នាព្រឹកថ្ងៃទី០៨ ខែមីនា ឆ្នាំ២០២១ រដ្ឋបាលខេត្តសៀមរាប មានរៀបចំពិធីសំណេះសំណាលសួរសុខទុក្ខ រៀបចំម្ហូប អាហារ និងផ្តល់អំណោយ ដល់កុមារគថ្លង់ និងកុមារពិការភ្នែក នៅវិទ្យាល័យអប់រំពិសេសសៀមរាប ស្ថិតក្នុងសង្កាត់ស្លក្រាម ក្រុងសៀមរាប ដើម្បីអបអរសាទរខួបលើកទី១១០ ទិវាអន្តរជាតិនារី ៨មីនា‘ ក្រោមប្រធានបទ“ស្ត្រី និងការអភិវឌ្ឍន៍ក្នុងបរិយាការណ៍កូវីដ-១៩”។
ពិធីអញ្ជើញជាអធិបតីពី ឯកឧត្តម អ្នកឧកញ៉ា សៀង ណាំ អ្នកតំណាង រាស្ត្រមណ្ឌលសៀមរាប ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាលខេត្តសៀមរាប និងចូលរួមពីសំណាក់ ឯកឧត្តម-លោកជំទាវ លោក-លោកស្រី សមាជិក-សមាជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពជុំវិញខេត្តនិង ថ្នាក់ដឹកនាំសហភាព សហព័ន្ធ យុវជនកម្ពុជាខេត្តសៀមរាប សាខាកាកបាទក្រហមខេត្តផងដែរ។
តាមរបាយការណ៍របស់លោកស្រី ហុង ធារី នាយិកាវិទ្យាល័យអប់រំពិសេសសៀមរាប សាលាមួយនេះ បង្កើតឡើងនៅថ្ងៃទី០១ ខែធ្នូ ឆ្នាំ២០០០ ក្រោមកិច្ចសហការរវាងអង្គការគ្រួសារថ្មី និងក្រសួងអប់រំយុវជននិងកីឡា ដោយសាលាបានទទួលបង្រៀន និងអប់រំ តែកុមារពិការពីរប្រភេទប៉ុណ្ណោះឱ្យចូលរៀន គឺកុមារគថ្លង់ និងកុមារពិការភ្នែក។
ព័ត៌មានជាតិ ថ្មីៗ
លុះដល់ចុងឆ្នាំ២០១៧ អង្គការគ្រួសារថ្មីបានផ្ទេរការគ្រប់គ្រងសាលានេះ ជូនក្រសួងអប់រំ យុវជន និងកីឡា ដោយមានចាប់ពីថ្នាក់មត្តេយ្យ ដល់ថ្នាក់ទី១២។ នាពេលនោះ ក្រសួងអប់រំ ក៏បានប្តូរឈ្មោះសាលាទៅជា វិទ្យាល័យអប់រំពិសេសសៀមរាប ដែលសិស្សគថ្លង់ និងពិការភ្នែក ទទួលបានកម្មវិធីសិក្សាស្របតាមក្រសួងអប់រំ ដោយបកប្រែពីសៀវភៅសិក្សាគោលគ្រប់មុខវិជ្ជា ជាភាសាសញ្ញាខ្មែរ សម្រាប់បង្រៀនសិស្សគថ្លង់ និងអក្សរប្រៃយ៍ សម្រាប់បង្រៀនសិស្សពិការភ្នែក និងសិក្សាពេញមួយថ្ងៃ ។ វិទ្យាល័យអប់រំពិសេសនេះ មានអគារចំនួន១២ខ្នង សម្រាប់ថ្នាក់រៀនផង និងសម្រាប់សិស្សមកពីឆ្ងាយៗស្នាក់នៅផងដែរ ។
ឯកឧត្តម ទៀ សីហា ខួបលើកទី១១០ នៃទិវាអន្តរជាតិនារី ៨មីនា នាពេលនេះ បានបង្ហាញយ៉ាងច្បាស់ពីតម្លៃ និងតួនាទីស្រ្តី ដែលមិនអាចខ្វះបាន នៅក្នុងសង្គមជាតិ នៅគ្រប់កាលៈទេសៈ។ ទន្ទឹមនោះ រាជរដ្ឋាភិបាលកម្ពុជា តែងតែយកចិត្តទុកដាក់ខ្ពស់លើ សមភាពយេនឌ័រ ពង្រឹងភាពអង់អាចក្លាហានរបស់កុមារី ដើម្បីអាចឱ្យពួកគេ ក្លាយជាកម្លាំងចលករដ៏សំខាន់ ក្នុងកិច្ចអភិវឌ្ឍសង្គម និងសេដ្ឋកិច្ច តាមរយៈការដាក់ចេញនូវគោលនយោបាយជាតិស្ដីពី សមភាពយេនឌ័រ សម្រាប់ជាផែនទីបង្ហាញផ្លូវ ក្នុងការលើកកម្ពស់ និងបញ្ជ្រាបយេនឌ័រ នៅតាមស្ថាប័ន។
ឯកឧត្តមអភិបាលខេត្ត ក៏បានបន្ថែមថា ជាមួយនោះ ជារៀងរាល់ឆ្នាំ សម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងារថ្នាក់ជាតិចុះមូលដ្ឋានខេត្តសៀមរាប និងថ្នាក់ដឹកនាំខេត្ត តែងតែយកថ្ងៃនារីអន្តរជាតិ ៨ មីនា អញ្ជើញជួបសំណេះសំណាល សួរសុខទុក្ខ រៀបចំអាហារ ចែកអំណោយដល់កុមារគថ្លង់ និងពិការភ្នែក រួមទាំងលោកគ្រូ អ្នកគ្រូ និងបុគ្គល នៅវិទ្យាល័យអប់រំពិសេសសៀមរាបនេះផងដែរ។ លើសពីនោះ សម្ដេចពិជ័យសេនា ទៀ បាញ់ និងលោកជំទាវ ក៏បានកសាងអគារ និងការឧត្ថម្ភផ្សេងៗ សម្រាប់ជំរុញ និងគាំទ្រដល់ដំណើរការសិក្សាសាលា។
ឯកឧត្តម ក៏បានណែនាំ និងក្រើនរម្លឹក ដល់ក្មួយៗជាកុមារគថ្លង់ និងពិការភ្នែកក្នុងមណ្ឌលទាំងអស់ ត្រូវខិតខំសិក្សារៀនសូត្រ និង ស្តាប់នូវដំបូន្មានរបស់លោកគ្រូ អ្នកគ្រូ មាតាបិតា អាណាព្យាបាល ព្រមទាំងចាកចេញ ឱ្យ ឆ្ងាយពីគ្រឿងញៀន ។
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក សេង ផល្លី
