សហរដ្ឋអាមេរិកកំពុង ព្យាយាមអភិវឌ្ឍ អាវុធមីស៊ីលលឿនជាងសំឡេង ឲ្យបានឆាប់រហ័សស្របពេលដែលរុស្ស៉ី និងចិនកំពុងតែនាំមុខផ្នែកសព្វាវុធបែបនេះ។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃអង្គារនេះ ។
ថ្មីៗនេះយោធាអាមេរិកទើបតែប្រកាសថា កងទ័ពអាកាសអាមេរិក នឹងធ្វើតេស្តបាញ់មីស៊ីល AGM-183A ARRW ដែលជាប្រភេទមីស៊ីលលឿនជាងសំឡេង ដំបូងបំផុតរបស់សហរដ្ឋអាមេរិក ក្នុងកំឡុងពេលយូរបំផុត ៣០ថ្ងៃទៀត។ ការសាកល្បងនោះ នឹងផ្តោស៊ីនមានសារៈសំខាន់ ក្នុងការផ្តល់ល្បឿនឲ្យផ្នែកក្បាលគ្រាប់ ឈានដល់ល្បឿនលឿនជាងសំឡេងយ៉ាងតិច ០៥ដង ដែលគេហៅថា ហៃភើសូនិច (Hypersonic)។
បើតាមអ្នកជំនាញបានអះអាងថា ដោយសារតែល្បឿនដ៏មហាលឿន និងសមត្ថភាពហោះបត់បែនដ៏អស្ចារ្យ ទើបធ្វើឲ្យពពួកមីស៊ីលលឿនជាងសំឡេង Hypersonic នេះ ស្ទើរតែគ្មានប្រព័ន្ធការពារមីស៊ីលណា អាចស្ទាក់ចាប់វាបានឡើយ នៅលើពិភពលោកនេះ ហើយសូម្បីតែការប្រើប្រាស់ ប្រព័ន្ធផ្កាយរណបប្រកាសអាសន្ន ដែលស្ថិតនៅលើទីអវកាស ក៏ពិបាកចាប់សញ្ញារបស់ពួកវាឲ្យបានទាន់ពេលដែរ។
មីស៊ីល AGM-183A ARRW អាចធ្វើការបាញ់ចេញពីស្លាបរបស់ យន្តហោះទម្លាក់គ្រាប់បែកអាមេរិក B-52 ហើយមីស៊ីលនេះស្ថិតក្រោមការអភិវឌ្ឍរបស់ក្រុមហ៊ុន Lockheed Martin។
គួរបញ្ជាក់ថា បច្ចុប្បន្នសហរដ្ឋអាមេរិក មិនមានអាវុធលឿនជាងសំឡេង Hypersonic ដែលអាចធ្វើប្រតិបត្តិការបានតែម្តងនោះទេ ដែលជាហេតុធ្វើឲ្យកំពូលមហាអំណាចពិភពលោកមួយនេះ ដើរក្រោយរុស្ស៉ី និងចិន ដែលសុទ្ធតែមានមីស៊ីលប្រភេទនេះ សម្រាប់ធ្វើប្រតិបត្តិការបានរួចស្រេចទៅហើយ និងកំពុងតែធ្វើការអភិវឌ្ឍសមត្ថភាព ជាបន្តបន្ទាប់ផងដែរ៕
