នៅព្រឹកថ្ងៃទី០៥ ខែមីនា ឆ្នាំ២០២១នេះ រដ្ឋបាលខេត្តសៀមរាប បានបន្តរៀបចំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី៣ គោលដៅទី៦ ក្រុងសៀមរាប និងស្រុកពួក ដើម្បីផ្ដល់ឱកាសជូនដល់ប្រជាពលរដ្ឋ លើកឡើងនូវបញ្ហា ក៏ដូចជាសំណួរសំណូមពរផ្សេងៗមកកាន់ថ្នាក់ដឹកនាំខេត្ត និងមន្ទីរ អង្គភាពជំនាញធ្វើការដោះស្រាយ។ វេទិកានេះ មានការដឹកនាំដោយឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក លី សំរិទ្ធ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប ស្ថិតនៅក្នុងបរិវេណសាលាក្រុងសៀមរាប។
ក្នុងវេទិកាសាធារណៈនោះ បងប្អូនប្រជាពលរដ្ឋបានលើកឡើងនូវសំណួរ-សំណូមពរផ្ទាល់មាត់ចំនួន១៤ ពាក់ព័ន្ធ ទៅលើបញ្ហាដីធ្លី និង សំណង់ក្នុងតំបន់គ្រប់គ្រងដោយអាជ្ញាធរជាតិអប្សរា , ការសុំធ្វើបណ្ណសម្គាល់កម្មសិទ្ធិកាន់កាប់ដីធ្លីក្នុងតំបន់បុរាណដ្ឋាន, ការរៀបចំប្រព័ន្ធលូបង្ហូរទឹក និង ប្រព័ន្ធទឹកស្អាត, បញ្ហាបរិស្ថាន និងសំរាម តម្រូវការហេដ្ឋារចនាសម្ព័ន្ធ និង សំណូមពរសុំកំណត់ ឲ្យបានច្បាស់រវាងព្រំប្រទល់ទីទួលបុរាណដ្ឋាន និងលំនៅដ្ឋាន។
ចំពោះសំណួរ-សំណូមពរទាំង១៤ខាងលើ មន្ត្រីជំនាញមកពីមន្ទីរ-អង្គភាព-ស្ថាប័នក្នុងខេត្ត បានឆ្លើយបំភ្លឺភ្លាមៗ ជូនប្រជាពលរដ្ឋ។ ដោយឡែក ការលើកឡើងរបស់ប្រជាពលរដ្ឋ ជាលាយលក្ខណ៍អក្សរចំនួន ១៦សំណួរនិងសំណូមពរ អង្គវេទិកា នឹងយកទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្ត នឹងធ្វើការឆ្លើយតប និងជម្រាបជូនដំណឹងជាលាយលក្ខណ៍អក្សរដល់ម្ចាស់សំណួរ តាមពេលវេលាសមគួរ តាមរយៈមេឃុំ-ចៅសង្កាត់នៅមូលដ្ឋាននីមួយៗ។
ពាក់ព័ន្ធនឹងតំបន់គ្រប់គ្រងដោយអាជ្ញាធរជាតិអប្សរា លោកអភិបាលរងខេត្ត បញ្ជាក់ថា៖ ពេលកន្លងមកអាជ្ញាធរខេត្ត និង អាជ្ញាធរជាតិអប្សរា បានធ្វើការបង្រួមទំហំតំបន់បុរាណដ្ឋាន ដោយបានកាត់ឆ្វៀលជូនបងប្អូនប្រជាពលរដ្ឋ ជាបន្តបន្ទាប់។ ជាមួយនោះ លោក ក៏បានជំរុញដល់អាជ្ញាធរក្រុងសៀមរាប សហការជាមួយអង្គភាព-ស្ថាប័នជំនាញ ចុះសិក្សានិងកំណត់ លើតំបន់ ដែលគ្រប់គ្រងដោយអាជ្ញាធរជាតិអប្សរា ដើម្បីស្វែងយល់ឱ្យច្បាស់នូវតំបន់ទីទួលបុរាណ និងតំបន់ណា ដែលមានភាពមិនច្បាស់លាស់ជាត្រពាំង ឬទីទួលបុរាណ ដើម្បីបង្កលក្ខណៈងាយស្រួល ដល់ប្រជាពលរដ្ឋអាស្រ័យផល និងរស់នៅស្របច្បាប់ ក៏ដូចជាសម្រួលដល់ការគ្រប់គ្រងរបស់អាជ្ញាធរជាតិអប្សរា។
ដោយឡែក ក្នុងនាមអាជ្ញាធរខេត្ត លោក លី សំរិទ្ឋ ក៏បានណែនាំដល់រដ្ឋបាលក្រុង-ស្រុក៖ ត្រូវរៀបចំសណ្តាប់ធ្នាប់សាធារណៈ នៅតាមដងផ្លូវ ទីប្រជុំជន ធ្វើយ៉ាងណាថែរក្សាអនាម័យ បរិស្ថាន និងពង្រឹងសមត្ថភាពគ្រប់គ្រងសំរាមនៅក្នុងមូលដ្ឋានរបស់ខ្លួន។ ចំពោះបញ្ហាគ្រឿងញៀន និងល្បែងស៊ីសងគ្រប់ប្រភេទ អាជ្ញាធរក្រុង-ស្រុក ត្រូវធ្វើការទប់ស្កាត់ និងបង្ក្រាបលុបបំបាត់ ចៀសវាងអសន្តិសុខនៅក្នុងមូលដ្ឋានខ្លួន។
លោក លី សំរិទ្ឋ រពឹងថា៖ ក្រោយពីវិបត្តិកូវីដ-១៩ និង ក្រោយពេលការស្ថាបនាផ្លូវទាំង៣៨ខ្សែរួចរាល់ ទីក្រុងសៀមរាបនឹងប្រែក្លាយទៅជាទីក្រុងទំនើប ជាតំបន់ស្នូលនៃប៉ូលសេដ្ឋកិច្ចអភិវឌ្ឍជាតិ និងជាគោលដៅទេសចរណ៍វប្បធម៌ ប្រវត្តិសាស្រ្ត។
មានប្រសាសន៍បិទអង្គវេទិកានោះ ឯកឧត្តមប្រធានក្រុមប្រឹក្សាខេត្ត គូសបញ្ជាក់ថា៖ វេទិកាសាធារណៈនេះ ពិតជាជំរុញដល់ដល់ការអនុវត្តមុខងាររបស់ខ្លួន កាន់មានប្រសិទ្ធភាពបន្ថែមទៀត ស្របតាមច្បាប់លិខិតបទដ្ឋានគតិយុត្តនៅថ្នាក់មូលដ្ឋាន។ ក្នុងនោះការពិនិត្យ និងដោះស្រាយបញ្ហា សំណូរ-សំណូមពរបស់ប្រជាពលរដ្ឋ នឹងជួយជំរុញដល់ការអភិវឌ្ឍសេដ្ឋកិច្ចសង្គម សំដៅលើកកម្ពស់គុណភាពជីវិត កាត់បន្ថយភាពក្រីក្ររបស់បងប្អូនប្រជាពលរដ្ឋនៅតាមបណ្ដាក្រុង-ស្រុក នៃខេត្តសៀមរាបទាំងមូល។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
