នៅវេលាម៉ោងប្រមាណ៨ យប់ថ្ងៃទី០៤ ខែមីនា ឆ្នាំ២០២១ កម្លាំងសមត្ថកិច្ច នៃស្នងការដ្ឋាននគរបាលខេត្តសៀមរាប សហការជាមួយកម្លាំងសមត្ថកិច្ច នៃស្នងការដ្ឋាននគរបាលខេត្តបន្ទាយមានជ័យ និងកម្លាំងនាយកដ្ឋានព្រហ្មទណ្ឌនៃក្រសួងមហាផ្ទៃ បានចុះឃាត់ខ្លួនសង្ស័យម្នាក់ កំពុងស្នាក់នៅផ្ទះសំណាក់ ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ពាក់ព័ន្ធករណីរំលោភសម្លាប់នារីបុគ្គលិកកាស៊ីណូ ក្រុងប៉ោយប៉ែត ខេត្តបន្ទាយមានជ័យ កាលពី ថ្ងៃទី០២ ខែមីនា ឆ្នាំ២០២១។
លោកវរសេនីយ៍ទោ សុខ ម៉េង អ៊ាង នាយការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប បង្ហាញថា ជនសង្ស័យ មានឈ្មោះ រឿន ធារិន ភេទប្រុស អាយុ ៣៨ឆ្នាំ មុខរបរ មិនពិតប្រាកដ រស់នៅភូមិដីថ្មី សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ក្នុងករណីឃាតកម្មគិតទុក (រំលោភសម្លាប់) លើជនរងគ្រោះឈ្មោះ ហួន ស្រី ភេទស្រី អាយុ ២៣ឆ្នាំ ជាបុគ្គលិកកាស៊ីណូ ស្នាក់នៅបន្ទប់ជួល ស្ថិតនៅភូមិក្បាលស្ពាន១ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
តាមចម្លើយសារភាពរបស់ជនសង្ស័យ លោកវរសេនីយ៍ទោ សុខ ម៉េង អ៊ាង បង្ហាញឲ្យដឹងទៀតថា ជនសង្ស័យ បានលួចស្រឡាញ់ នារីរងគ្រោះ នៅអំឡុងដើមឆ្នាំ២០១៨។ លុះព្រឹក ថ្ងៃ០២ ខែមីនា ឆ្នាំ២០២១ ជនសង្ស័យបានទៅគោះទ្វារបន្ទប់ជនរងគ្រោះ ពេលនាងបើកទ្វារខ្លួនក៏បានច្រាននាងចូលក្នុងបន្ទប់ ចាប់នាងផ្តួលទៅលើការ៉ូ បានយកកូនកាំបិតភ្ជុងទៅជនរងគ្រោះ និងវាយលើជនរងគ្រោះ ទើបធ្វើសកម្មភាពរំលោភបានសម្រេចមួយលើក។
តាមចម្លើយសារភាពដដែល ជនសង្ស័យ ដោយខ្លាចជនរងគ្រោះប្ដឹង ក៏យកកាំបិតចាក់លើបំពង់កជនរងគ្រោះ បណ្ដាលឲ្យដាច់ខ្យល់ស្លាប់ភ្លាមៗ នៅនឹងកន្លែង។ បន្ទាប់មក ជនសង្ស័យបានប្រមូលយកសម្ភារៈជនរងគ្រោះ រួមមាន ទូរសព្ទដៃ ១គ្រឿង, ចិញ្ចៀន ២វង់, ខ្សែក ១ខ្សែ, ប្រាក់បាត ៦,០០០ បាត, ប្រាក់ដុល្លារ ១២០ដុល្លារ និងឡើងជិះរថយន្តឈ្មួលគេចខ្លួនមកខេត្តសៀមរាប។
វត្ថុតាងដែលសមត្ថកិច្ច ពិនិត្យឃើញក្នុងពេលប្រតិបត្តការមាន៖ កាបូបស្ពាយពណ៌ខ្មៅ១ផ្ទុក ទូរស័ព្ទ ១គ្រឿង, ខ្សែកលោហធាតុពណ៌ទង់ដែង ១ខ្សែ, ចិញ្ជៀនលោហធាតុពណ៌ទង់ដែង ២វង់, កូនកាំបិតបត់ដងលឿង១ និងខោអាវចំនួន។ បច្ចុប្បន្នជនសង្ស័យ និង វត្ថុតាងខាងលើ ត្រូវកម្លាំងសមត្ថកិច្ចខេត្តសៀមរាប ប្រគល់ជូនកម្លាំងការិយាល័យនគរបាលព្រហ្មទណ្ឌកម្រិតធ្ងន់ខេត្តបន្ទាយមានជ័យ បន្តនីតិវិធី៕
អត្ថបទ និងរូបភាព៖ លោក ជា ស្រស់
កែសម្រួល៖ លោក សេង ផល្លី
