គិតត្រឹមរយៈពេល៣ថ្ងៃ ចាប់ពីថ្ងៃទី២៦ ដល់ទី២៧ ខែកុម្ភៈ និង ថ្ងៃទី០១ ខែមីនា ឆ្នាំ២០២១នេះ មានអ្នកស្ម័គ្រចិត្ដ ក្នុងខេត្តសៀមរាប រួមមាន កងកម្លាំងប្រដាប់អាវុធទាំងបីប្រភេទ និងក្រុមគ្រួសារកងទ័ព ចំនួនជាង៣ពាន់នាក់ បានទទួលវ៉ាក់សាំងការពារជំងឺកូវីដ-១៩ លើកទី១ នៅយោធភូមិភាគទី៤ ស្ថិតក្នុងស្រុកប្រាសាទបាគង ខេត្ដសៀមរាប។
តាមការឲ្យដឹងពី ឯកឧត្ដម ឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បង្ហាញថា ប៉ូលីស កងកម្លាំងយោធា និងកងកម្លាំងកងរាជអាវុធហត្ថ ព្រមទាំងក្រុមគ្រួសារកងទ័ព ដែលចំណុះឲ្យយោធភូមិភាគទី៤ រួមនិងកងកម្លាំងតំបន់ប្រតិបត្ដិការសឹកទាំង៤ខេត្ដ មានដួចជា សៀមរាប ឧត្ដរមានជ័យ ព្រះវិហារ និងកំពង់ធំ ដែលមានចំនួនសរុប ជាង២ម៉ឺននាក់ នឹងទទួលបានវ៉ាក់សាំងការពារជំងឺកូវីដ-១៩នេះ។
នាយទាហានពីររូប មកពីមជ្ឍមណ្ឌលអភិឌ្ឍន៍យោធិនពិការសម្ដេចតេជោ ហ៊ុន សែន គូលែន៣១៧សៀមរាប បានថ្លែងអំណរគុណដល់ រាជរដ្ឋាភិបាល ដែលបានយកចិត្ដទុកដាក់ ដល់កងកម្លាំងយោធា។ លោកទាំងពីរ ក៏បានបញ្ជាក់ពីការត្រៀមខ្លួនរួចជាស្រេច ដើម្បីចាក់វ៉ាក់សាំងកូវីដ-១៩លើកទី២ផងដែរ។
ដោយឡែកលោកវរសេនីយ៍ទោ ទិត សិទ្ធា មេបញ្ជាការរងទ័ពអាកាស នៅព្រលានយន្ដហោះអន្ដរជាតិខេត្ដសៀមរាប លើកឡើងដែរថា កន្លងមកលោកធ្លាប់ឃើញមានមនុស្សមួយចំនួនតូច បានបង្ហោះសារបំពុលសង្គមនៅតាមបណ្ដាញសង្គម ពីការចាក់វ៉ាក់សាំងការពារជំងឺកូវីដ-១៩ ដើម្បីបង្កចលាចលក្នុងសង្គម និងបំផ្លាញការខិតខំរបស់រាជរដ្ឋាភិបាលកម្ពុជា ក្នុងការជួយសង្គ្រោះជីវិតប្រជាពលរដ្ឋ។ លោកបញ្ជាក់ថា សម្រាប់លោក ក្រោយចាក់វ៉ាក់សាំងការពារជំងឺកូវីដ-១៩ លោកមានសុខភាពល្អធម្មតា ដោយគ្រាន់តែគ្រូពេទ្យ ណែនាំឲ្យផ្អាកទទួលទានគ្រឿងស្រវឹង និងចំណីអាហារមួយ ក្នុងរយៈពេលមួយសប្ដាហ៍ប៉ុណ្ណោះ។ លោកអំពាវដល់ប្រជាពលរដ្ឋ និងកម្លាំងប្រដាប់អាវុធទាំងអស់ កុំជឿពាក្យញុះញង់ របស់ក្រុមជនអគតិមួយក្ដាប់តូច និងចូលរួចទប់ស្កាត់ជំងឺកូវីដ-១៩ តាមការណែនាំរបស់រាជរដ្ឋាភិបាល ដើម្បីការពារខ្លួនយើងពីការឆ្លងជំងឺកូវីដ១៩នេះ។
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
