ទំហំពាណិជ្ជកម្មសរុបរវាងមហាយក្សចិន និងឥណ្ឌា បានឈានដល់ខ្ទង់ ៧៧.៧លានដុល្លារ អាមេរិកហើយ ដោយតួលេខនេះបានធ្វើឲ្យចិន ក្លាយជាដៃគូពាណិជ្ជកម្មធំបំផុតលំដាប់លេខ ១ របស់ឥណ្ឌា បើទោះបីជាប្រទេសទាំងពីរ កំពុងមានជម្លោះព្រំដែនរវាងគ្នាក៏ដោយ។ នេះបើតាមការចេញផ្សាយ ដោយសារព័ត៌មាន Sputnik នារសៀលថ្ងៃអង្គារ នេះ។
យោងតាមទិន្នន័យបញ្ចេញដោយក្រសួងពាណិជ្ជកម្មឥណ្ឌា បានឲ្យដឹងទៀតថា ប្រទេសឥណ្ឌានៅតែពឹងផ្អែកខ្លាំង ទៅលើការនាំចូលគ្រឿងម៉ាស៊ីនធុនធ្ងន់ និងគ្រឿងបរិក្ខាបម្រើវិស័យទូរគមនាគមន៍ពីប្រទេសចិន កាលពីអំឡុងឆ្នាំ២០២០។
កាលពីឆ្នាំ២០២០ដដែល ទំហំពាណិជ្ជកម្មសរុបរវាងឥណ្ឌា និងសហរដ្ឋអាមេរិកសម្រេចបាន ៧៥.៩ពាន់លានដុល្លារ បើនឹងឆ្នាំ២០១៩ ដែលមានទំហំរហូតដល់ទៅ ៨៧.៩៦ពាន់លានដុល្លារឯណោះ។
លោកនាយករដ្ឋមន្ត្រីឥណ្ឌា ណារិនដ្រា ម៉ូឌី បានដាក់ចេញផែនការថ្មីកាលពីឆ្នាំមុននេះ សំដៅកាត់បន្ថយទំនាក់ទំនងពាណិជ្ជកម្ម ជាមួយមហាយក្សសេដ្ឋកិច្ចលេខ ២ លើលោកនោះគឺប្រទេសចិន ដើម្បីឆ្លើយតបនឹងជម្លោះព្រំដែន ព្រមទាំងឱនភាពពាណិជ្ជកម្មរវាងប្រទេសជិតខាងទាំងពីរ ប៉ុន្តែនៅមិនទាន់ចេញជាផ្លែផ្កាឡើយ។
គួរបញ្ជាក់ថា ក្រៅពីការក្លាយខ្លួនជាដៃគូពាណិជ្ជកម្មធំបំផុតរបស់ឥណ្ឌា ដែលជាប្រទេសមានប្រជាជនច្រើនបំផុតលំដាប់លេខ ២លើលោក (តួលេខឆ្នាំ២០២០ គឺ ១,៣៨០លាននាក់) ប្រទេសចិនក៏បានក្លាយខ្លួនជា ដៃគូពាណិជ្ជកម្មធំបំផុតរបស់សហភាពអឺរ៉ុបរួចទៅហើយដែរ កាលពីឆ្នាំ២០២០ ជាពេលវេលាដែលពិភពលលោកទាំងមូល បានទទួលរងគ្រោះធ្ងន់ធ្ងរបំផុតដោយសារ COVID-19៕
