រដ្ឋបាលខេត្តសៀមរាប នៅរសៀលថ្ងៃទី០១ ខែមីនា ឆ្នាំ២០២១នេះ បានបើកកិច្ចប្រជុំក្រុមការងារស្រាវជ្រាវ និងតាមដានបុគ្គលដែលគេសង្ស័យថា មានផ្ទុកជំងឺកូវីដ-១៩។ យោងតាមសេចក្តីសម្រេចដែលចុះហត្ថលេខាដោយ ឯកឧត្តម ទៀ សីហា អភិបាលខេត្តសៀមរាប បានប្រគល់តួនាទីជូនលោក នាក់ ណេរ៉ុន អភិបាលរងខេត្ត ជាប្រធានក្រុមការងារនេះ ហើយក្រុមការងារនេះដែរ ចំណុះឱ្យគណ:កម្មការប្រយុទ្ធជំងឺកូវីដ-១៩។
លោក ក្រុស សារ៉ាត់ ប្រធានមន្ទីរសុខាភិបាលខេត្ត និងជាអនុប្រធានអចិន្ត្រៃយ៍ របស់ក្រុមការងារស្រាវជ្រាវ និងតាមដានបុគ្គលសង្ស័យអ្នកមានផ្ទុកជំងឺកូវីដ-១៩នេះ បានមានប្រសាសន៍នៅក្នុងកិច្ចប្រជុំ ក្រុមការងារនារសៀលថ្ងៃទី០១ ខែមីនា ឆ្នាំ២០២១នេះថា កន្លងមកខេត្តសៀមរាប ធ្លាប់មានការកើតឡើងនូវជំងឺកូវីដ-១៩ ជាពិសេសការផ្ទុះនូវព្រឹត្តិការណ៍សហគមន៍២៨វិច្ឆិកា ដែលគេសង្ស័យថាកើតចេញពីខេត្តសៀមរាប។ លោកបន្តថា ប៉ុន្តែទោះជាយ៉ាងនេះក្តី ដោយសារការសហការគ្នាបានល្អរបស់ភាគីពាក់ព័ន្ធ អាជ្ញាធរខេត្តអាចគ្រប់គ្រងស្ថានការណ៍យ៉ាងមានប្រសិទ្ធភាព។ លោកបន្តថា ប៉ុន្តែទោះយ៉ាងនេះក្តី ចំពោះមុខពាក់ព័ន្ធនឹងព្រឹត្តិការណ៍សហគមន៍ ២០កុម្ភៈនេះ ទោះបីជាវាកើតនៅភ្នំពេញក៏ពិតមែន តែយើងមិនអាចមើលស្រាលស្ថានការណ៍នេះបានឡើយ។
លោក នាក់ ណេរ៉ុន ប្រធានក្រុមការងារ បានមានប្រសាសន៍ក្នុងកិច្ចប្រជុំនេះថា ការបង្កើតក្រុមការងារនេះ ជាការឆ្លើយតបបន្ទាន់មួយរបស់រដ្ឋបាលខេត្តសៀមរាប ក្នុងការប្រយុទ្ធប្រឆាំងជំងឺកូវីដ-១៩ ។ ជាពិសេសការផ្ទុះនូវព្រឹត្តិការណ៍សហគមន៍ ២០កុម្ភៈ ដែលមានអ្នកឆ្លងជំងឺនេះរាប់រយនាក់។ លោកថា ស្ថានការណ៍នៃការឆ្លងជំងឺកូវីដ-១៩ ដែលពាក់ព័ន្ធជាមួយព្រឹត្តិការណ៍២០កុម្ភៈនេះ វាមិនសាមញ្ញនោះទេ ដូច្នេះក្រុមការងារត្រូវត្រៀមខ្លួនជានិច្ច ដើម្បីបំពេញកិច្ចប្រតិបត្តិការ និងដើម្បីប្រសិទ្ធភាពការងារ។
យោងតាមការចេញផ្សាយរបស់នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលកម្ពុជា បានឲ្យដឹងថា រហូតមកដល់ព្រឹកថ្ងៃទី០១ ខែមីនា ឆ្នាំ២០២១នេះ កម្ពុជា បានរកឃើញថាមានអ្នកឆ្លងជំងឺកូវីដ-១៩ ចំនួន៨២០នាក់ ក្នុងនោះមានអ្នកជំងឺកំពុងសម្រាកព្យាបាលចំនួន៣៤៣នាក់ និងអ្នកដែលបានជាសះស្បើយចំនួន ៤៧៧នាក់។ បើទោះយ៉ាងនេះក្តី ក្រសួងសុខាភិបាលក៏រំពឹងថា ចំនួននេះនឹងបន្តកើនឡើងបន្ថែមទៀត ខណៈដែលអាជ្ញាធរកម្ពុជាកំពុងធ្វើតេស្តពីសំណាកអ្នកពាក់ព័ន្ធនឹងព្រឹត្តិការណ៍សហគមន៍ថ្ងៃ២០កុម្ភៈ និងបន្តស្រាវជ្រាវរកអ្នកពាក់ព័ន្ធបន្ថែមទៀត៕
អត្ថបទ និងរូបភាព៖ ជា ស្រស់ ,ខេង ឧត្តម
កែសម្រួល៖ លីវ សុខុន
