ថ្លែងក្នុងពិធីសម្ពោធដាក់ឱ្យប្រើប្រាស់ឱ្យដំណើរការ ជាផ្លូវការសាលារៀនប៊ីស៊ីខេត្តសៀមរាប ដែលមានទីតាំងក្នុងស្ថិតភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀរាប នាព្រឹកថ្ងៃទី២២ ខែកុម្ភៈ ឆ្នាំ២០២១នេះ លោក ពៅ ពិសិដ្ឋ អភិបាលរងខេត្ត មានប្រសាសន៏ថា ការកសាង និងអភិវឌ្ឍប្រទេសជាតិ ចាំបាច់ត្រូវមានធនធានមនុស្ស និងបែបផែនផលិតកម្មដែលទំនើបតាមកាលៈទេសៈ និងការរីកចំរើននៃពិភពលោក។ ការងារជាគន្លឹះមួយយ៉ាងសំខាន់បំផុតក្នុងការកសាងធនធានមនុស្សដែលសង្គមទាំងមូលត្រូវតែចូលរួមវិនិ-យោគអោយបានខ្លាំងក្លា ដោយប្រើប្រាស់ពេលវេលាយូរអង្វែងការអត់ធ្មត់និងការទទួលខុសត្រូវប្រកបដោយការប្រុងប្រយ័ត្នបំផុត។
លោក ពៅ ពិសិដ្ឋ មានប្រសាសន៏ទៀតថា ជំនាញនិងចំណេះដឹងទូទៅវាជាកត្តាសំខាន់ខ្លាំងណាស់សម្រាប់ពួកគេនឹងក្លាយជាទំពាំងស្នងឫស្សី ជាអ្នកបន្តវេនរបស់សង្គមជាតិយើងទាំងមូល សម្រាប់កសាងប្រទេសជាតិក្នុងពេលខាងមុខ ។ ប៉ុន្តែកិច្ចការនេះនឹងមិនអាចឆ្ពោះទៅមុខបាននោះទេដរាបណានៅមានសង្គ្រាមកើតឡើង តួយ៉ាងក្នុងរបបខ្មែរក្រហម ប៉ុលពត ដែលគ្មានទេការអប់រំ គ្មានទេសាលារៀន មានតែការធ្វើទារុណកម្ម និងការកាប់សម្លាប់ជីវិតប៉ុន្តែក្រោមដំបូលគោលនយោបាយ ឈ្នះ ឈ្នះ របស់ប្រមុខរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននាំមកនូវសន្តិភាព ស្ថិរភាព សន្តិសុខ និងការអភិវឌ្ឍលើគ្រប់វិស័យពេញផ្ទៃប្រទេស ។
បើតាម លោក សុខ សំអឿន នាយកសាលារៀនប៊ីស៊ី បានឲ្យដឹងថា សាលាប៊ីស៊ី ជាគ្រឹះស្ថានឯកជនមួយត្រូវបានបង្កើតឡើង ក្នុងគោបំណងចូលរួមបណ្តុះបណ្តាលសិស្សានុសិស្ស និងអ្នកសិក្សាទាំងឡាយឱ្យទទួលបាននូវសមត្ថភាពពេញលេញ ដើម្បីក្លាយជាបុគ្គលដ៏ជោគជ័យប្រកបដោយ គុណភាព សមត្ថភាព សីលធម៌ ចំណេះដឹង និងភាពទទួលខុសត្រូវខ្ពស់ ហើយក្លាយខ្លួនជាពលរដ្ឋសកលដែលមានឥរិយាបថ ស្រលាញ់ចូលចិត្តការសិក្សា និងអភិវឌ្ឍន៍ខ្លួនពេញមួយជីវិត។
លោកបន្តថា សម្រាប់សាលាប៊ីស៊ី បានផ្តល់ជូននូវកម្មវិធីសិក្សាគោលចំនួន៣ធំៗ៖ ១.កម្មវិធីចំណេះទូទៅខ្មែរ (មត្តេយ្យសិក្សា – មធ្យមសិក្សាទុតិយភូមិ) ២.កម្មវិធីអង់គ្លេសទូទៅ (មត្តេយ្យសិក្សា-កម្រិត១២) ៣. កម្មវិធីភាសាចិនទូទៅ (មត្តេយ្យសិក្សា- កម្រិត១២) និង ភាសាថៃ បារាំងក្រៅម៉ោង និងបណ្តុះបណ្តាលកុំព្យូទ័រវគ្គខ្លីគ្រប់ជំនាញ។
អត្ថបទ និង រូបភាព៖ ស៊ាន សុផាត
កែសម្រួល៖ អ៊ុន ណារាជ្យ
