ព្រឹកថ្ងៃទី១៩ ខែកុម្ភៈ ឆ្នាំ២០២១ លោកជំទាវ ទាង អេង ទៀ សីហា អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប រួមជាមួយគណៈប្រតិភូគណៈកម្មាធិការសាខាកាកបាទក្រហមកម្ពុជាខេត្ត និងសហការីបានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ផ្ដល់ជូនមាតា និងទារកដែលទើបនឹងសម្រាលកូនតូចចំនួន៨០នាក់ មកពីបណ្តាឃុំក្នុងស្រុកប្រាសាទបាគង ដែរពិធីនេះប្រារព្ធឡើងនៅមណ្ឌលសុខភាពបាគង ស្រុកប្រាសាទបាគង ខេត្តសៀមរាប។ ពិធីនេះធ្វើឡើងក្នុងគោលបំណងលើកកម្ពស់ និងយកចិត្តទុកដាក់ចំពោះសុខភាពមាតា ទារក និងកុមារ និងដើមី្បគាំទ្រសម្តេចគតិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃផែន ការសកម្មភាពរួមអគ្គលេខាធិការអង្គការសហប្រជាជាតិដើមី្បសុខភាពស្ត្រី និងកុមារក្នុងឱកាសអបអរសាទរទិវាជាតិសុខភាពមាតា ទារក និងកុមារ ឆ្នាំ២០២១។
មានប្រសាសន៍នាឱកាសនោះលោកជំទាវ ទាង អេង ទៀ សីហា បានពាំនាំនូវប្រសាសន៍ផ្តាំផ្ញើ សួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចឯកឧត្តម ទៀ សីហា អភិបាខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប ជូនដល់មាតាៗគ្រប់រូប។ ជាមួយគ្នានោះលោកជំទាវ ក៏បានណែនាំដល់ស្ត្រីមានគភ៌ទាំងអស់ត្រូវទៅពិនិត្យសុខភាព ពិគ្រោះយោបល់ជាមួយគ្រូពេទ្យ ឬឆ្មបជំនាញនៅតាមមណ្ឌលសុខភាព មន្ទីរពេទ្យដែលនៅជិតលំនៅដ្ឋានរបស់ខ្លួន ទៅតាមការកំណត់ និងទទួលយកសេវាបង្ការព្យាបាលថែទាំឲ្យបានទៀងទាត់ ព្រមទាំងទៅសម្រាលកូននៅតាមមណ្ឌលសុខភាព មន្ទីរពេទ្យមានជំនាញ និងបានឆ្លងកាត់ការបណ្តុះបណ្តាលវិជ្ជាជីវៈត្រឹមត្រូវ និងត្រូវធ្វើការពិនិត្យសុខភាពក្រោយពេលការសម្រាលកូន ទាំងមាតា ទារកត្រូវទៅទទួលចាក់ថ្នាំបង្ការជំងឺទាំង១១មុខទៅតាមការណែនាំការកំណត់របស់គ្រូពេទ្យ។
លោកជំទាវអនុប្រធានគណៈកម្មាធិការសាខា ក៏បានធ្វើការកោតសរសើរ ពីកិច្ចខិតខំប្រឹងប្រែងរបស់ក្រុមគ្រូពេទ្យ នៃមណ្ឌលសុខភាពក្នុងការបម្រើសេវាព្យាបាលជម្ងឺជូនប្រជាពលរដ្ឋ សំខាន់លើការបង្កើតកូននៅក្នុងមណ្ឌលសុខភាព ដែលធ្វើឲ្យប្រជាពលរដ្ឋយើង មានទំនុកចិត្តជឿជាក់លើសេវាសុខាភិបាលជាតិ។ លោកជំទាវក៏បានផ្តល់នូវបទពិសោធន៍ល្អៗ អំពីវិធីថែទាំទារកចាប់ពីនៅក្នុងផ្ទៃ រហូតពេលសម្រាលជូនបងប្អូនស្ត្រី ដែលជា អ្នកម្តាយគ្រប់រូប គឺត្រូវចេះធ្វើអនាម័យឲ្យបានជាប្រចាំ ទាំងនៅមុនពេលក្នុងការបំបៅកូន និងកាផ្គត់ផ្គង់អាហារបំប៉នដល់កូនៗរបស់ខ្លួន ទៅតាមការណែនាំរបស់គ្រួពេទ្យ។ ម៉្យាងទៀតនៅពេលដែលពិនិត្យឃើញសញ្ញាគ្រោះថ្នាក់ណាមួយលើទារក ត្រូវប្រញាប់នាំយកទារក ឬកុមារ ទៅមណ្ឌលសុខភាព មន្ទីរពេទ្យ ដើមី្បធ្វើការព្យាបាលជាបន្ទាន់។
ព័ត៌មានជាតិ ថ្មីៗ
ក្នុងឱកាសនោះដែរ លោកជំទាវក៏បាននាំយកនូវអំណោយមនុស្សធម៌មួយចំនួនផ្ដល់ជូនស្ត្រីដែលទើបសម្រាលកូនចំនួន៨០នាក់ ដោយម្នាក់ៗទទួលបាន៖ អង្ករ៣០គីឡូក្រាម ,ត្រីខ១យូរ ,ឃីត១កញ្ចប់ ,ទឹកដោះគោខាប់២កំប៉ុង ,ស្ករស១គីឡូក្រាម ,មី១កេស ,សាប៊ូក្រអូប២ដុំ ,អាវបំបៅដោះកូន១ ,សម្ភារៈទារក១កញ្ចប់ និងថវិកាចំនួន៥ម៉ឺនរៀលផងដែរ៕
អត្ថបទ និងរូបភាព៖ ខេង ឧត្តម ,យូ វង្ស
កែសម្រួល៖ អ៊ុន ណារាជ្យ
