កាលពីថ្ងៃទី២២ ខែកុម្ភៈ ឆ្នាំ២០២១ ឯកឧត្តម អ៊ាន ឃុន ប្រធានក្រុមប្រឹក្សា និងលោក ពិន ប្រាកដ អភិបាលរងខេត្តសៀមរាប បានអញ្ជើញបើក វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២០ គោលដៅទី២ មានស្រុកអង្គរជុំ និងស្រុកវ៉ារិន ស្ថិតនៅសាលាស្រុកអង្គរធំ ខេត្តសៀមរាប។
ឯកឧត្តម ប្រធានក្រុមប្រឹក្សាខេត្ត លើកឡើងថា ក្នុងបរិបទ នៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ វេទិកាផ្សព្វផ្សាយ និងពិគ្រោះយោបល់ គឺជាកាលានុវត្តភាព ដើម្បីផ្តល់ឱកាសឲ្យប្រជាពលរដ្ឋ និងអ្នកពាក់ព័ន្ធទាំងអស់ បានស្វែងយល់អំពីស្ថានភាពទូទៅ នៃការអភិវឌ្ឍខេត្ត ក្រុង-ស្រុក ឃុំ-សង្កាត់ ព្រមទាំងបញ្ហាប្រឈមនានា ដែលកើតមានរយៈពេលកន្លងមក និងបានផ្តល់ឱកាសផងដែរ ជូនបងប្អូនប្រជាពលរដ្ឋ អ្នកពាក់ព័ន្ធ បានបញ្ចេញមតិរបស់ខ្លួនអំពីក្តីកង្វល់ សំណូមពរ និងតម្រូវការជាក់ស្តែងក្នុងមូលដ្ឋាន។
យោងតាមរបាយការណ៍ រៀបចំឡើងដោយរដ្ឋបាលខេត្តសៀមរាប បង្ហាញថា កម្មវិធីវិនិយោគបីឆ្នាំរំកិលរបស់រដ្ឋបាលខេត្តសៀមរាបឆ្នាំ២០២១-២០២៣ មានចំនួន៦៣គម្រោង ស្មើនឹងទំហំថវិកា សរុបជាង២៥ពាន់ ៥០០លានរៀល ក្នុងនោះរួមមានផ្នែកសេដ្ឋកិច្ចចំនួន០២គម្រោង ផ្នែកសង្គមកិច្ចចំនួន៤១គម្រោង និងផ្នែករដ្ឋបាល-សន្តិសុខ-សណ្តាប់ឆ្នាប់ ចំនួន២០គម្រោង។ របាយការណ៍នេះ បញ្ជាក់ថា សកម្មភាពទាំង៦៣គម្រោង នឹងត្រូវអនុវត្តក្នុងឆ្នាំ២០២១នៅតាមបណ្តាក្រុងស្រុកទាំង១២ ដើម្បីឆ្លើយតបតាមតម្រូវការ ជាក់ស្តែងរបស់ប្រជាពលរដ្ឋនៅថ្នាក់មូលដ្ឋាន។
លើកឡើងក្នុងឱកាសនោះ លោកអភិបាលរងខេត្ត បានបញ្ជាក់ថា នៅក្នុងកិច្ចប្រជុំសាមញ្ញលើកទី២១ របស់ក្រុមប្រឹក្សាខេត្តអណត្តិទី៣នាពេលកន្លងទៅ ឯកឧត្តម ទៀ សីហា អភិបាលខេត្តសៀមរាប បានណែនាំដល់រដ្ឋបាលក្រុងស្រុកទាំងអស់ គប្បីបញ្ឈប់ការលើកគម្រោងស្ថាបនាផ្លូវក្រាលគ្រួសក្រហមនៅមូលដ្ឋាន ដោយជំនួសវីញនូវផ្លូវបេតុង ទៅតាមលទ្ធភាព ដែលអាចធ្វើបាន។
ក្នុងឱកាសបូកសរុប និងបិទវេទិកា ឯកឧត្តម អ៊ាន ឃុន បានវាយតម្លៃថា អង្គវេទិកាផ្សព្វផ្សាយ និងពិគ្រោះយោបល់នាពេលនេះ ពិតជាជំហានរីកចម្រើនថ្មីបន្ថែមទៀត សម្រាប់រដ្ឋបាលខេត្តសៀមរាប ក្នុងការអនុវត្តន៍មុខងាររបស់ខ្លួន ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋានឲ្យកាន់តែរឹងមាំ និងទំលំទូលាយ។ ចំពោះសំណួរ-សំណូមពរ ដែលពុំទាន់បានឆ្លើយតប នឹងត្រូវយកទៅពិនិត្យ ពិភាក្សាបន្ត ក្នុងក្របខណ្ឌក្រុមប្រឹក្សាខេត្ត ហើយនឹងធ្វើការឆ្លើយតបជាលាយល័ក្ខអក្សរ តាមកាលវេលាសមគួរ តាមរយៈមេឃុំ ចៅសង្កាត់ នៅក្នុងមូលដ្ឋានដែលបងប្អូនប្រជាពលរដ្ឋរស់នៅ ។
គួរបញ្ជាក់ដែរថា នៅក្នុងវរទិកានេះ វាគ្មិនបានឆ្លើយតបយ៉ាងក្បោះក្បាយ នូវសំណួរនិងសំណូមពរ ដែលបានលើកឡើងដោយប្រជាពលរដ្ឋ មេភូមិ គ្រូបង្រៀន និងសិស្សានុសិស្ស ចំនួន០៩ សំណួរ-សំណូមពរ ដែលសំណួរ-សំណូមពរទាំងនេះ លើកឡើងអំពីបញ្ហាអគ្គីសនី ផ្លូវថ្នល់ វិស័យអប់រំ មណ្ឌលសុខភាព និងជាសំនួរ ចម្ងល់លើបញ្ហាផ្សេងៗ៕
អត្ថបទ៖ លោក ទិត្យ សំបូរ
កែសម្រួល៖ លោក សេង ផល្លី
