នៅថ្ងៃទី០២ ខែមីនា ឆ្នាំ២០២១នេះ រដ្ឋបាលខេត្តសៀមរាប បានបន្តរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ គោលដៅទី៥ ស្រុកស្វាយលើ និងស្រុកជីក្រែង ដឹកនាំដោយឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក ពៅ ពិសិដ្ឋ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប ស្ថិតនៅក្នុងបរិវេណវត្តស្វាយលើ ភូមិជប់លើ ឃុំស្វាយលើ ស្រុកស្វាយលើ ខេត្តសៀមរាប។
ឯកឧត្តម អ៊ាន ឃុន លើកឡើងថា ក្នុងកិច្ចពិភាក្សា នឹងពិគ្រោះយោបល់នាពេលនេះ គឺជាការពង្រឹងនីតិរដ្ឋ និងអភិបាលកិច្ចល្អនៅមូលដ្ឋានបន្ថែមទៀត ដែលជាការជំរុញឱ្យមានការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ក្នុងកាយវិការមួយធ្វើឲ្យលទ្ធិប្រជាធិបតេយ្យនៅកម្ពុជា កាន់តែចាក់ឫសយ៉ាងជ្រៅ ជាពិសេសនៅសហគមន៍មូលដ្ឋានរបស់យើង។ ក្នុងនោះ សំនួរ-ចម្លើយ និងសំណូមពរក្នុងវេទិកានេះ ក៏ជាយន្តការ ជំរុញប្រជាពលរដ្ឋ បង្ហាញពីសិទ្ធបញ្ចេញមតិ និងតម្លាភាពក្នុងការដោះស្រាយបញ្ហា ចាប់ពីកម្រិតថ្នាក់ខេត្ត រហូតដល់មូលដ្ឋាន។
លោកអភិបាលរងខេត្ត បង្ហាញថា ការរៀបចំវេទិកាសាធារណ:នេះ ជាយន្តការចូលរួមអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិតរបស់បងប្អូនប្រជាពលរដ្ឋនៅតាមបណ្ដាស្រុក ក្នុងខេត្តសៀមរាបទាំងមូល និង កាត់បន្ថយភាពក្រីក្រ។ លើសពីនោះ ដោយមានការយកចិត្តទុកដាក់ខ្ពស់ពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់ថវិកាជាតិសរុបប្រមាណ ១៤០លានដុល្លារអាមេរិក សម្រាប់សាងសង់ហេដ្ឋារចនាសម្ព័ន្ធផ្លូវថ្នល់៣៨ខ្សែ និងថវិកាជាង ៩លានដុល្លារអាមេរិកទៀត សម្រាប់ការងារចាំបាច់ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ ក្នុងក្រុងសៀមរាប ដើម្បីប្រែក្លាយទីក្រុងមួយនេះ ជាទីក្រុងទំនើប និងទេសចរណ៍ ដ៏មានសក្តានុពល ដែលត្រូវបានរាជរដ្ឋាភិបាលកម្ពុជាកំណត់ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរដល់ការការពារ និងកែលម្អបរិស្ថាន ផាសុកភាពរបស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។ ទន្ទឹមនោះ ក្រោយពីបញ្ចប់ការសាងសង់ គម្រោងនេះនឹងដើរតួជាហេដ្ឋារចនាសម្ព័ន្ធប្រទាក់ក្រឡាគ្នា តភ្ជាប់ទីប្រជុំជន ទៅជាយក្រុង និងតភ្ជាប់ទៅកាន់តំបន់ទេសចរណ៍សំខាន់ៗ និងបណ្តាញខ្សែផ្លូវជាតិនានា។
សូមជម្រាបថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប គោលដៅទី៥នេះ អង្គវេទិកាទទួល និងឆ្លើយបំភ្លឺ បានសំណួរ និងសំណូមពរផ្ទាល់មាត់ពីបងប្អូនប្រជាពលរដ្ឋចំនួន ១២សំណួរ និងសំណូមពរ។ ដោយឡែកសំណួរ នឹងសំណូមពរជាលាយលក្ខ័អក្សរមិនទាន់បានឆ្លើយបំភ្លឺមានចំនួន ៤៩សំណួរ និងសំណូមពរ អង្គវេទិកា នឹងយកទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត និងធ្វើការឆ្លើយតប និង ជម្រាបជូនដំណឹងជាលាយលក្ខណ៍អក្សរដល់ម្ចាស់សំណួរ តាមពេលវេលាសមគួរ តាមរយៈមេឃុំ-ចៅសង្កាត់នៅមូលដ្ឋាននីមួយៗ។
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក សេង ផល្លី