លោក ង៉ាន់ ភិរុណ អភិបាលរងខេត្តសៀមរាប បានជំរុញដល់មន្ត្រី នៃមន្ទីរបរិស្ថានខេត្ត បន្តខិតខំទប់ស្កាត់ការកាប់រានដីព្រៃក្នុងតំបន់ការពារធម្មជាតិ និង ដាំស្តារព្រៃឈើឡើងវិញក្នុងឧទ្យានជាតិព្រះជ័យវរ្ម័ន-នរោត្តម ភ្នំគូលែន” ខណៈបទល្មើសនៅតែកើតមាន ក្នុងរូបភាពផ្សេងៗ ក្នុងភូមិសាស្ត្រខេត្តសៀមរាប នេះបើតាមការលើកឡើង នាព្រឹកថ្ងៃទី០៤ ខែមីនា ឆ្នាំ២០២១ ក្នុងពិធីប្រកាសចូលកាន់មុខតំណែងមន្ត្រីរាជការ ចំនួន១៥រូប នៃមន្ទីរបរិស្ថានខេត្តសៀមរាប។
លោកអភិបាលរងខេត្ត ក៏បានថ្លែងកោតសរសើរដល់កិច្ចការពារបរិស្ថាននាពេលកន្លងមក និងកាលពីឆ្នាំ២០២០កន្លងទៅ ដូចជា ការគាំទ្របច្ចេកទេសដល់រដ្ឋបាលក្រុង-ស្រុក លើមុខងារគ្រប់គ្រងសំរាម-សំណល់រឹងតាមទីប្រជុំជន ត្រួតពិនិត្យ និងផ្តល់យោបល់លើការស្នើសុំលិខិតអនុញ្ញាតបញ្ចេញសំណល់រឹង-រាវ ក៏ដូចជាការពិនិត្យ និងផ្តល់យោបល់លើពាក្យ ស្នើសុំរៀបចំកិច្ចសន្យាការពារបរិស្ថាន សម្រាប់គម្រោងមូលនិធិឃុំ/សង្កាត់ គម្រោងអាជីវកម្មធនធានរ៉ែ និងគម្រោងសាងសង់ផ្សេងៗ ដែលជាសេវាសាធារណៈនៅ អង្គភាពច្រកចេញ-ចូលតែមួយរបស់រដ្ឋបាលខេត្តជាដើម។
លោក ស៊ុន គង់ ប្រធានមន្ទីរបរិស្ថានខេត្ត លើកឡើងថា ការប្រគល់មុខតំណែងជូនមន្ត្រីរាជការនាពេលនេះ គឺដើម្បី បន្តពង្រឹងសាមគ្គីភាពផ្ទៃក្នុង បង្កើនប្រសិទ្ធភាពការងារ ព្រមទាំងកិច្ចសហការល្អជាមួយរដ្ឋបាល ខេត្ត ព្រមទាំងមន្ទីរ-អង្គភាពនានាក្នុងខេត្ត។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
