ចាប់ពីថ្ងៃទី៧ ដល់ថ្ងៃទី៩ ខែមីនា ឆ្នាំ២០២១នេះ អាជ្ញាធរខេត្តសៀមរាប បានទទួលប្រជាពលរដ្ឋខ្មែរ ត្រឡប់ពីបរទេសជាង ៧០០នាក់ ដែលបានធ្វើចត្តាឡីស័ក ត្រឡប់មកកាន់ខេត្តសៀមរាបវិញ ស្របតាមការប្រកាសរបស់រាជរដ្ឋាភិបាល សម្រេចបិទការធ្វើចត្តាឡីស័ក នៅតាមព្រំដែន សម្រាប់អ្នកដែលមានសុខភាពធម្មតា។
លោកស្រី យូ សុភា អភិបាលរងខេត្តសៀមរាប បានឲ្យដឹងនៅល្ងាចថ្ងៃទី៩ ខែមីនា ឆ្នាំ២០២១នេះថា ប្រជាពលរដ្ឋបានធ្វើចត្តាឡីស័កជាង៣០០រយនាក់ មកពីតំបន់ធ្វើចត្ដាឡីស័កតាមព្រំដែនកម្ពុជា-ថៃ ក្នុងខេត្ដបន្ទាយមានជ័យ ខេត្ដបាត់ដំបង និងខេត្ដប៉ៃលិន និងជាង ៤០០នាក់ទៀត ចេញពីតំបន់ចត្ដាឡីស័ក នៅតាមព្រំដែនកម្ពុជា-ថៃ នៃខេត្ត ឧត្ដរមានជ័យ ។
លោកស្រីអភិបាលរងខេត្ត បញ្ជាក់ថា ពួកគាត់ទាំងនោះ ភាគច្រើនបានធ្វើតេស្តរកជំងឺកូវីដ-១៩ លើកទី១ និងបានចត្ដាឡីស័កជាង ១០ថ្ងៃរួចហើយ។ ទោះជាយ៉ាងនេះ ប្រជាពលរដ្ឋទាំងអស់នេះ ក៏នឹងត្រូវធ្វើតេស្តសុខភាពម្ដងទៀត បើពុំរកឃើញបញ្ហាសុខភាពណាមួយទេ ពួកគេនឹងត្រូវបញ្ជូនទៅកាន់មូលដ្ឋានស្រុករបស់ពួកគាត់វិញ។ ដោយឡែក សម្រាប់អ្នកទើបឆ្លងដែន មិនបានធ្វើចត្ដាឡីស័កនៅព្រំដែន នៃបណ្ដាខេត្ដទាំងនោះ ពួកគាត់ នឹងត្រូវធ្វើចត្ដាឡីស័ក នៅមណ្ឌលចត្ដាឡីស័ក ក្នុងក្រុងសៀមរាប។
លោកស្រី បន្ថែមថា ក្រៅពីចំនួនបី នៅមានប្រជាពលរដ្ឋខ្មែរ ត្រឡប់ពីប្រទេសថៃជាច្រើនទៀត ដែលអាជ្ញាធរត្រៀមនឹងដឹកជញ្ជូនពួកគាត់ ត្រឡប់មកខេត្ដសៀមរាប។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
