ដោយមានការសហការគាំទ្រពីរដ្ឋបាលខេត្តសៀមរាប ក្រុមប្រឹក្សាខេត្ត និងរដ្ឋបាលស្រុកស្រីស្នំ នៅព្រឹកថ្ងៃទី០៧ ខែមីនា ឆ្នាំ២០២១នេះ ជាថ្ងៃស្របទិវាអន្តរជាតិនារី ៨មីនា ដែលជាព្រឹត្តិការណ៍ជាសកលនោះ ក្រុមយុវជនថ្នាក់ខេត្តចុះជួយស្រុកស្រីស្នំ បានរៀបចំកម្មវិធីជិះកង់ ក្រោមប្រធានបទ តោះជិះកង់លេងនៅស្រុកស្រីស្នំ ដែលចាប់ផ្ដើមពីសាលាស្រុកស្រីស្នំ ឆ្ពោះទៅទំនប់ធនធានទឹកស្ទឹងស្រែង១ ស្ថិតនៅភូមិដំណាក់ដំរី ឃុំស្លែងស្ពាន ក្នុងចំងាយប្រមាណ១៧គីឡូម៉ែត្រ ដោយមានអ្នកចូលរួមពីសំណាក់ឯកឧត្ដម លោក លោកស្រី ជាសមាជិកក្រុមប្រឹក្សាខេត្ត អនុប្រធាន និងសមាជិកក្រុមការងារថ្នាក់ខេត្តចុះជួយស្រុកស្រីស្នំ មន្ត្រីនៃរដ្ឋបាលស្រុកស្រីស្រីស្នំ និង ក្រុមយុវជន ប្រមាណជា១៥០នាក់ ។
លោក ហ៊ន់ ឬទ្ឋិ អភិបាលស្រុកស្រីស្នំ មានប្រសាសន៍ថា កម្មវិធីនេះ ធ្វើឡើងក្នុងគោលបំណងសំខាន់ៗ ចំនួន៤ គឺ ៖ ១. ដើម្បីអបអរសាទរទិវាអន្តរជាតិនារី ៨មីនា និង រួមគ្នាលើកកម្ពស់សិទ្ធិនារី , ២. ផ្សព្វផ្សាយពីតំបន់គោលដៅទេសចរណ៍នៅក្នុងស្រុកស្រីស្នំទាំងមូល ទៅដល់អ្នកទេសចរជាតិនិងអន្តរជាតិ , ៣.កៀងគរកម្លាំងយុវជនឱ្យចូលរួមក្នុងការងារសង្គមលើការអភិវឌ្ឍន៍ និង៤. លើកកម្ពស់ចំណងមិត្តភាព សាមគ្គីភាព និងជួយលើកស្ទួយវិស័យកីឡាផ្នែកនារីក្នុងស្រុកស្រីស្នំ ។
លោកអភិបាលស្រុក មានប្រសាសន៍ទៀតថា ស្រុកស្រីស្នំ មានតំបន់ប្រាសាទ មានព្រៃសហគមន៍ មានរមណីយដ្ឋានធម្មជាតិ និងរមណីយដ្ឋានកែច្នៃជាច្រើនផងដែរ ដូចជាទំនប់ស្ទាក់ទឹកស្លែងស្ពាន , ទំនប់ធនធានទឹកស្ទឹងស្រែង១ ដែលជាតំបន់មួយកំពុងពេញនិយម ចំពោះបងប្អូនប្រជាពលរដ្ឋ ពីជិតឆ្ងាយ មកងូតទឹកលេងកម្សាន្តនៅទីនេះនារដូវវស្សា ។
មានប្រសាសន៍ក្នុងឱកាសនោះ ឯកឧត្តម សួស សុខចាន់ សមាជិកក្រុមប្រឹក្សាខេត្តសៀមរាប បានបង្ហាញនូវចំណាប់អារម្មណ៍នៃកម្មវិធីជិះកង់នេះថា ជាការឆ្លុះបង្ហាញឱ្យឃើញពីស្មារតីសហការល្អរវាងក្រុមការងារយុវជនចុះជួយស្រុកជាមួយនឹងអាជ្ញាធរមូលដ្ឋាន និងបងប្អូនប្រជាពលរដ្ឋនៅស្រុកស្រីស្នំនេះ ដែលសកម្មភាពនេះជាកត្តាមួយជួយ ជំរុញនិងផ្សព្វផ្សាយសក្តានុពលទេសចរណ៍ដែលមានស្រាប់នៅក្នុងភូមិសាស្ត្រនេះទៅដល់អ្នកទេសចរទាំងជាតិនិងអន្តរជាតិតាមរយៈព្រឹត្តិការណ៍និងការងារសង្គមផ្សេងៗ ដើម្បីឱ្យពួកគាត់ចាប់អារម្មណ៍មកទស្សនាកំសាននៅតំបន់នេះ។
ឯកឧត្តមមានប្រសាសន៍ទៀតថា តាមរយៈសកម្មភាពនេះ បានកត់សំគាល់ឃើញថា យុវជនជាចលករនិងជាសសរទ្រូងដ៍រឹងមាំរបស់ប្រទេសជាតិ ហេតុនេះយុវជនដើរតួនាទីសំខាន់ណាស់ក្នុងការជួយជំរុញដល់យុវជនដូចគ្នា និងសហការជាមួយអាជ្ញាធរមូលដ្ឋាន ដើម្បីជួយក្នុងកិច្ចការងារសង្គមផ្សេងៗ ជាពិសេសក្រុមការងារយុវជនចុះជួយមូលដ្ឋាននានានៅក្នុងខេត្តសៀមរាប តែងតែសហការចូលរួមក្នុងការងារសង្គមជាច្រើន និងថែមទាំងបានរួមគ្នាបំផុសចលនា ដល់មហាជនទូទៅឱ្យចូលរួមក្នុងការងារមនុស្សធម៌ ការងារអនាម័យបរិស្ថាន ជួយផ្សព្វផ្សាយការងារទេសចរណ៍តាមសហគមន៍នានា ផងដែរ។
លោកស្រី ឈន សុគន្ធា អនុប្រធានក្រុមការងារយុវជនខេត្តចុះជួយស្រុកស្រីស្នំ បានថ្លែងថា កម្មវិធីជិះកង់នេះ គឺផ្តើមចេញពីឆន្ទៈរបស់ក្រុមការងារយុវជនចុះជួយស្រុកនេះ តាមរយៈការគាំទ្រនិងសហការពេញទំហឹងពីអាជ្ញាធរស្រុក និងដោយពិនិត្យឃើញជាក់ស្តែងនូវសក្តានុពលគោលដៅទេសចរណ៍មានអំណោយផលល្អ តែការផ្សព្វផ្សាយទៅដល់អ្នកទេសចរនៅមានកម្រិត ហេតុនេះកម្មវិធីនេះ គឺជាឱកាសមួយដើម្បីជួយផ្សព្វផ្សាយសក្តានុពលទេសចរណ៍ដែលមានស្រាប់នៅស្រុកនេះ ចែកជូនទៅដល់សាធារណៈជនទូទៅផង រួមគ្នាលើកស្ទួយវិស័យកីឡាផ្នែកស្ត្រីក្នុងស្រុក ។
លោកស្រី ឈន សុគន្ធា បានឲ្យដឹងទៀតថា កម្មវិធីនេះ ជាផ្នែកមួយដើម្បីអបអរសាទរទិវាអន្តរជាតិនារី ៨មីនា រួមគ្នាលើកកម្ពស់សិទ្ធិនារីដែលឆ្នាំ២០២១នេះ ប្រព្រឹត្តទៅក្រោមប្រធានបទ “ស្រ្តីនិងការអភិវឌ្ឍក្នុងបរិការណ៍កូវីដ-១៩” ក្នុងគោលបំណងរំលេចពីការចូលរួមចំណែកដ៏ចម្បងរបស់ស្រ្តី ក្នុងកិច្ចអភិវឌ្ឍនៅគ្រប់កម្រិត គ្រប់វិស័យ និងគ្រប់កាលៈទេសៈ ជាពិសេសវក្នុងអំឡុងនិងក្រោយវិបត្តិកូវីដ-១៩ ស្របតាមការគាំទ្រនិងយកចិត្តទុកដាក់របស់រាជរដ្ឋាភិបាល ដូចមានកំណត់នៅក្នុងយុទ្ធសាស្ត្រចតុកោណដំណាក់កាលទី៤ ដែលចាត់ទុកស្ត្រីជា ឆ្អឹងខ្នងនៃសេដ្ឋកិច្ចនិងសង្គមជាតិ ។
សូមជំរាបថា៖ បន្ទាប់ពីបញ្ចប់ការជិះកង់មក ក៏មានការរៀបចំការប្រកួតបាល់ទាត់នារីសមជើង ជាលក្ខណៈមិត្តភាព ដែលមានកីឡាការីនី២ នៃវិទ្យាល័យ២៨មករាស្រុកស្រីស្នំ ហើយតាមរយៈលទ្ធផលគឺក្រុមលេខ១ ទទួលបានថវិកាចំនួន១លាន៦ម៉ឺនរៀល និងក្រុមលេខ២ទទួលបាននួន៧៨ម៉ឺនរៀល ដែលថវិកាទាំងនេះ បានមកពីការចូលរួមរបស់ក្រុមអ្នកជិះកង់រួមគ្នាលើកកំពស់សិទ្ឋិនារី និងលើកស្ទួយវិស័យកីឡាផ្នែកនារី និង ឯកឧត្ដម ម៉ៅ ដារិន សមាជិកក្រុមប្រឹក្សាខេត្ត បានឧបត្ថម្ភទឹកដោះគោស្រស់ « តេជោសែន ឫស្សី ត្រឹប » មួយចំនួន ដែលវជាផលិតផលខ្មែរ ផលិតនៅក្នុងស្រុកឆែប ខេត្តព្រះវិហារ ។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
