ការចូលរួមរបស់ស្រ្តីនៅក្នុងមូលដ្ឋាន គឺមានសារៈសំខាន់ណាស់ក្នុងការបង្ហាញឲ្យឃើញពីភាពក្លាហាន ពីតម្លៃរបស់ស្រ្តី ថាអាចធ្វើបានមិនចាញ់បុរសនោះទេ ។ ការគាំទ្រ ការលើកទឹកចិត្ត ការបង្កើនសមត្ថភាព និងការលើកកម្ពស់ភាពជាអ្នកដឹកនាំដល់ស្រ្តីដើម្បីសមភាពយេនឌ័រនៅក្នុងសហគមន៍ គឺបានជួយឲ្យស្រ្តីមានសមត្ថភាពគ្រប់គ្រាន់ក្នុងដោះស្រាយបញ្ហាជាច្រើននៅក្នុងសហគមន៍ជាមួយស្រ្តីដូចគ្នា ជាពិសេសក្មេងស្រីដែលងាយរងគ្រោះដោយអំពើហិង្សា ឬការបំពានផ្លូវភេទជាដើម ។
លោកស្រីសូ ស្រីណុច រស់នៅក្នុងឃុំកណ្ដែក ស្រុកប្រាសាទបាគង បានលើកឡើងថា ស្រ្តីពិតជាមានភាពក្លាហានជាងបុរស ក្នុងការចូលរួមជាមួយសហគមន៍ ដើម្បីអភិវឌ្ឃក្នុងមូលដ្ឋាន បើសិនជាមានការផ្ដល់នូវឱកាសដល់ពួកគាត់បានចូលរួម និងមានការលើកទឹកចិត្ត ។
លោកស្រី សូ ស្រីណុច បានលើកឡើងថា៖
(មនុស្សស្រីគឺមានភាពក្លាហានជាងមនុស្សប្រុស ហើយនិយាយរួមខ្ញុំឃើថា តាមសាលារៀនភាគច្រើន ច្រើនតែស្រ្តីឆ្លាតជាងប្រុស ដល់ពេលអញ្ចឹង ភាគច្រើន ច្រើនតែគេមិនសូវឲ្យតម្លៃដល់មនុស្សស្រី ដូចរឿងអីមួយអញ្ចឹង គេថាមនុស្សស្រីមានភាពទន់ខ្សោយច្រើន ប៉ុន្តែអត់ទេ នឹងមកពីយើងអត់ឲ្យឱកាសគ្នា ។ ឥលូវអត់ទេ ស្រ្តី និងប្រុស គឺមានសិទ្ធិស្មើគ្នា )។
ពាក់ព័ន្ធទៅនឹងការចូលរួមរបស់ស្ត្រីជាមួយសហគមន៍ និងដើម្បីក្លាយខ្លួនជាអ្នកដឹកនាំនៅក្នុងមូលដ្ឋាន ឬកន្លែងណាមួយ លោកស្រី ជ្រះ ធីតា ជំទប់ទី១ ឃុំកន្ទ្រាំង បានមានប្រសាសន៍ថា ៖
(ទាក់ទងទៅនឹងស្រ្តីដែលគាត់ចង់ក្លាយជាអ្នកដឹកនាំនៅមូលដ្ឋាន ទី១ ត្រូវពង្រឹងសមត្ថភាពតាមរយៈការចូលរួមសកម្មភាពសង្គម ដូចជាការចូលរួមក្នុងកិច្ចប្រជុំផ្សព្វផ្សាយនៅមូលដ្ឋាន ដូចជាការពង្រឹងជាមួយនឹងអង្គការដៃគូ ក៏ដូចជាស្ថាប័នពាក់ព័ន្ធ ចុះទៅរកស្រ្តីមួយចំនួនដែលធ្វើជាអ្នកស្ម័គ្រចិត្ត ក៏ដូចជាគម្រោងថ្នាក់ឃុំដែលជ្រើសរើសមួយចំនួន គាត់សុំតាមរយៈខ្ញុំផ្ទាល់ ឬតាមរយៈដាក់ពាក្យ ហើយស្រ្តីមួយចំនួនដំបូងគាត់ថា គាត់ទៅអត់រួចទេ គាត់ថាគម្រោងនេះខ្ញុំទៅអត់រួចមក ខ្ញុំសុំលាហើយ ប៉ុន្តែក្រោយការជំរុញរបស់យើង អ្វីក៏ដោយ ការធ្វើតែងតែមានឧបសគ្គ តែយើងត្រូវតែជម្នៈឧបសគ្គដោយការខិត្តខំប្រឹងប្រែង មានខ្ញុំ យើងចូលរួមដោះស្រាយទាំងអស់គ្នា បានន័យថា យើងជួយជំរុញគាត់ លើកទឹកចិត្តគាត់ ជួយគាត់ ធ្វើម៉ិចឲ្យគាត់បានឈរនៅថ្នាក់មូលដ្ឋានអាចជួយដោះស្រាយបញ្ហាពលរដ្ឋមួយចំនួន)។
លោកស្រី ជ្រះ ធីតា បានបញ្ជាក់ថា ការលើកកម្ពស់សមត្ថភាពស្រ្តី គឺយើងមិនអាចធ្វើត្រឹមអាជ្ញាធរតែម្នាក់ឯងនោះទេ ទាល់តែមានការចូលរួមពីអង្គការដៃគូ ក៏ដូចជាស្ថាប័នដែលពាក់ព័ន្ធទាំងអស់ គាំទ្រ ជួយជំរុញ និងលើកទឹកចិត្តដល់ស្រ្តីឲ្យក្លាយជាថ្នាក់ដឹកនាំនៅមូលដ្ឋាន ដូចជាថ្នាក់ឃុំ ថ្នាក់ភូមិ ឬមិនទ្រាំតែជាថ្នាក់ដឹកនាំតាមស្ថាប័នផ្សេងៗនោះទេ ប៉ុន្តែ គឺជាអ្នកដឹកនាំនៅក្នុងគ្រួសារដ៏ល្អ ហើយរឹងមាំ ផងដែរ ។
លោកស្រីបានបន្តថា សម្រាប់ស្រ្តីមួយចំនួនដែលគាត់មិនមានភាពក្លាហានធ្វើជាអ្នកដឹកនាំបាន ព្រោះពួកគាត់ខ្វះខាតផ្នែកចំណេះដឹង ភាពក្លាពនៅមានកម្រឹត ជាពិសេស នៅតាមជនបទ ពួកគាត់គិតត្រឹមការងារផ្ទះ និងការប្រកបមុខរបររកស៊ីតែរៀងៗខ្លួន ។ ហើយការចូលរួមរបស់ស្រ្តីដើម្បីធ្វើជាអ្នកដឹកនាំមានប្រហែលជា៣០% ប៉ុណ្ណោះ ។
អត្ថបទៈ ទិត្យ សំបូរ
