តាមការឲ្យដឹងពី លោក ក្រុស សារ៉ាត់ ប្រធានមន្ទីរសុខាភិបាល ខេត្ដសៀមរាប នៅថ្ងៃទី០៨ ខែមីនា ឆ្នាំ២០២១ រយៈពេល០៧ថ្ងៃ ថ្ងៃទី០១ដល់ថ្ងៃទី០៧ខែមីនានេះ មានមន្ដ្រីរាជការ និងកងកម្លាំងប៉ូលីសក្នុងខេត្តសៀមរាប ជិត៣ពាន់នាក់ ទទួលបានការចាក់វ៉ាក់សាំងការពារជំងឺកូវីដ-១៩ លើកទី១ ពីមន្ទីរពេទ្យបង្អែកខេត្ដសៀមរាប។
លោកប្រធានមន្ទីរសុខាភិបាលខេត្ដ បន្ថែមថា វ៉ាក់សាំងដែលបានចាក់ជូនមន្ដ្រីនាពេលនេះ មានឈ្មោះថា Sinopharm Beijing និងមានអ្នកចុះឈ្មោះចាក់វ៉ាក់សាំងជាង៣ពាន់នាក់។
លោក បញ្ជាក់ថា វ៉ាក់សាំងការពារជំងឺកូវីដ-១៩ លើកទី១នេះ មានចំនួន៥ពាន់ដូស ដែលនឹងបន្ដចាក់ជូនមន្ដ្រីរាជការ និងកងកម្លាំងប៉ូលីសក្នុងខេត្ត រហូតដល់អស់វ៉ាក់សាំង។
សូមជម្រាបថា យុទ្ធនាការចាក់វ៉ាក់សាំងការពារជំងឺកូវីដ-១៩ លើកទី១ ដល់មន្ដ្រីរាជការ និងកងកម្លាំងប៉ូលីសក្នុងខេត្ត លើកទី១នេះ ធ្វើឡើងនៅទីតាំងចំនួន៥កន្លែង រួមមាននៅមន្ទីរពេទ្យបង្អែកខេត្ដសៀមរាប មន្ទីរពេទ្យបង្អែកស្រុកក្រឡាញ់ មន្ទីរពេទ្យបង្អែកស្រុកពួក មន្ទីរពេទ្យបង្អែកស្រុកអង្គរជុំ និងមន្ទីរពេទ្យបង្អែកស្រុកសូទ្រនិគម៕
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
