ចាប់ពីថ្ងៃទី០៩ ខែមីនា ឆ្នាំ២០២១នេះ ឯកត្តម ទៀ សីហា អភិបាលខេត្តសៀមរាប បានណែនាំដល់ អាជ្ញាធរនៅតាមស្រុកចំណុចព្រំប្រទល់ខេត្ត រៀបចំប៉ុស្តិត្រួតពិនិត្យសុខភាពបឋម និងស្រង់ស្ថិតិប្រជាពលរដ្ឋ ដែលធ្វើដំណើរចេញពីរាជធានីភ្នំពេញ និងបណ្ដាខេត្តមួយចំនួន ដើម្បីបង្ការទប់ស្កាត់ ការរីករាលដាលនៃជំងឺកូវីដ-១៩ ក្នុងសហគមន៍។
ឯកត្តមអភិបាលខេត្ត គូសបញ្ចាក់ថា ទីតាំងដែលនឹងធ្វើការត្រួតពិនិត្យសុខភាពបឋម មាននៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ។ រីឯការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់បានជាធម្មតា ដោយមិនមានការហាមឃាត់នោះឡើយ ដោយគ្រាន់តែមានការត្រួតពិនិត្យសុខភាពបឋម ដោយមិនមានតម្រូវឲ្យធ្វើចត្តាឡីស័ក លើកលែងតែករណីសង្ស័យ។
ទន្ទឹមនោះ អាជ្ញាធរខេត្ត ក៏បានអំពាវនាវដល់ បងប្អូនប្រជាពលរដ្ឋដែលឆ្លងកាត់ប៉ុស្តិត្រួតពិនិត្យចូលរួមអនុវត្តការស្កែន QR Code “ទប់ស្កាត់ ជំងឺកូនវីដ១៩” និងអនុវត្តន៍តាមការណែនាំ របស់ក្រុមការងារដែលប្រចាំការនៅតាមទីតាំងនីមួយៗកុំបីខាន។
អត្ថបទ និង រូបថត ៖ លោក សេង ផល្លី
ប្រភព៖ រដ្ឋបាលខេត្តសៀមរាប
