្រីជំនាញពាក់ព័ន្ធរបស់សាលាខេត្ត មន្ទីរ អង្គភាព កងកម្លាំងប្រដាប់អាវុធគ្រប់ថ្នាក់ និងអាជ្ញាធរគ្រប់ថ្នាក់ នៃក្រុងសៀមរាប បានចូលរួម។
ក្នុងឱកាសនោះ លោកសុខ ថុល នាយករដ្ឋបាលសាលាខេត្ត បានអញ្ជើញក្រុមប្រជាពលរដ្ឋទាំង ៥គ្រួសារមកជួបជុំ ដើម្បីបង្ហាញអំពីគោលបំណងរបស់ ក្រុមការងារចម្រុះនេះ ដែលចុះប្រតិបត្តិការអនុវត្តសេចក្តីជូនដំណឹងចាប់តាំងពីខែតុលា ឆ្នាំ២០២០មក ស្តីពីការរុះរើសំណង់ដែលគ្មានច្បាប់ ដែលនៅសេសសល់ចំនួន៥គ្រួសារនេះ ឱ្យទៅរស់នៅទីតាំងថ្មីដែលជាកន្លែងរដ្ឋបាលខេត្តសៀមរាប បានរៀបចំសម្រាប់គោលនយោបាយដោះដូរជូនពួកគាត់ គឺស្ថិតនៅភូមិវាល សង្កាត់សំបួរ ក្រុងសៀមរាប ខេត្តសៀមរាប។
លោកសុខ ថុល បន្តថា នេះជាផែនការដែលត្រូវអនុវត្តចុងក្រោយរបស់អាជ្ញាធរខេត្តសម្រេចជាចុងក្រោយហើយដែលត្រូវសម្រេចឲ្យបាន ដើម្បីយកទីតាំងដីចំណីស្ទឹងនេះ ធ្វើការកែលម្អដងស្ទឹងយើងផង និងដើម្បីអភិវឌ្ឍន៍ទីក្រុងឱ្យមានសោភ័ណភាពសមស្របនឹងទីក្រុងទេសចរណ៍ទំនើបផង។ ប្រជាពលរដ្ឋទាំង៥គ្រួសារ ដែលរងផលប៉ះពាល់បានមានប្រសាសន៍ប្រហាក់ប្រហែលគ្នាថា ពួកគាត់មិនជំទាស់ចំពោះអាជ្ញាធរខេត្ត និងរាជរដ្ឋាភិបាលលើការអភិវឌ្ឍន៍នេះទេ ប៉ុន្តែពួកគាត់ស្នើសុំពេលវេលាសមរម្យក្នុងការរុះរើ, ការជួយដឹកជញ្ជូន, ការជួយផ្តល់ថវិកាក្នុងការសាងសង់ និងសុំឱ្យអាជ្ញាធរបង្ហាញទីតាំងដែលត្រូវទទួលបានគោលនយោបាយ ដើម្បីពួកគាត់បានទៅរស់នៅផង។
សូមជម្រាបជូនថា ប្រជាពលរដ្ឋទាំង ៥គ្រួសារនេះស្ថិតនៅក្នុងចំណោមប្រជាពលរដ្ឋប្រមាណ ៦៧៤គ្រួសារ ដែលបានរស់នៅលើដីចំណីដងស្ទឹងសៀមរាប ដែលអញ្ជើញឱ្យពួកគាត់ទៅទីតាំងថ្មី ដែលរដ្ឋបាលខេត្តបានរៀបចំសម្រាប់គោលនយោបាយដោះដូរជូនពួកគាត់ គឺស្ថិតនៅភូមិវាល សង្កាត់សំបួរ ក្រុងសៀមរាប។ ដែលគម្រោងទីមួយនេះ រៀបចំឡើងកាលពីឆ្នាំ២០១១ ហើយអនុវត្តនៅឆ្នាំ២០១២ មានអ្នកស្ម័គ្រចិត្តចាកចេញចំនួន ៦៦៩គ្រួសារ នៅសល់ ៥គ្រួសារ ដែលត្រូវអនុវត្តបញ្ចប់នាពេលនេះ។ ក្នុងគម្រោងគោលនយោបាយដោះដូរលើកទី១នេះដែរ គឺទទួលបានគោលនយោបាយដីទំហំ ៧ម៉ែត្រគុណនឹង ១៥ម៉ែត្រ និងថវិកាមួយចំនួនទៅតាមទំហំដីតូចឬធំ ចាប់ពី៥០០ដុល្លាឡើងទៅ ប៉ុន្តែគម្រោងទីមួយនោះត្រូវបានបញ្ចប់ហើយតាំងពីឆ្នាំ២០១៤មកម្ល៉េះ។
គួរបញ្ជាក់ដែរថា មុននឹងឈានមកដល់ប្រតិបត្តិការនេះ អាជ្ញាធរខេត្តបានចេញចេញសេចក្តីប្រកាសព័ត៌មានជាបន្តបន្ទាប់ ស្តីពីការរុះរើសំណង់ផលប៉ះពាល់នៃគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែ និងគម្រោងកែលម្អដងស្ទឹងសៀមរាប នៅក្នុងក្រុងសៀមរាប ខេត្តសៀមរាប ដើម្បីអភិវឌ្ឍន៍ទីក្រុងទេសចរណ៍ប្រវត្តិសាស្រ្តមួយនេះប្រកបដោយសោភ័ណភាពប្រជាប្រិយភាព ក្នុងការទាក់ទាញភ្ញៀវទេសចរមកទស្សនាឱ្យបានជាអតិបរិមាក្រោយពីបញ្ចប់វិបត្តិជំងឺកូវីដ-១៩៕
អត្ថបទ និងរូបភាព៖ លោក ខេង ឧត្តម និងធន់ ពូថេ
កែសម្រួល៖លីវ សុខុន
