នៅថ្ងៃទី០៣ ខែ មីនា ឆ្នាំ២០២១ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដំណើរដោយឯកឧត្តម អ៊ាន ឃុន ប្រធានក្រុមប្រឹក្សាខេត្ត និងឯកឧត្តម ទៀ សីហា អភិបាលខេត្តសៀមរាប បានអញ្ជើញជួបសួរសុខទុក្ខ មេបញ្ជាការ បញ្ជាការរង នាយទាហាន ពលទាហាន ចំណុះឲ្យយោធភូមិភាគទី៤ រួមទាំងកងទ័ពការពារអាកាស និង វរៈនគរបាលការពារព្រំដែន កងរាជអាវុធហត្ថខេត្ត ក្នុងយុទ្ធនាការចាក់វ៉ាក់សាំងការពារជំងឺកូវីដ-១៩ នៅទីបញ្ជាការយោធភូមិភាគទី៤ ស្ថិតក្នុងស្រុកប្រាសាទបាគង ខេត្ដសៀមរាប។
ឯកឧត្តមឧត្តមសេនីយ៍ឯក ពៅ ហេង មេបញ្ជាការយោធភមិភាគទី៤ និង ជាមេបញ្ជាការរងកងទ័ពជើងគោក បានបញ្ជាក់ថា ក្នុងយុទ្ធនាការចាក់វ៉ាក់សាំងការពារជំងឺកូវីដ-១៩ លើកទី១នេះ មានកិច្ចសហការរវាង ក្រុមគ្រូពេទ្យព្រះកេតុមាលា និង មន្ទីរពេទ្យយោធភូមិភាគទី៤ គិតត្រឹមថ្ងៃទី២៦ ខែកុម្ភៈ មកដល់ ថ្ងៃទី០២ មីនា ២០២១ មានចំនួនសរុបជិត១៥,០០០ នាក់ ក្នុងនោះស្រីជិត៦០០នាក់ ហើយអ្នកមិនទាន់បានវ៉ាក់សាំងមានចំនួនជិត៤០០នាក់។
សម្តេចពិជ័យសេនា បានគូសបញ្ជាក់ថា គ្រប់កងឯកភាពចំណុះ ឲ្យយោធភូមិភាគទី៤ នឹងទទួលបានការចាក់វ៉ាក់សាំងការពារជំងឺកូវីដ-១៩ គ្រប់ៗគ្នា នៅមុនថ្ងៃបុណ្យចូលឆ្នាំប្រពៃណីជាតិខ្មែរ។ ក្នុងនោះ កងកម្លាំងកងវិស្វកម្មលេខ ១៧៨ស្ពាន-ថ្នល់ និង កងវិស្វកម្មសម្តេចតេជោ ខេត្តសៀមរាប ក៏ត្រូវ បានទទួលការចាក់វ៉ាក់សាំងនៅយោធភូមិភាគទី៤នេះផងដែរ ។
សម្ដេច ក៏បានអំពាវនាវ ដល់កងកម្លាំងទាំងអស់ ក្នុងឱកាសពេលចូលឆ្នាំថ្មីប្រពៃណីជាតិខ្មែរខាងមុខ ត្រូវកាត់បន្ថយ ការជួបជុំ ដែលអាចបង្កឲ្យមានការរីករាលនៃជំងឺកូវីដ-១៩ ព្រមទាំងរក្សាឲ្យបាននូវគន្លាតសុវត្ថិភាព ពាក់ម៉ាស់ឲ្យបានត្រឹមត្រូវ និង ត្រូវធ្វើអនាម័យឲ្យបានជាប្រចាំ ដោយសម្អាតដៃដោយលាងទឹកនឹងសាប៊ូ អាល់កុល ឬ ជែល ជាដើម ។ ទន្ទឹមនោះ សូមប្រជាពលរដ្ឋ និងកងកម្លាំងទាំងអស់ ចូលរួមទប់ស្កាត់ ការផ្សព្វផ្សាយព័ត៌មានក្លែងក្លាយ លើបណ្ដាញសង្គមនានា ពាក់ព័ន្ធនឹងការចាក់វ៉ាក់សាំងការពារជំងឺកូវីដ-១៩ នៅកម្ពុជា ខណៈរាជរដ្ឋាភិបាលកម្ពុជា កំពុងខិតខំស្វែងរកវ៉ាក់សាំង ចាក់ជូនប្រជាពលរដ្ឋ ឲ្យបានគ្រប់ៗគ្នា។
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
