យោងតាមរបាយការណ៍ ស្ដីពីលទ្ធផលអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៦ ប្រចាំខែកុម្ភៈ ឆ្នាំ២០២១ របស់រដ្ឋបាលខេត្តសៀមរាប គិតចាប់ពីថ្ងៃទី០១-២៨ ខែកុម្ភៈ ឆ្នាំ២០២១ គឺមានការថយចុះ បើប្រៀបធៀបទៅនឹងខែមករា ឆ្នាំ២០២១ បន្ទាប់ពីការប្រកាសផ្សព្វផ្សាយ និងដាក់ចេញឲ្យអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៦ របស់គណៈកម្មធិការត្រួតពិនិត្យគ្រឿងញៀនខេត្ត ។
នៅក្នុងរបាយការណ៍បញ្ជាក់បន្ថែមពីលទ្ធផលអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៦ ដោយបានធ្វើការផ្សព្វផ្សាយ និងអប់រំអំពីខ្លឹមសារប្រយុទធប្រឆាំងនឹងគ្រឿងញៀនបានចំនួន៣១១លើក ។ ការចុះអនុវត្តវិធានរដ្ឋបាលចំពោះអ្នកបើកបរ ដោយសហការជាមួយជំនាញពាក់ព័ន្ធបានចំនួន៨លើក និងធ្វើតេស្តទឹកនោមរកសារធាតុញៀនលើអ្នកបើកបរ និងទោចក្រយានបានចំនួន២១៥ នាក់ ក្នុងនោះតេស្តវិជ្ជមានចំនួន២៧នាក់ ។
វិធានការ អនុវត្តច្បាប់ ដោយការស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្តខេត្តសៀមរាប បានចុះបង្ក្រាបករណីជួញដូរ រក្សាទុក និងប្រើប្រាស់គ្រឿង ដែលទទួលបានលទ្ធផលបង្ក្រាបរួម មានចំនួន៣៤ករណី ឃាត់ខ្លួន១៧២នាក់ ស្រី០៤នាក់ ចាប់យកគ្រឿងប្រភេទមេតំហ្វេតាមីន(ice)ចំនួន១,១៨៥.២៣ក្រាម ទូរស័ព្ទ៤១គ្រឿង ជញ្ជីងចំនួន១គ្រឿង ក្នុងនោះរួមមាន៖ ករណីជួញដូរ និងរក្សាទុក ១៨ករណី ឃាត់ខ្លួន៦៤នាក់ ស្រី០៣នាក់ ករណីប្រើប្រាស់ ១៣ករណី ឃាត់ខ្លួន១០៥នាក់ បានបញ្ជូនទៅមជ្ឈមណ្ឌលស្ដារនីតិសម្បទាអ្នកញៀនគ្រឿងញៀនខេត្ត មានចំនួន១០៥នាក់ ស្រី១នាក់ ដើម្បីធ្វើការអប់រំ ព្យាបាល និងស្ដារនីតិសម្បទា និងបានទទួលព្យាបាលអ្នកញៀនគ្រឿងញៀន ដោយផ្អែកលើសហគមន៍បានចំនួន៥២នាក់ ស្រី០៤នាក់ ។
សូមជម្រាបថា យោងតាមរបាយការណ៍ ស្ដីពីលទ្ធផលអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៥ ប្រចាំខែមករា ឆ្នាំ២០២១ របស់រដ្ឋបាលខេត្តសៀមរាប បានឲ្យដឹងថា គិតចាប់ពីថ្ងៃទី០១-៣១ ខែមករា ឆ្នាំ២០២១ ស្នងការដ្ឋាននគរបាលខេត្ត និងបញ្ជាការដ្ឋានកងរាជអាវុធហត្តខេត្តសៀមរាប បានចុះបង្ក្រាបករណីជួញដូរ រក្សាទុក និងប្រើប្រាស់គ្រឿង ដែលទទួលបានលទ្ធផលបង្ក្រាបរួម មានចំនួន៤២ករណី ឃាត់ខ្លួន២១២នាក់ ស្រី០៩នាក់ ចាប់យកគ្រឿងប្រភេទមេតំហ្វេតាមីនចំនួន៤,០៨០.៣១ក្រាម ទូរស័ព្ទ៦០គ្រឿង ដាវ២ដើម និងជញ្ជីងចំនួន៥គ្រឿង ក្នុងនោះរួមមាន៖ ករណីជួញដូរ និងរក្សាទុក ២៣ករណី ឃាត់ខ្លួន៥៧នាក់ ស្រី៦នាក់ ករណីប្រើប្រាស់ ១៩ករណី ឃាត់ខ្លួន១៥៥នាក់ បានបញ្ជូនទៅមជ្ឈមណ្ឌលស្ដារនីតិសម្បទាអ្នកញៀនគ្រឿងញៀនខេត្ត មានចំនួន១៥៥នាក់ ស្រី៣នាក់ ដើម្បីធ្វើការអប់រំ ព្យាបាល និងស្ដារនីតិសម្បទា និងបានទទួលព្យាបាលអ្នកញៀនគ្រឿងញៀន ដោយផ្អែកលើសហគមន៍បានចំនួន៤២នាក់ ស្រី០៦នាក់ ផងដែរ ៕
អត្ថបទៈ ទិត្យ សំបូរ
