លើកឡើង នៅក្នុងកិច្ចប្រជុំបូកសរុបការងារប្រចាំខែកុម្ភៈ នាព្រឹកថ្ងៃទី០៤ ខែមីនា ឆ្នាំ២០២១ ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប បង្ហាញថា ដើម្បីលើកកម្ពស់អភិបាលកិច្ច ឲ្យកាន់តែប្រសើរឡើង ការបញ្ជូនដំណឹង ឬព័ត៌មាន ទៅដល់ប្រជាពលរដ្ឋ ជាគោលដៅដ៏ចាំបាច់បំផុត និងជាការឆ្លើយតប ចំពោះសិទ្ធិទទួលបានរបស់ប្រជាពលរដ្ឋ។ ទន្ទឹមនោះ អ្នកយកព័ត៌មាន មិនអាចខ្វះបានទេ នូវឆន្ទៈគោរពក្រមសីលធម៌ ព្រមជាមួយគុណភាពវិជ្ជាជីវៈរបស់ខ្លួន។
ឯកឧត្តមប្រធាន គូសបញ្ជាក់ថា ក្នុងយុគសម័យបច្ចេកវិទ្យាឌីជីថល ទៅក្នុងបដិវត្តន៍ឧស្សាហកម្មទី៤.០នេះ ភ្នាក់ងារយកព័ត៌មានទាំងអស់ ត្រូវរត់ឲ្យទាន់នៃការរីកចម្រើនទាំងនោះ ស្របតាមការចង្អុលបង្ហាញរបស់ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន។ ចំណេះដឹងតាមសម័យកាលនេះ វាពិតជាមិនមានការលំបាកពេកនោះទេ បើសិនជាអ្នកយកព័ត៌មាន ស្ថិតក្នុងឆន្ទៈស្រឡាញ់អាជីពរបស់ខ្លួន និងមនសិការ សំដៅឆ្ពោះទៅរកផលប្រយោជន៍ ជូនសង្គមជាតិ។ កិច្ចប្រជុំនេះ ក៏បានពិភាក្សា ដកស្រង់បទពិសោធន៍ ឆ្លុះបញ្ចាំងលទ្ធផលការងារ ប្រមូលធាតុចូល និងលើកយកបញ្ហាប្រឈមនានា ដើម្បីស្វែងរកដំណោះស្រាយ លុបបំបាត់ចំណុចខ្វះខាត បង្កើនសមត្ថភាពផលិតព៌ត៌មានដែលមានគុណភាព។
យ៉ាងណាក៏ដោយ ឯកឧត្តមក៏បានរំលឹកដែរថា ក្រមសីលធម៌-វិជ្ជាជីវៈ វាជាអាវក្រោះ របស់អ្នកយកព័ត៌មានមិនអាចខ្វះបាន ក្នុងការពង្រឹងទំនាក់ទំនងជាមួយប្រភពអ្នកផ្តល់ព័ត៌មាន រួមផ្សំដោយភាពឈ្លាសវៃ និងគំនិតច្នៃប្រឌិតផងដែរ។ ការផលិតបានព័ត៌មានគ្រប់ជ្រុងជ្រោយ ដែលវាជាព័ត៌មានពិត លឿន ប្លែក ទុកចិត្តបាន គឺជាការនាំមកនូវសុខដុមរូបនីយកម្មនៃសង្គមជាតិ ក្រោមការទទួលយល់ជ្រាបរបស់ប្រជាជន។ តួយ៉ាងករណីក្នុងបរិបទនៃវិបត្តិកូវីដ-១៩ជាដើម អ្នកយកព័ត៌មានបានចូលរួមយ៉ាងសកម្ម ក្នុងការទប់ស្កាត់ ការរីករាលដាលក្នុងសហគមន៍ នៃជំងឺដ៏កាចសាហាវមួយនេះ ដែលកន្លងមកនេះ អ្នកយកព័ត៌មាន ក៏បានដើរតួនាទីយ៉ាងសំខាន់ លើការងារគាំទ្រ និងបម្រើគោលនយោបាយរបស់រាជរដ្ឋាភិបាលលើគ្រប់វិស័យ រួមមាន នយោបាយ យោធា សេដ្ឋកិច្ច សង្គម វប្បធម៌ និងសាសនា ជាដើម៕
អត្ថបទ និងរូបភាព៖ លោក ងិន គឹមឡេង
កែសម្រួល៖ លោក សេង ផល្លី
