មនុស្ស ១៧នាក់ ត្រូវបានដាក់ឲ្យធ្វើចត្តាឡីស័ក បន្ទាប់ពីរកឃើញថា មានពាក់ព័ន្ធដោយផ្ទាល់ និងប្រយោល នឹងស្រ្ដីម្នាក់ មកពីខេត្តព្រះសីហនុ និងរកឃើញវិជ្ជមានជំងឺកូវីដ-១៩ នេះបើតាមការឲ្យដឹងពី លោក ស៊ីន ចាន់ថុល អភិបាលស្រុកពួក ខេត្តសៀមរាប នៅថ្ងៃទី០៩ខែមីនាឆ្នាំ២០២១។
លោកអភិបាលស្រុក បញ្ជាក់ថា នៅពេលត្រឡប់មកដល់ ភូមិព្រៃវែង ឃុំសំរោងយា ស្រុកពួក ស្ត្រីរកឃើញវិជ្ជមានជំងឺកូវីដ-១៩រូបនេះ ពុំបានធ្វើដំណើរទៅកន្លែងផ្សេងក្រៅពីផ្ទះឡើយ និងមានការពាក់ព័ន្ធជាមួយនឹងបុគ្គលជាស្ត្រីតែម្នាក់ប៉ុណ្ណោះ។ ដោយឡែក ស្ត្រីដែលពាក់ព័ន្ធរូបនោះ បានទៅហែរជំនូនមង្គលការកូនអ្នកភូមិ ក្រោយមកទើបអាជ្ញាធរស្រាវជ្រាវរកឃើញអ្នកពាក់ព័ន្ធដោយប្រយោលទាំង១៧នាក់នោះ មកធ្វើចត្តាឡីស័ក។
សូមរំលឹកថា ស្រ្តី ដែលបានធ្វើដំណើរមកពីខេត្តព្រះសីហនុរូបនោះ បានជិះរថយន្តឈ្នូល និងរថយន្តក្រុង ឆ្លងកាត់រាជធានីភ្នំពេញ មកដល់ខេត្តសៀមរាប កាលពីថ្ងៃទី០៧ ខែមីនានេះ និងត្រូវបានអាជ្ញាធរយកសំណាកទៅពិនិត្យរកជំងឺកូវីដ-១៩ នៅថ្ងៃបន្ទាប់។ បច្ចុប្បន្នស្ត្រីរូបនេះ កំពុងសម្រាកនៅមន្ទីរពេទ្យបង្អែកខេត្ដសៀមរាប។
អត្ថបទ និង រូបថត ៖ លោក បូ សាវី
កែសម្រួលអត្ថបទ ៖ លោក សេង ផល្លី
