នៅរសៀលថ្ងៃទី០៩ ខែមីនា ឆ្នាំ២០២១នេះ សាលារៀនមួយចំនួន ១៩កន្លែង ស្ថិតក្នុងឃុំចំនួន៤ នៃស្រុកពួក ខេត្តសៀមរាប ត្រូវបានផ្អាកជាបណ្ដោះអាសន្ន រយៈពេល ២សប្ដាហ៍ នេះបើតាមលិខិតមួយច្បាប់របស់ការិយាល័យអប់រំ យុវជន និងកីឡា ស្រុកពួក។
លិខិតដដែល បង្ហាញថា សាលារៀនដែលផ្អាកដំណើរការទាំងនោះ រួមមាន៖ ឃុំខ្នាត ចំនួន ០៦សាលារៀន, ឃុំពួក ចំនួន ០៥សាលារៀន, ឃុំសំរោយា ចំនួន០៣សាលារៀន, និងឃុំកែវពណ៌ ចំនួន០៥សាលារៀន។
ការសម្រេចផ្អាកនេះ យោងទៅតាមការពិភាក្សាជាមួយលោកអភិបាល នៃគណៈអភិបាលស្រុក ដើម្បីបង្ការទប់ស្កាត់ការរីករាលដាលនៃជំងឺកូវីដ-១៩ ក្នុងសហគមន៍។
គួរជម្រាបថា ការផ្អាកដំណើរការសាលារៀន នៅក្នុងឃុំចំនួន០៤ ក្នុងស្រុកពួក ខាងលើ ស្របពេលរដ្ឋបាលខេត្តសៀមរាប បានណែនាំដល់ អាជ្ញាធរនៅតាមបណ្ដាស្រុកនៅតាមចំណុចព្រំប្រទល់ខេត្ត រៀបចំប៉ុស្តិត្រួតពិនិត្យសុខភាពបឋម និងស្រង់ស្ថិតិប្រជាពលរដ្ឋ ដែលធ្វើដំណើរចេញពីរាជធានីភ្នំពេញ និងបណ្ដាខេត្តមួយចំនួន ដែលអាចមានហានិភ័យនៃការរីករាលដាលនៃជំងឺកូវីដ-១៩ ក្នុងសហគមន៍។
អត្ថបទ ៖ លោក សេង ផល្លី
