គិតត្រឹមថ្ងៃទី២0 ខែកុម្ភៈនេះ គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែក្នុងក្រុងសៀមរាប សម្រេចបានត្រឹមតែ១៨ភាគរយប៉ុណ្ណោះ ដោយក្រុមការងាសាងសង់កំពុងមមាញឹកពង្រឹងគុណភាពគ្រឹះផ្លូវ និងរៀបចំប្រព័ន្ធលូរំដោះទឹកភ្លៀង និងប្រព័ន្ធលូបញ្ចេញទឹកកខ្វក់។
ក្នុងដំណើរពិនិត្យវឌ្ឍនភាពគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែនៅក្រុងសៀមរាប នៅតាមបណ្ដាការដ្ឋាន នៅថ្ងៃទី២២ ខែកុម្ភៈ ឆ្នាំ២០២១ ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន អមដំណើរដោយក្រុមការងារបច្ចេកទេសអន្តរក្រសួង និងបានបញ្ជាក់ថា គុណភាពនៃការសាងសង់ប្រព័ន្ធលូបានល្អតាមបទដ្ឋានបច្ចេកទេស វាមិនត្រឹមតែធានាបាននូវការប្រើប្រាស់ប្រព័ន្ធលូទាំងនោះ ប្រកបដោយប្រសិទ្ធភាព និងយូរអង្វែងនោះទេ តែវាបានជួយដល់ការពង្រឹងគុណភាពផ្លូវថ្នល់ផងដែរ។
ឯកឧត្តម ក៏បានដាក់ចេញនូវអនុសាសន៍ សម្រាប់អង្គភាពប្រតិបត្តិការគម្រោងទាំងអស់ ត្រូវយកចិត្តទុកដាក់ សហការជាមួយកម្លាំងសមត្ថកិច្ច ប្រើប្រាស់ឲ្យអស់លទ្ធភាព កាត់បន្ថយឲ្យបានប្រសើរជាងនេះ ក្នុងការសម្រួលចរាចរណ៍ ចៀសវាងការបិទផ្លូវទាំងស្រុង ដោយបង្កើតឲ្យមានផ្លូវវាង សម្រួលសតិអារម្មណ៍ប្រជាពលរដ្ឋ ដែលរីករាយ ទៅនឹងសមិទ្ធផលថ្មី ផ្ដល់ដោយរាជរដ្ឋាភិបាល ដើម្បីប្រែក្លាយ ខេត្តសៀមរាប ទៅជាទីក្រុងទំនើប ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍ វប្បធម៌ ប្រវត្តិសាស្រ្ត និងធម្មជាតិ នាពេលអនាគត៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
