យោងតាមសេចក្ដីជូនព័ត៌មានរបស់ក្រសួងសុខាភិបាល បានឲ្យដឹងថា នៅព្រឹកថ្ងៃទី១០ ខែមីនា ឆ្នាំ២០២១នេះ ក្រសួងបានរកឃើញអ្នកឆ្លងកូវីដ១៩ ក្នុងសហគមន៍ចំនួន៦៤នាក់ថែមទៀត ក្នុងនោះមានរាជធានីភ្នំពេញចំនួន២៧នាក់ , ខេត្តកណ្ដាលចំនួន២៩នាក់ , ខេត្តព្រះសីហនុចំនួន២នាក់ និងខេត្តសៀមរាបចំនួន១នាក់ ដែលធ្វើឲ្យមានអ្នកវិជ្ជមានជំងឺកូវីដ-១៩ ក្នុងព្រឹត្តិការណ៍សហគមន៍២០កុម្ភៈ គិតពីថ្ងៃទី២០ ខែកុម្ភៈ មកទល់ព្រឹកថ្ងៃទី១០ ខែមីនា ឆ្នាំ២០២១នេះ កើនឡើងចំនួន៦១៣នាក់ ប៉ុន្តែមានអ្នកជាសះស្បើយចំនួន ៦២នាក់ បន្ទាប់ពីបានជាសះស្បើយបន្ថែម ១១នាក់នៅថ្ងៃនេះ ដូច្នេះនៅសល់អ្នកកំពុងសម្រាកព្យាបាលជំងឺក្នុងមន្ទីរពេទ្យចំនួន ៥៥១នាក់ ។
បើតាមសេចក្ដីជូនព័ត៌មានរបស់ក្រសួងសុខាភិបាលដដែល បានបញ្ជាក់បន្ថែមថា គិតមកទល់ព្រឹកថ្ងៃទី១០ ខែមីនា ឆ្នាំ២០២១នេះ កម្ពុជាបានរកឃើញករណីវិជ្ជមានវីរុសកូវីដ-១៩ សរុបជារួមចំនួន ១.១២៤នាក់ ក្នុងនោះស្រីចំនួន៤៧៧នាក់ ហើយក្នុងចំនួននេះ បានព្យាបាលជាសះស្បើយសរុបចំនួន៥៤៩នាក់ ក្នុងនោះស្រីចំនួន២០៩នាក់ និងអ្នកកំពុងសម្រាកព្យាបាលនៅបណ្ដាមន្ទីរពេទ្យនានា សរុបចំនួន៥៧៤នាក់ ក្នុងនោះស្រីចំនួន ២៦៨នាក់។
គួររំលឹកថា តាមរយៈសារសំឡេងពិសេស និងបន្ទាន់មួយនៅយប់ថ្ងៃទី០៨ ខែមីនា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា «ខ្ញុំសូមយកឱកាសនេះអំពាវនាវ សូមផ្អាករាល់ការជួបជុំទាំងឡាយ ដែលមិនមានការចាំបាច់ ខ្ញុំសូមអរគុណចំពោះបងប្អូន ដែលបានផ្អាកនូវពិធីការ ពិធីអាពាហ៍ពិពាហ៍ ឬក៏ធ្វើពិធីអាពាហ៍ពិពាហ៍តែបន្ថយចំនួនមនុស្ស ដែលធ្វើឱ្យហានិភ័យមានការធ្លាក់ចុះ សភាពការណ៍ពេលនេះ ទាមទារឱ្យមានការប្រុងប្រយ័ត្នលើសមុន ហើយអ្វីដែលមិនចាំបាច់ ហើយវាមិនទាន់ចាំបាច់ និងអាចផ្អាកបានគប្បីត្រូវតែពន្យារ គប្បីផ្អាក ពន្យារពេលរង់ចាំធ្វើនៅពេលក្រោយ ក៏មិនទាន់យឺតពេលដែរ នេះជាសភាពការណ៍ដ៏បន្ទាន់ ហើយដែលត្រូវយកចិត្តទុកដាក់កុំឱ្យជំងឺនេះសាយភាយចេញក្រៅ»។
ព័ត៌មានជាតិ ថ្មីៗ
សម្តេចតេជោ បានដាក់ចេញបទបញ្ជា និងអំពាវនាវដល់ក្រសួងស្ថាប័នរបស់រដ្ឋ ស្ថាប័ននីតិបញ្ញត្តិ ផ្អាកបណ្តោះអាសន្ននូវស្ថាប័ន ដោយទុកអ្នកធ្វើការបន្តិចបន្តួចតែប៉ុណ្ណោះ ហើយការផ្អាកការធ្វើការនេះ គឺធ្វើសម្រាប់ស្ថាប័នស៊ីវិលប៉ុណ្ណោះ ដោយឡែកស្ថាប័នកងកម្លាំងប្រដាប់អាវុធមិនមានផ្អាកនោះឡើយ៕
អត្ថបទ ៖ លោក ទិត្យ សំបូរ
កែសម្រួល៖ លោក លីវ សាន្ត
