នៅថ្ងៃទី១០ ខែមីនា ឆ្នាំ២០២១ម្សិលមិញ លោក សូរ ប្លាតុង អភិបាលស្រុកប្រាសាទបាគង បានដឹកនាំក្រុមការងារនៃរដ្ឋបាលស្រុក កម្លាំងនគរបាលស្រុក និងកងរាជអាវុធហត្ថស្រុក និងសហភាពសហព័ន្ធយុវជនខេត្តប្រចាំស្រុក បានចុះជួបសួរសុខទុក្ខ និងសំណេះសំណាលជាមួយបងប្អូនប្រជាពលរដ្ឋដែលទើបត្រឡប់មកពីប្រទេសថៃចំនួន ១៣នាក់ ដែលកំពុងធ្វើចត្តាឡីស័កនៅមណ្ឌលចត្តាឡីស័កនៅក្នុងវិទ្យាល័យ ហ៊ុន សែន ប្រាសាទបាគង។
លោក សូរ ប្លាតុង បានណែនាំដល់បងប្អូនប្រជាពលរដ្ឋ ត្រូវចូលរួមអនុវត្តតាមការណែនាំរបស់ក្រសួងសុខាភិបាលទាំងអស់គ្នា និងតាមប្រសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលតម្រូវឲ្យប្រជាពលរដ្ឋដែលទើបត្រឡប់មកពីក្រៅប្រទេសត្រូវធ្វើចត្តឡីស័កនៅតាមមូលដ្ឋាន។ ជាមួយគ្នានោះដែរចំពោះអ្នកដែលទើបត្រឡប់មកពីក្រៅប្រទេស សូមចូលរួមចត្ថាឡីស័កអោយគ្រប់១៤ថ្ងៃ និងថែរក្សាសុខភាព អនាម័យផ្ទាល់ខ្លួនឲ្យបានជាប្រចាំ។ ក្នុងនោះបើមានអាការៈមិនស្រួល ត្រូវរាយការណ៍ទៅគ្រូពេទ្យប្រចាំការនៅកន្លែងចត្តាឡីស័ក ហើយមិនត្រូវចាកចេញពីមណ្ឌលចត្ថាឡីស័កជាដាច់ខាត នៅក្នុងរយៈពេលនៃការធ្វើចត្ថាឡីស័កនេះ។
ក្នុងឱកាសនោះក្រុមការងារក៏បាននាំយកនូវគ្រឿងឧបភាគបរិភោគផ្តល់ជូនដល់ប្រជាពលរដ្ឋទាំង១៣នាក់ ដោយក្នុងម្នាក់ទទួលបាន៖ អង្គរ១០ គីឡូក្រាម, ត្រីខ១យួរ, មី១កេស, ទឹកត្រី១ដប, ទឹកស៊ីអ៊ីវ១ដប, ទឹកសុទ្ធ១យួរ, សាប៊ូ២ដុំ, ម៉ាស់២០ និងថវិកា៤ម៉ឺនរៀល រួមទាំងសម្ភារៈសម្រាប់ស្នាកនៅក្នុងពេលចត្ថឡីស័កមួយចំនួនទៀតផងដែរ៕
ព័ត៌មានជាតិ ថ្មីៗ
អត្ថបទ៖ ទិត្យ សំបូរ
កែសម្រួល៖ អ៊ុន ណារាជ្យ
