មន្ដ្រីរាជការស៊ីវិល និងកងកម្លាំងប៉ូលិស នៅខេត្ដសៀមរាប បានចាក់វ៉ាក់សាំងការពារជំងឺកូវីដ-១៩ លើកទី១ ក្នុងរយ:ពេលពីរថ្ងៃ មានចំនួនជិត ១ពាន់នាក់ នេះបើតាមការអោយដឹងពីមន្ដ្រីជំនាញសុខាភិបាល កាលពីល្ងាចថ្ងៃទី០២ ខែមីនា ឆ្នាំ២០២១នេះ។
យោងតាមរបាយការណ៍ របស់មន្ទីរសុខាភិបាលខេត្ដសៀមរាប បានបង្ហាញថា ក្នុងរយ:ពេលពីរថ្ងៃ ចាប់ពីថ្ងៃទី០១ និងថ្ងៃទី០២ ខែមីនាឆ្នាំ២០២១នេះ មន្ដ្រីរាជការស៊ីវិល និងកងកម្លាំងប៉ូលិស បានមកចាក់វ៉ាក់សាំងការពារជំងឺកូវីដ-១៩ មានចំនួន៩៥៧នាក់ ក្នុងនោះស្រីចំនួន២៨៦នាក់ ក្នុងចំណោមដែលបានចុះឈ្មោះចំនួនសរុប១,០៦០នាក់ រយ:ពេល២ថ្ងៃនេះ។ របាយការណ៍ដដែល បានបន្ដថា ចំនួនអ្នកមិនបានចាក់វ៉ាក់សាំងមានចំនួន ១០១នាក់ មូលហេតុ ដោយសារបញ្ហាសុខភាពមិនប្រក្រតី ដូចជាសម្ពាធឈាមលើស អាឡែកស៊ី ស្រី្ដមានផ្ទៃពោះ ស្រ្តីបំបៅដោះកូន សសៃប្រសាទជាដើម ជាពិសេសមានជំងឺរាំរៃ។
សូមជម្រាបថា ទីតាំងដែលផ្ដល់វ៉ាក់សាំងនេះ ធ្វើឡើងនៅទីតាំងចំនួន៥កន្លែង រួមមាន នៅមន្ទីរពេទ្យបង្អែកខេត្ដសៀមរាប មានចំនួនអ្នកចាក់វ៉ាក់សាំង ៣៩០នាក់, មន្ទីរពេទ្យបង្អែកស្រុកក្រឡាញ់ចំនួន ១៧២នាក់, មន្ទីរពេទ្យបង្អែកស្រុកពួកចំនួន ១១៧នាក់ មន្ទីរពេទ្យបង្អែកអង្គរជុំចំនួន ១៦៤នាក់ និងមន្ទីរពេទ្យបង្អែកស្រុកសូទ្រនិគមចំនួន ១១៤នាក់។ បើតាមការអោយដឹងពីមន្ដ្រីជំនាញសុខាភិបាលដដែលបន្តថា ការចាក់វ៉ាក់សាំងនេះ នឹងបន្តចាក់ទៀត នៅថ្ងៃបន្តបន្ទាប់លុះត្រាអស់វ៉ាក់សាំង ៕
អត្ថបទ និងរូបភាព៖ បូ សាវី
កែសម្រួល៖ លីវ សុខុន
