មានប្រសាសន៍នៅក្នុងអង្គសិក្ខាសាលាឆ្លុះបញ្ចាំងអំពីលទ្ធផលការងារ នៃការអនុវត្តផែនការសកម្មភាពឆ្នាំ២០២០ និងលើកទិសដៅអនុវត្តបន្ត សម្រាប់ឆ្នាំ២០២១ របស់គណៈកម្មាធិការពិគ្រោះយោបល់កិច្ចការស្រ្តី និងកុមារខេត្ត ថ្ងៃទី១៩ ខែកុម្ភៈ ឆ្នាំ២០២១នេះ លោកស្រី យូ សុភា អភិបាលរងខេត្តសៀមរាប បានបង្ហាញថា ភាពជោគជ័យ និងប្រសិទ្ធភាពការងារក្នុងការអភិវឌ្ឍសមត្ថភាពស្រ្តី គឺអាស្រ័យដោយមានការគាំទ្រ សហការយ៉ាងជិតស្និទ្ធ របស់ស្ថាប័នដែលពាក់ព័ន្ធរួមមានដៃគូអភិវឌ្ឍន៍ និងអង្គការសង្គមស៊ីវិល។ សកម្មភាពនិងវឌ្ឍនភាពការងារទាំងនោះ បានរួមចំណែក ក្នុងការអនុវត្តគោលនយោបាយកំណែទម្រង់សំខាន់ៗ របស់រាជរដ្ឋាភិបាលកម្ពុជាមានជាអាទិ៍ កំណែទម្រង់វិមជ្ឈការ និងវិសហមជ្ឈការ កំណែទម្រង់ការគ្រប់គ្រងហិរញ្ញវត្ថុសាធារណៈ និងកំណែទម្រង់រដ្ឋបាលសាធារណៈ សម្រាប់ធានាជោគជ័យនៃការអនុវត្ត កម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលសម្រាប់នីតិកាលទី៦។
លោកស្រី យូ សុភា បញ្ជាក់ថា ច្បាប់ស្តីពីការគ្រប់គ្រងរដ្ឋបាល រាជធានីខេត្តក្រុងស្រុកខណ្ឌ និងលិខិតបទដ្ឋានពាក់ព័ន្ធ ក៏បានចែងនូវបញ្ញត្តពាក់ព័ន្ធការរៀបចំឡើងវិញ នូវរចនាសម្ព័ន្ធប្រព័ន្ធគ្រប់គ្រងរដ្ឋបាលថ្នាក់ក្រោមជាតិមានរាជធានី ខេត្តក្រុងស្រុកខណ្ឌ ដែលធានាដល់ការលើកកម្ពស់សមភាពយេនឌ័រ សមធម៌សង្គម បរិយាប័ន្ន ទាំងការតែងតាំង និងការគ្រប់គ្រងបុគ្គលិក ការរៀបចំផែនការអភិវឌ្ឍន៍ ការរៀបចំថវិកាព្រមទាំងបានបង្កើតនូវយន្តការ និងនីតិវិធីនានាដើម្បីធានាបញ្ហាស្រ្តីយុវវ័យកុមារ និងក្រុមជនងាយរងគ្រោះត្រូវបានយកចិត្តទុកដាក់ក្នុងកិច្ចដំណើរការ នៃការសម្រេចចិត្តរបស់ក្រុមប្រឹក្សារដ្ឋបាលថ្នាក់ក្រោមជាតិ។
មានប្រសាសន៍ក្នុងឱកាសនោះដែរ លោកជំទាវ ស៊ិន ណម សមាជិការក្រុមប្រឹក្សាខេត្ត និងជាប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារខេត្តបានបញ្ជាក់ថា ដំណើរការកំណែរទម្រង់ អភិវឌ្ឍតាមបែបប្រជាធិបតេយ្យនៅរដ្ឋបាលថ្នាក់ក្រោមជាតិ បាននិងកំពុងលើកស្ទួយស័្វយភាពមូលដ្ឋាន និងគោលការណ៍អភិបាលកិច្ចល្អ ដែលក្នុងនោះរួមមាន គណនេយ្យភាព តម្លាភាពនិងការផ្តល់សេវាសាធារណៈ ឲ្យកាន់តែមានប្រសិទ្ធភាព ចំពោះប្រជាពលរដ្ឋក្នុងដែនសមត្ថកិច្ចរបស់ខ្លួន។ យ៉ាងណាក៏ដោយ នៅក្នុងអនុសាសន៍ផ្តាំផ្ញើនោះ ក្រុមប្រឹក្សាក្រុងស្រុក ឃុំសង្កាត់ ត្រូវយកចិត្តទុកដាក់ធ្វើឲ្យមានភាពស៊ីសង្វាក់គ្នារវាងផែនការ និងការអភិវឌ្ឍន៍របស់ខ្លួន ដោយសហការជាមួយអាជ្ញាធរពាក់ព័ន្ធ និងដៃគូអភិវឌ្ឍទាំងអស់៕
អត្ថបទ និង រូបភាព៖ ងិន គីមឡេង
