ឯកឧត្ដមឧត្តមសេនីយ៍ឯក ពៅ ហេង មេបញ្ជាការរង កងទ័ពជើងគោក និងជាមេបញ្ជាការយោធភូមិភាគទី៤ បានមានប្រសាសន៍ថា កងកម្លាំងប្រដាប់អាវុធទាំងបីប្រភេទ រួមមានកម្លាំងកងទ័ព ចំណុះឲ្យយោធភូមិភាគទី , កម្លាំងនគរបាលការពារព្រំដែន និង កម្លាំងកងរាជអាវុធហត្ថខេត្ត សរុប ចំនួន ១៤.៨១៧នាក់ ក្នុងស្រីចំនួន៥៨៥នាក់ បានចាក់វ៉ាក់សាំងការពារជំងឺកូវីដ១៩ លើកទី១រួចរាល់ហើយ ហើយអ្នកមិនបានចាក់មានចំនួន ៣៨៧នាក់ ក្នុងស្រីចំនួន១២៩នាក់ ដែលយុទ្ធនាការចាក់វ៉ាក់សាំងការពារជំងឺកូវីដ១៩នេះ ក្រោមកិច្ចសហការរវាងក្រុមគ្រូពេទ្យព្រះកេតុមាលា និង មន្ទីរពេទ្យយោធភូមិភាគទី៤ ដែលបានចាប់ដំណើរការចាក់លើកទី១ ចាប់ពីថ្ងៃទី២៦ ខែកុម្ភៈ ហើយយុទ្ធនាការនេះ នឹងធ្វើបន្តរហូតដល់ចប់សព្វគ្រប់ ។
ឯកឧត្ដមឧត្តមសេនីយ៍ឯក ពៅ ហេង មានប្រសាសន៍យ៉ាងដូច្នេះក្នុងពិធីជួបសំណេះសំណាល សួរសុខទុក្ខ មេបញ្ញាការ បញ្ជាការរង នាយទាហាន ពលទាហាន ៤ រួមទាំងកងទ័ពការពារអាកាស និង វរៈនគរបាលការពារព្រំដែន កងរាជអាវុធហត្ថខេត្ត ក្នុងឱកាសយុទ្ធនាការចាក់វ៉ាក់សាំងកូវិដ.១៩ នៅទីបញ្ជាការយោធភូមិភាគទី៤ នៅព្រឹកថ្ងៃទី០៣ ខែ មីនា ឆ្នាំ២០២១នេះ ក្រោមការចូលរួមពីសំណាក់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។
សម្តេចពិជ័យសនា ទៀ បាញ់ មានប្រសាសន៍ថា ការចាក់វ៉ាក់សាំងការពារជំងឺកូវីដ១៩ នាពេលនេះ គឺជាយុទ្ធនាការប្រឆាំងការរីករាលដាលនៃជំងឺឆ្លងកូវីដ១៩ដ៏កាចសាហាវ ស្របពេលដែលប្រទេសកម្ពុជាយើងកំពុងតែផ្ទុះនៅព្រឹត្តិការណ៍សហគមន៍២០កុម្ភៈផងដែរ ដូច្នេះក្នុងឱកាសនេះ សូមជូនពរដល់ក្រុមគ្រូពេទ្យទាំងអស់ទទួលបានជោគជ័យក្នុងបេសកកម្មដ៏សំខាន់នេះ រួមគ្នាដើម្បីទប់ស្កាត់ការរីករាលដាលជំងឺកូវីដ១៩ក្នុងសហគមន៍យើង»។
ជាមួយគ្នានេះដែរសម្តេចពិជ័យសេនា បានជំរុញឲ្យគ្រប់កងឯកភាពចំណុះយោធភូមិភាគទី៤ ត្រូវបន្តធ្វើការចាក់វ៉ាក់សាំងឲ្យបានគ្រប់ៗគ្នា និង ឲ្យបានចប់រួចរាល់នៅមុនបុណ្យចូលឆ្នាំថ្មីប្រពៃណីខ្មែរយើង ចូលមកដល់ និងសុំឲ្យកងកម្លាំងកងវិស្វកម្មលេខ ១៧៨ស្ពាន-ថ្នល់ និង កងវិស្វកម្មសម្តេចតេជោ ខេត្តសៀមរាប ក៏ត្រូវបានទទួលការចាក់វ៉ាក់សាំងនៅយោធភូមិភាគទី៤នេះផងដែរ ៕
សម្តេចពិជ័យសេនា ក៏បានក្រើនរំឭកដល់កម្លាំងទាំងអស់ បើទោះបីជាពេលនេះយើងមានវ៉ាក់សាំងការពារខ្លះក្តី ក៏យើងត្រូវតែបង្កើនយកការទុកដាក់ខ្ពស់ លើការផ្សព្វផ្សាយ អប់រំនូវសេចក្តីណែនាំ និង វិធានការរបស់រាជរដ្ឋាភិបាល និង ក្រសួងសុខាភិបាល ត្រូវគោរពឲ្យបានខ្ជាប់ខ្ជួន វិធានការណ៍ ៣កុំ ៣ការពារ ព្រមទាំងចូលរួមប្រយុទ្ធប្រឆាំងបង្កាទប់ស្កាត់ជំងឺកូវីដ១៩ កុំឲ្យមានការឆ្លងក្នុងសហគមន៍ សំខាន់ក្នុងកងអង្គភាពយោធិន និង កុំជឿតាមពាក្យឃោសនាអកុសលរបស់ជនអកតិមួយចំនួន អំពីបញ្ហាការចាក់វ៉ាក់សាំងនេះ ៕
អត្ថបទ និងរូបភាព: លោក ជា ស្រស់
កែសម្រួលអត្ថបទ ៖ លោក លីវ សាន្ត
