តាមការបង្ហាញពី លោក គឺម សុធិន អគ្គនាយករងនៃអាជ្ញាធរជាតិអប្សរា នៅនៅព្រឹកថ្ងៃទី០៥ ខែមីនា ឆ្នាំ២០២១ទំនប់បុរាណមានប្រភពពីជើងភ្នំគូលែន ដល់បឹងទន្លេសាប កំពុងត្រូវបានប្រជាពលរដ្ឋ ធ្វើការជីកយកអាចម៍ដី ដែលវាបានបង្កឲ្យខូចរចនាសម្ព័ន្ធប្រភពទឹកបុរាណ។
ដើម្បីទប់ស្កាត់ករណីនេះ អាជ្ញាធរជាតិអប្សរា និងមន្ត្រី នៃមន្ទីរវប្បធម៌ និងវិចិត្រសិល្បៈខេត្តសៀមរាប ព្រមទាំងអាជ្ញាធរស្រុកសូទ្រនិគម កាលពីថ្ងៃទី០៤ ខែមីនា ឆ្នាំ២០២១ បានអញ្ជើញប្រជាពលរដ្ឋចំនួន១១គ្រួសារ ដែលមានអាជីវកម្មដុតឥដ្ឋ និងក្បឿងនៅលើខ្នងទំនប់ព្រែកស្រមោច ឬហៅថាផ្លូវសំពៅ ធ្វើការប្រជុំផ្សព្វផ្សាយ នៅសាលាឃុំដានរុន ស្រុកសូទ្រនិគម ខេត្ដសៀមរាប។ ការផ្សព្វផ្សាយនេះ បានណែនាំដល់ប្រជាពលរដ្ឋ ដែលកំពុងប្រកបអាជីវកម្មដុតឥដ្ឋ និងក្បឿងទាំងអស់ ក៏ដូចជាជូនដំណឹងដល់អាជ្ញាធរ សូមជីកអាចម៍ដីពីតំបន់ផ្សេង ព្រមទាំងចូលរួមបំផុសស្មារតីជួយថែរក្សាបុរាណដ្ឋានមួយចំនួនផ្សេងៗទៀត មានដូចជាប្រាសាទ បឹងបុរាណ ទួលបុរាណ សម្រាប់កូនចៅជំនាន់ក្រោយបានស្គាល់។
លោកអគ្គនាយករង បញ្ជាក់ថា ព្រែកជីកបុរាណនេះ សព្វថ្ងៃបានបាត់ដានខ្លះៗ នៅចំណុចជិតភ្នំ ប៉ុន្តែផ្នែកខាងក្រោម នៅមានសណ្ឋានច្បាស់ មានទឹកប្រើប្រាស់ជាព្រែកនៅឡើយ។ លោក បញ្ជាក់បន្ថែមថា កាលពីសម័យបុរាណ ព្រែកជីក នេះមានតួនាទីសំខាន់ ក្រៅពីផ្តល់ទឹកសម្រាប់កសិកម្មដល់សហគមន៍ជុំវិញ គឺជាផ្លូវដឹកជញ្ជួនថ្មពីភ្នំគូលែនមកតំបន់អង្គរ និងសម្រាប់ធ្វើជំនួញផងដែរ៕
អត្ថបទ និង រូបភាព៖ លោក យូ វង្ស និង លោក ឈិត សាវី
កែសម្រួល៖ លោក សេង ផល្លី
