នៅពេលខាងមុខ ក្រសួងសាធារណការ និងដឹកជញ្ជូន គ្រោងនឹងរៀបចំមណ្ឌលផ្តល់សេវាសាធារណៈ សម្រាប់ប្តូរនិងពន្យារបណ្ណបើកបរ និងប្តូរកម្មសិទ្ឋ នៅផ្សារទំនើបហើរីថេកវ៉ក ក្រុងសៀមរាប នេះបើតាមការបង្ហាញពី ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូននារសៀលថ្ងៃទី២២ ខែកុម្ភៈ ឆ្នាំ២០២១ ក្នុងឱកាសសំណេះសំណាលសួរសុខទុក្ខដល់ថ្នាក់ដឹកនាំមន្ទីរ មន្ត្រី នៃមន្ទីរសាធារណការនិងដឹកជញ្ជូនខេត្ត នៅសាលាខេត្តសៀមរាប។
ឯកឧត្តម ទេសរដ្ឋមន្ត្រី បន្ថែមថា ខេត្តសៀមរាប ជាខេត្តទីមួយ បន្ទាប់ពីរាជធានីភ្នំពេញ ដែលក្រសួងបានរៀបចំមណ្ឌលផ្ដល់សេវាសាធារណៈបែបនេះ នៅតាមផ្សារទំនើប ដែលប្រើរយៈពេលតែ១៥នាទីប៉ុនណ្ណោះ ដើម្បីផ្តល់ភាពងាយស្រួល និងសេវាឆាប់រហ័ស ជាពិសេសតម្លាភាព ចៀសវាងដាច់ខាតការចំណាយក្រៅផ្លូវការ។
ក្នុងនោះ ឯកឧត្តម ទេសរដ្ឋមន្ត្រី បានណែនាំ ដល់មន្ត្រីទាំងអស់ត្រូវពិនិត្យឡើងវិញ និងពន្លឿននីតិវិធីការងារ ដែលចាំបាច់ សំដៅធ្វើឱ្យមានប្រសិទ្ឋភាព និងតម្លាភាព សាកសមជាមន្ត្រីបំរើរាស្ត្រ។ ជាមួយនោះ មន្ទីរសាធារណការខេត្ត ត្រូវសហការជាមួយអាជ្ញាធរដែនដី បន្តផ្សព្វផ្សាយច្បាប់ស្តីពីចារចរណ៍ផ្លូវគោក និង ស្ប៉តទាក់ទងទៅនឹងគ្រោះថ្នាក់ចរាចរណ៍តាមវិទ្យុ ទូរទស្សន៍ ក្នុងខេត្ត ធ្វើយ៉ាងណាឱ្យសាធារណជនបានជ្រាបនិងមានការប្រុងប្រយ័ត្ន ដើម្បីកាត់បន្ថយការស្លាប់ដោយសារគ្រោះថ្នាក់ចរាចរណ៍។
អត្ថបទ និង រូបភាព៖ លោក យូ វង្ស និង លោក ងិន គឹមឡេង
កែសម្រួលអត្ថបទ៖ លោក សេង ផល្លី
