នាព្រឹកថ្ងៃទី២៣ ខែកុម្ភៈ ឆ្នាំ២០២១នេះ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រី ក្រសួងវប្បធម៌ និងវិចិត្រសិល្បៈ បានសម្ពោធបើកដំណើរការ សាលាវិចិត្រសិល្បៈភូមិភាគសៀមរាប ស្ថិតក្នុងភូមិព្រៃគុយ ឃុំអំពិល ស្រុកប្រាសាទបាគង ខេត្តសៀមរាប ជាផ្លូវការ ដើម្បីចូលរួមថែរក្សា និងលើកកម្ពស់សិល្បៈបុរាណ និងផ្សព្វផ្សាយវប្បធម៌ អារ្យធម៌ខ្មែរ ដល់យុវជនជំនាន់ក្រោយ។
លោកជំទាវ ភឿង សកុណា លើកឡើងថា ការលើកតម្លៃវប្បធម៌ឲ្យបានល្អប្រសើរ គឺជាការចេះប្រើប្រាស់ចំណេះ ជំនាញដែលយើងមាន ដើម្បីចូលរួមលើកស្ទួយ វប្បធម៌ ប្រពៃណី សាសនា ជាដើម ពុំមែន ការបង្ហាញភាពស៊ីចស៊ីជ្រុលពេក បែបអនាចារ ក្នុងបណ្តាញសង្គមជាសាធារណៈនោះទេ។ លោកជំទាវ ក៏បានថ្លែងអំណរគុណ ដល់លោកគ្រូ អ្នកគ្រូ ដែលបានខិតខំអស់ពីកម្លាំងកាយចិត្ត បង្ហាត់បង្ហាញដល់ សិល្បករ សិល្បការិនី សិស្សានុសិស្សទាំងអស់ ដោយការទទួលខុសត្រូវខ្ពស់កន្លងមក ។
តាមការបង្ហាញរបស់លោក មួន សុភាព ប្រធានមន្ទីរវប្បធម៌ និង វិចិត្រសិល្បៈខេត្តសៀមរាប បានឲ្យដឹងថា សាលាវិចិត្រសិល្បៈភូមិភាគសៀមរាប សាងសង់ឡើងអំឡុងឆ្នាំ២០១៥ និងកសាងរួចរាល់នៅក្នុង២០២១ ក្រោមការឧបត្ថម្ភគាំទ្រដោយ ក្រសួងវប្បធម៌ និងវិចិត្រសិល្បៈ។ សាលាសិល្បៈបុរាណនេះ ទទួលសិស្សចាប់ពីអាយុ ៩ឆ្នាំ ដោយមិនគិតថ្លៃសិក្សា និងមានបណ្ដុះបណ្ដាលនូវទម្រង់សិល្បៈដូចជា ភ្លេងបុរាណខ្មែរ យីកេ ល្ខោន របាំ ជាដើម។ល។៕
អត្ថបទ និង រូបភាព៖ លោក ស៊ាន សុផាត
កែសម្រួលអត្ថបទ៖ លោក សេង ផល្លី
